Пра гэта заявіў на «Кастрычніцкім эканамічным форуме» (KEF) намесьнік старшыні праўленьня Нацбанку Дзьмітры Калечыц.
«Несумненна, фінансаваму сэктару Беларусі неабходная больш глыбокая інтэграцыя ў міжнародную фінансавую сыстэму. Адзін з ключавых элемэнтаў тут — гэта праграма з МВФ. Яна дазволіла б у значнай ступені інтэгравацца ў міжнародную фінансавую сыстэму, палепшыць крэдытны і краінавы рэйтынг, зьнізіць кошт рэсурсаў для субʼектаў эканомікі. Адначасова гэта дапамагло б зьмяніць структуру зьнешніх запазычаньняў, зрабіць яе больш устойлівай», — цытуе БелТА Дзьмітрыя Калечыца.
«У цэлым для вырашэньня гэтых задач праграма з МВФ нам прынцыпова неабходная», — заявіў намесьнік старшыні Нацбанку.
Цяпер у Менску працуе тэхнічная місія МВФ па пытаньнях дзяржпрадпрыемстваў.
Беларускі ўрад разьлічвае на крэдыт ад МВФ у 3 мільярды даляраў. МВФ заклікае Беларусь да рэформаў. Аляксандар Лукашэнка 3 кастрычніка на нарадзе, прысьвечанай узаемадзеяньню Беларусі з МВФ, скрытыкаваў рэкамэндацыі МВФ.
«Я ўжо тысячу разоў казаў: усе рэформы мы правялі», — заявіў Лукашэнка.
