Ҳодиса
Ҷасади Шӯҳрат Исматуллоевро дар наздикии Саразм ёфтаанд. ВИДЕО
Ҷасади Шӯҳрат Исматуллоев, муовини собиқи раиси "Ориёнбонк"-ро пас аз тақрибан ду моҳ дар ҳудуди шаҳри Панҷакент ёфтаанд.
Мақомот гуфтанд, ӯро моҳи июни имсол як гуруҳ дар Душанбе рабуда, баъди куштан ба дарёи Зарафшон партофтанд. Ҳодисаи вобаста ба мансабдори бонки наздик ба хонаводаи президенти Тоҷикистон сарусадои зиёде ба бор овард.
Юсуф Раҳмон, додситони кулли Тоҷикистон, гуфт, ташхиси дандон ҷасади Шӯҳрат Исматуллоев будани онро тасдиқ кард. "Ду рӯз пеш, 13-уми август, аз як ҷазирачаи байни дарё аз наздикии маҳалли Саразми шаҳри Панҷакент ҷасади Исматуллозода Шӯҳрат ёфт шуд," -- иттилоъ дод ӯ рӯзи 15-уми август.
Гуфта нашуд, ки ҷасади муовини собиқи раиси "Ориёнбонк"-ро кӣ ёфтааст. Кумитаи ҳолатҳои фавқулода дар рӯзҳои аввали нопадид шудани Исматуллоев гуфта буд, ки маъмуронаш ҷасади бонкдор ва низ Исмоил Раҳмонов, омӯзгори Донишгоҳи давлатии тиҷорати Тоҷикистонро дар дарёҳои Зарафшон ва Варзоб меҷӯянд.
Видеоро дар инҷо бинед:
Додситони кул гуфт, барои шиносоии бештари ҷасади Исматуллоев санҷиши дигар мегузаронанд ва дар рӯзҳои наздик маълумоти зиёдтар хоҳанд дод. Вай афзуд, дар пайванд ба қатли Шӯҳрат Исматуллоев нисбат ба 16 кас парванда кушода, 13 нафарро дастгир карданд.
"3 каси дигар дар хориҷа ҳастанд ва онҳоро дар рӯзҳои наздик, моҳҳои наздик дастгир карда, ба Тоҷикистон меорем," – гуфт Юсуф Раҳмон. Вале шарҳ надод, ки дар кадом кишвар ҳастанд ва оё музокирот барои боздошти онҳо ҷараён дорад ё не. Қаблан дар изҳороти Додситонӣ аз Русия ва Туркия ёд шуда буд.
Яке аз гумонбарон Дилшод Саидмуродов, маъруф бо лақаби "Дилшоди СБ", номбар мешавад, ки дар гузашта дар Додситонии кул, Оҷонси зиддифасод ва Вазорати корҳои дохилӣ кор кардааст.
Шокирҷон Ҳакимов, ҳуқуқдони тоҷик, мегӯяд, агар мақомот барои гумонбарони ин ҷиноят далели қатъӣ дошта бошанд, дар ҳамкорӣ бо ҳамтоёни хориҷии худ онҳоро боздошт ва ба Тоҷикистон хоҳанд овард.
"Аввал, моҳияти ҷинояти содиршуда, ки дар фазои иттилоотӣ афкори ҷамъиятиро ба вуҷуд овард, соярӯшанҳои зиёд дорад. Дуюм, воқеан дар гузоришҳои расмӣ ва ғайрирасмӣ оид ба Дилшод Саидмуродзода сару садоҳо ҳаст, вале то чӣ андоза онҳо заминаҳои ҳуқуқӣ доранд, аён нест,” – гуфт ӯ.
Дар охири ҳафтаи гузашта вазири корҳои дохилии Тоҷикистон тасдиқ кард, ки дар ҷинояти вобаста ба рабудан ва куштани Шӯҳрат Исматуллоев ду корманди собиқи ВКД иштирок доштаанд. Рамазон Раҳимзода аз зердастони пешинаш ном нагирифт.
Пештар мақомоти Молдова гуфта буданд, ки Рустам Ашӯров, шаҳрванди Тоҷикистон ва яке аз гумонбарони рабудану куштани Исматуллоев, ки дар фурудгоҳи Кишинёв ду маъмури амниятиро кушт, корманди собиқи милиса будааст.
"Тормоз" ё бори бисёр? Шарҳи вазир дар бораи ҳодисае, ки 11 касро кушт. ВИДЕО
Рамазон Раҳимзода, вазири умури дохилии Тоҷикистон мегӯяд, тормози мошини борбаре, ки дар шаҳри Кӯлоб ба садама дучор гардид, қаблан ҳам мушкил пайдо карда будааст. Аммо бархеҳо ба фарзияи мақомот шубҳа доранд. Дар садамаи рӯзи 6-уми август дар Кӯлоб беш аз 20 нафар куштаву маҷрӯҳ шуданд.
Рамазон Раҳимзода, вазири умури дохилӣ 11-уми август зимни нишасти хабарӣ гуфт, хулосаи тафтишоти пешакӣ ин аст, ки садама бо мошини борбар бо иллати аз кор мондани таҷҳизоти таваққуфдиҳанда (тормоз) сар задааст. Дар ин нишаст хабарнигорон аз вазир пурсиданд, ки оё дуруст аст ин мошин қаблан дар ноҳияи Дарвоз низ ба садама дучор шудааст?
"Дар Дарвоз садама накардаасту лекин мушкили вобаста ба таҷҳизоти манъкунанда пайдо шудааст. Лекин дар онҷо бартараф карданд, ҳаракат карда қариб 100 километр боз ҳаракат кардааст. Аз ҳама нишебии вазнин, ки худи Шӯрообод ва Кӯлоб аст, гузашта омадааст ва дар ҳамин ҷо ҳодиса сар задааст,"-посух дод Раҳимзода.
Вазир шарҳи бештар надод, ки дар тормози мошини борбар чигуна мушкил пайдо шудааст ва аз нигоҳи техникӣ идомаи ҳаракати он то куҷо дуруст будааст. Рамазон Раҳимзода афзуд, ки дар робита ин ҳодиса парвандаи ҷиноӣ боз шуда, тафтишот аз сӯи мақомоти додситонӣ идома дорад.
Гузориши видеоиро инҷо бинед:
Дар пай сар задани ин ҳодиса баъзе мунтақидон гуфтанд, зоҳиран мошини "Дулан" аз меъёр бештар бор дошта, ташхиси техникӣ нашуда буд. Мақомот ба ин танқидҳо мушаххасан посух надодаанд. Вазири умури дохилӣ 11-уми август танҳо гуфт, ронандаи ин мошин, ки ӯ низ дар садама ҷон додааст, таҷрибаи беш аз 10 солаи ронандагӣ доштааст.
Дар роҳи самти Хоруғ-Кӯлоб дар ним сол бори дуюм аст, ки мошинҳои боркаш ба садама дучор мешаванд. Дар садамаи моҳи март се нафар дар хиёбони Кӯлоб кушта шуда буд. Ронандаҳои собиқадор мегӯянд, роҳи нишеби тӯлоние, ки аз Шамсиддин Шоҳин ба Кӯлоб меояд, бояд тағйир дода шавад.
Бино бар иттилои ВКД, танҳо дар нимаи аввали соли ҷорӣ дар Тоҷикистон 492 садама рух додааст, ки бар асари ин ҳодисаҳо 193 нафар кушта шуда, бештар аз 500 нафар ҷароҳат бардоштаанд. Омори кушташудагон аз садамаҳои нақлиётӣ нисбат ба ҳамин давраи соли гузашта 13 нафар бештар будааст.
"Албатта ин ташвишовар аст. Нақлиёт ҳам дар ҷумҳурӣ зиёд шуда истодааст, албатта медонем роҳҳо таъмир шуда истодааст, баъзе роҳҳое, ки ба талаботи стандартӣ мувофиқ нест ва садама зиёд ба қайд гирифта мешавад. Мо хулоса пешниҳод кардем ба Вазорати нақлиёт, Вазорати нақлиёт чора дида истодааст, ки омилҳое, ки сабаби сар задани садама аст, онҳо баррасӣ карда, бартараф карда тавонем,”-афзуд, Рамазон Раҳимзода, вазири умури дохилӣ.
Афзоиши садамаҳои нақлиётӣ мавҷи интиқодҳоро нисбати кори нозирони роҳ бештар кардааст. Дар пай афзоши чунин ҳодисаҳо, чанд мақомдори Бозрасии давлатии автомобилӣ аз кор барканор шуданд.
Мақомот ваъда додаанд, ки нозирони тасодуфиро аз кор пеш мекунанд ва вазъро ислоҳ мекунанд. Коршиносон мегӯянд, то замоне фасод аз байн наравад, вазъ тағйир нахоҳад кард.
Коршиносон сабабҳои асосии садамаи Кӯлобро гуфтанд. ВИДЕО
Садамаи пурқурбонӣ дар шаҳри Кӯлоб мавзӯи фасод дар Тоҷикистонро дубора доғ кард.
Дар садамаи рӯзи 6-уми август беш аз 20 нафар куштаву маҷрӯҳ шуданд. Мақомот гуфтанд, тормози мошини боркаш аз кор монда, "Дулан" бо суръат мошинҳои самти муқобилро пахш ва ду хонаро тахриб кардааст.
Шарофиддин Гадоев, мухолифи ҳукумат, ки дар гузашта дар Тоҷикистон ширкати боркашонӣ дошт, мегӯяд, зоҳиран ин мошин аз меъёр бештар бор дошта, ташхиси техникӣ нашуда будааст.
"Резинҳои тормози мошин 35-40 дарсад кам шуд, бояд иваз шаванд. Дар чунин ҳолат эҳтимоли аз кор мондани тормоз зиёд аст. Ин мошинҳо борбардориашон 18 тонна аст ва “притсепаш” 8 тонаву 200 килограм. Вақте аз нишеб поён мешавад ва бори вазнин фишор меорад, дигар тормоз мошинро нигоҳ дошта наметавонад,"-гуфт ӯ.
Ин мухолифи ҳукумат иддао дорад, ки мошин мутаалиқ ба яке аз ширкатҳои Шамсулло Соҳибов, домоди Эмомалӣ Раҳмон аст. Ба гуфтаи ӯ ширкате, ки бояд мошинҳоро аз ташхис гузаронад низ, тобеи домоди президент аст.
Ин ҳарф чанд рӯзи охир дар шабакаҳои иҷтимоӣ низ садо медиҳад, ки мошини боркаш мутааллиқ ба як ширкати зери назари Шамсулло Соҳибов, яке аз домодҳои Эмомалӣ Раҳмон аст, вале ҳанӯз ӯ ба ин хабарҳо вокуниш накардааст.
Мошини боркаше, ки дар Кӯлоб ба садама дучор шуд, аз Чин молҳои мактабӣ меовардааст. Шарофиддин Гадоев мегӯяд, барои ба даст овардани фоидаи бештар аз меъёр бештар бор мекунанд.
"Агар шумо 18 тонна бо куб бор карда биоред, мешавад 6 ҳазор доллар, вале агар 36 тона биоред, мешавад 10 ҳазор доллар, ки чор ҳазор доллар фоида мешавад. Барои ҳамин дар ин мошинҳо зиёд маҳсулот бор мекунанд."
Гузориши видеоиро дар инҷо тамошо кунед:
Дар роҳи самти Хоруғ-Кӯлоб дар ним сол бори дуюм аст, ки мошинҳои боркаш ба садама дучор мешаванд. Дар садамаи моҳи март се нафар дар ҳамин хиёбони Кӯлоб кушта шуда буд. Ронандаҳои собиқадор мегӯянд, роҳи нишеби тӯлоние, ки аз Шамсиддин Шоҳин ба Кӯлоб меояд, бояд тағйир дода шавад. Файзиддин Зарифов, ронандаи собиқадор мегӯяд, ин роҳ набояд бо чунин шакл дароз то дохили шаҳр нишеб бошад.
“Дар замони шӯравӣ дар ағбаи Чормағзак ҷои ташхиси автобусҳо буд. Аввал месанҷиданд ва баъд иҷозаи ҳаракат медоданд. Онҷо бояд дидбонгоҳҳо бошанд, ки назорат кунанд ва нагузоранд, ки бори вазнин бор кунанд. Якум сабабаш ҳамин, ки бори вазнин бор мекунанд ва тормоз намеқапад.»
Дар Тоҷикистон ба ҳисоби миёна ҳар рӯз то се нафар дар садамаҳои роҳ кушта ва наздик ба даҳ нафар маҷрӯҳ мешаванд. Коршиносон решаи аслии садамаҳоро фасодкорӣ медонанд.
Зафар Суфӣ, рӯзноманигори тоҷик мегӯяд, «вақти гирифтани гувоҳи ронандагӣ, вақти назорати техникӣ ва вақте туро нозир роҳ бозмедораду бо ришва раҳо мешавӣ, дигар оқибаташ садама аст. Дигар вақте одам бо ришва осон кораш буд мешавад, дигар нуқсашро ислоҳ намекунад.»
Пас аз афзоиши садамаҳо чанд мақомдори Бозрасии давлатии автомобилӣ барканор шуд. Мақомот ваъда додаанд, ки нозирони тасодуфиро аз кор пеш мекунанд ва вазъро ислоҳ мекунанд. Коршиносон мегӯянд, то замоне порадиҳиву порагирӣ аз байн наравад, вазъ тағйир нахоҳад кард.
Садама дар Кӯлоб тӯйхонаро ба мотамхона табдил дод. АКС
Радиои Озодӣ дар бораи садамаи мудҳиши шоми 6-уми август дар шаҳри Кӯлоб, ҷузъиёти бештар пайдо кард. Тибқи иттилои ахир, теъдоди қурбониёни ҳодиса ба 11 нафар расидааст. Яке аз захмиён имрӯз 7-уми август дар бемористон даргузашт. Аз қурбониёни ҳодиса се нафарашон занони аз 49 то 59-сола, як ноболиғи 14 ва боқимонда ҷавонони то 26-сола ҳастанд. Дар ин ҳодиса 10 каси дигар захмӣ шудаанд.
Манобеи Радиои Озодӣ гуфтанд, сабабгори садама Шуҳратҷон Эргашов, ронандаи 37-солаи мошини борбари "Дулан" ҳам дар ҷойи ҳодиса ба ҳалокат расидааст. Эргашов зодаи ноҳияи Рӯдакӣ буда, дар шаҳри Душанбе зиндагӣ мекардааст. Дар Раёсати ҳолатҳои фавқулоддаи минтақаи Кӯлоб гуфтанд, "Дулан"-е, ки ба садама дучор шуд, пур аз молҳои канселярӣ будааст.
Ба гуфтаи ҳамсуҳбатони мо дар мақомоти маҳаллии шаҳри Кӯлоб, дар миёни қурбониёни ҳодиса чанд нафарашон сокинони манзиле буданд, ки як рӯз пеш аз ҳодиса тӯй доштанд.
“Рӯзи шанбе тӯйро гузаронданд ва якшанбе маросими рӯйбинон мегузаронданд. Баъди ин маросим бояд охирон меҳмонон мерафтанд. Дар ҳамин вақт мошини “Дулан” омада ба хона бармехӯрад ва се нафар дар он хона мурданд,”-гуфт як манбаи Радиои Озодӣ дар мақомоти Кӯлоб.
Дар шабакаҳои иҷтимоӣ акси ҷавоне нашр шуд, ки ба гуфтаи сокинон дар рӯзи тӯяш қурбони садама шуд. Аммо ҳамсуҳбатони мо дар мақомоти шаҳри Кӯлоб ин иттилоъро тасдиқ накарданд.
Бархе манобеъ дар Беморхонаи ёрии таъҷилии Кӯлоб шаби гузашта шумори қурбониёни ин ҳодисаро бештар гуфта буданд. Дар ҳоле, ки мақомот шумораи қурбониёнро 11 нафар мегӯянд, ҳамсуҳбатони мо дар Беморхонаии ёрии таъҷилии Кӯлоб фавтидагонро 14 нафар гуфтанд.
Аксҳо аз садамаи пурқурбонии Кӯлоб
Тибқи иттилои расмӣ, ҳодиса соати 19:30-и 6-уми август дар шоҳроҳи "Душанбе-Кулоб-Хоруғ", воқеъ дар кӯчаи Ҷумъа Алии шаҳри Кӯлоб рух додааст. Бар асоси хабари ВКД, мошини боркаши тамғаи “Дулан”, ки аз пушт ядак (прицеп) доштааст, бинобар аз кор мондани "тормоз" ба садама дучор шудааст.
Ба гуфтаи шоҳидон, мошини боркаш аз нишебии самти ноҳияи Шамсиддини Шоҳин бо суръати баланд поён шуда, дар назди бозори "Сомонӣ"-и Кӯлоб ба самти муқобили роҳ ҳаракат карда, чандин мошинро пахш карда, ду манзили зистро тахриб кардааст.
То бозори “Сомонӣ”-и Кӯлоб мошинҳои боркаш тақрибан 20 километр аз ноҳияи Шамсиддин Шоҳин сарнишеб меоянд. Дар гузашта ҳодисаи шабеҳи инро мақомот аз кор боз мондани “тормоз”-и мошин бар асари бетанаффус поён шудан ва бори аз меъёр бештар бор кардан дар мошинҳои боркаш гуфта буданд. Аз тариқи ин роҳ бо мошинҳои боркаш бештар аз Чин молу маҳсулот ворид мекунанд.
Мақомот: Дар садамаи Кӯлоб 10 нафар ҷон бохт, 11 тан захмӣ шуд. АКС
Мақоми беҳдоштӣ мегӯянд, ки дар садамаи шоми якшанбе дар шаҳри Кӯлоб 10 нафар ҷон бохта, 11 тани дигар захмӣ шудаанд. Вазъи шуморе аз захмиҳо вахим гуфта мешавад.
Шарофиддин Рустамов, сардори Раёсати тандурустии минтақаи Кӯлоб рӯзи 7-ум август ба Радиои Озодӣ гуфт, ки 8 нафар дар ҷойи ҳодиса ва 2 нафари дигар дар беморхона ҷон бохтанд.
Ба гуфтаи Рустамов, 11 нафари дигар захмҳои гуногун бардошта, дар беморхона бистарӣ ҳастанд. Ӯ вазъи ду нафар аз захмиёнро вазнин арзёбӣ кард. Ба гуфтаи сардори Раёсати тандурустии минтақаи Кӯлоб, дар миёни фавтидаҳо як кӯдак ҳам ҳаст.
Бархе манобеъ дар Беморхонаи ёрии таъҷилии Кӯлоб шаби гузашта шумори қурбониёни ин ҳодисаро бештар гуфта буданд. "Даҳ ҷасадро ба сардхона интиқол додем. Чор нафари дигар дар роҳ то беморхонаи марказӣ ҷон доданд. Ҳанӯз як омори дақиқ нест, чун захмиёнро ба беморхонаҳои шаҳр мебаранд ва маълум нест, онҳо дар кадом ҳолатанд", -гуфта буд, як пизишки Беморхонаи ёрии таъҷилии Кӯлоб.
Дар Кумитаи ҳолатҳои фавқулоддаи минтақаи Кӯлоб гуфтанд, "Дулан"-е, ки ба садама дучор шуд, пур аз молҳои канселярӣ будааст.
То кунун ҳеҷ ниҳоде иттилои дақиқ дар бораи теъдоди фавтидаҳо, сабаби садама ва шахсияти ронандаи "Дулан" ироа накардааст.
АКСҲО АЗ ҶОЙИ ҲОДИСАРО ИНҶО БИНЕД:
Аксҳо аз садамаи пурқурбонии Кӯлоб
Дафтари матбуоти раёсати ҷумҳури Тоҷикистон хабар дод, ки президент Эмомалӣ Раҳмон ба хонаводаҳои ҳалокшудаҳо ҳамдардӣ кардааст. Бар пояи ин хабар, оқои Раҳмон ба ниҳодҳои давлатӣ дастур додааст, ки ба оилаҳои қурбониён кӯмаки моддӣ расонанд ва хонаҳои зарардидаро барқарор намоянд.
Тибқи иттилои расмӣ, ҳодиса соати 19:30-и 6-уми август дар шоҳроҳи "Душанбе-Кулоб-Хоруғ", воқеъ дар кӯчаи Ҷумъа Алии шаҳри Кӯлоб рух додааст. Бар асоси хабари ВКД, мошини боркаши тамғаи “Дулан”, ки аз пушт ядак (прицеп) доштааст, бинобар аз кор мондани "тормоз" ба садама дучор шудааст.
Ба гуфтаи шоҳидон, мошини боркаш аз нишебии самти ноҳияи Шамсиддини Шоҳин бо суръати баланд поён шуда, дар назди бозори "Сомонӣ"-и Кӯлоб ба самти муқобили роҳ ҳаракат карда, чандин мошинро пахш карда, ду манзили зистро тахриб кардааст.
То бозори “Сомонӣ”-и Кӯлоб мошинҳои боркаш тақрибан 20 километр аз ноҳияи Шамсиддин Шоҳин сарнишеб меоянд. Дар гузашта ҳодисаи шабеҳи инро мақомот аз кор боз мондани “тормоз”-и мошин бар асари бетанаффус поён шудан ва бори аз меъёр бештар бор кардан дар мошинҳои боркаш гуфта буданд. Аз тариқи ин роҳ бо мошинҳои боркаш бештар аз Чин молу маҳсулот ворид мекунанд.
Дар моҳи марти имсол низ як мошини боркаш дар ин маҳал ба садама дучор шуда буд. Дар он ҳодиса ронанда ва ду мусофир ҳалок шуда буд.
КҲФ аз мушкил дар ҷустуҷӯи ҷасади бонкдор ва омӯзгори рабудашуда гуфт. ВИДЕО
Бо гузашти якуним моҳ аз рабуда ва нопадид шудани ду нафар дар Тоҷикистон, аз ҷумла Шуҳрат Исматуллоев, муовини раиси “Ориёнбонк” ҳанӯз аз онҳо нишоне пайдо нашудааст.
Кумитаи ҳолатҳои фавқуллодаи Тоҷикистон мегӯяд, ҷустуҷӯи ҷасадҳои афроди рабудашуда, ҳамчунон идома дорад.
Рустам Назарзода, раиси Кумитаи ҳолатҳои фавқуллода ва мудофиаи граждании назди Ҳукумати Тоҷикистон, рӯзи 4-уми август дар сӯҳбат бо хабарнигорон гуфт, ҷасади Шуҳрат Исматуллоев, муовини раиси “Ориёнбонк” ва Исмоил Раҳмонов, омӯзгори Донишгоҳи давлатии тиҷорати Тоҷикистонро ҳамзамон дар рӯдхонаҳои “Зарафшон” ва “Душанбе” ҷустуҷӯ мекунанд.
Ба гуфтаи ӯ олуда ва зиёд будани сатҳи об, кори наҷотбахшонро мушкил кардааст. “Сатҳи об ҳоло хеле баланд аст. Суръати об бениҳоят баланд аст. Баъд об ҳоло соф нест. Ҷое ки ба мо нишон доданд барои корҳои ҷустуҷӯӣ хеле душвор аст. Вале мо якҷоя бо хешовандони шахсони гумшуда ва кормандони Вазорати корҳои дохилӣ кор бурда истодаем.”- афзуд, Рустам Назарзода, раиси Кумитаи ҳолатҳои фақулода.
Генерал Назарзода гуфт, шаби гузашта ҷасадеро аз рӯдхона берун оварда, ба наздиконаш додаанд, ки чанд моҳи пеш ғарқ шудааст. Ӯ афзуд, ки бовар дорад, ҷасади ду фарди бенишоншуда, аз ҷумла Шуҳрат Исматуллоев ҳам пайдо хоҳад шуд. “Кофта истодаем, меёбем. Ҳоло мақомоти дахлдор кор бурда истодаанд ва агар ҷойи ҳодисаро дақиқтар созанд, нағз мешавад” – илова кард, Назарзода.
Ба иттилои мақомоти Тоҷикистон, Шӯҳрат Исматуллоев муовини ававали раиси “Ориёнбонк” рӯзи 23-юми июни имсол рабуда шуда, бар асари шиканҷа ҷон додааст.
Додситонии кул мегӯяд, ҷасади Исматуллоев ба дарё партофта шудааст. Дар пайванд ба марги ӯ мақомот чанд нафарро дастгир ва чанд нафарро гумонбар эълон карда, баъзеро дар берун аз кишвар меҷӯянд.
Наздикони Исмоил Раҳмонов, омӯзгори Донишгоҳи давлатии тиҷорати Тоҷикистон ҳам, ки моҳи июн рабуда шуда буд, аз он нигаронанд, ки бо гузашти қариб ду моҳ аз вай нишоне пайдо нашудааст ва додситонӣ ҳам онҳоро ба парванда шинос намекунад.
Ба иттилои мақомот, гумонбарон дастони омӯзгорро баста, ӯро дар ҳудуди ноҳияи Айнӣ, ба дарёи Фон партофтаанд. Ба гумони рабудани ин омӯзгор, подполковники Вазорати корҳои дохилӣ Акмал Юсуфзода ҳамроҳ бо як нафари дигар боздошт шудааст.
Наздикони омӯзгори рабудашуда ахиран дар сӯҳбат бо Озодӣ гуфтанд, онҳо ҳам ҳамроҳ бо наҷотбахшони Кумитаи ҳолатҳои Фавқулода ҷустуҷӯ доранд ва ҳатто барои дарёфти нишоне аз Исмоил Раҳмонов бо пардохти маблағ одамони дигарро ҳам ҷалб кардаанд, аммо талошҳо то ҳанӯз бенатиҷа будааст.
Модари серфарзанд худро ба оби Вахш партофт, вале наҷот ёфт. ВИДЕО
Наҷотбахшон шаҳри Нораки вилояти Хатлон як занеро, ки бо қасди худкушӣ худро ба дарё партофтааст, зинда берун оварданд. Зани 40 сола сокини ноҳияи Данғара ва модари 6 фарзанд будааст.
Бино ба иттилои масъулини ҳукумати шаҳри Норак ӯ аз Данағара ба ин ҷо омадаву бо қасди худкушӣ худро дар рӯди Вахш партофтааст.
Дилшод Асозода, шаҳрдори Норак рӯзи сеюми август зимни суҳбат дар нишасти хабарӣ гуфт, ҳодиса нисфирӯзии 3-юми август рух додааст ва наҷотбахшоне, ки назди рӯду кӯлҳо навбатдорӣ мекунанд, тавонистаанд сари вақт занро аз об берун бароранд.
Зан дар суҳбат бо Бахши кор бо занони шаҳри Норак сабаби ин тасмимашро нақл карда, гуфтааст, вақте фаҳмид, ки шавҳараш зани дуюм дорад, қасди ҷони худ кард.
Назари шавҳари зан ва пайвандони ӯ дар ин бора маълум нест. Ҳоло ҳодиса аз сӯйи мақомоти интизомӣ дар шаҳри Норақ таҳқиқ мешавад.
Дар ду моҳи ахир ин сеюм ҳолати қасди ҷони худ кардани занон дар вилояти Хатлон аст. Дар ҳодисаи ахир модари 6 фарзанд наҷот ёфт, аммо дар ду ҳолати дигар ин талош бо марги занон анҷом ёфтаву чанд хонаводаро ба мотам нишонд.
Ду ҳафта пеш ҷасади Ҳайриниссо Ҳайдаровари 22-соларо дар оғили хонаи шавҳараш, дар Норак овехта пайдо кардаанд. Мақомоти мегӯянд, омили марги ин зан маълум нашудааст. Пайвандони зан гуфтаанд, сабаби худкушӣ кардани ӯ барои онҳо ҳам муаммо аст.
Ҳодисаи дигари моҳи июни имсол дар деҳаи Пасариқи ноҳияи Дустӣ рух дод. Зани 23-сола ва соҳиби як фарзанд худро оташ зад. Наздиконаш гуфтанд, духтари онҳо нафаҳмида дар Русия бо марде издивоҷ кард, ки аллакай оиладор будааст. Баъди бозгашт ба Тоҷикистон, ба гуфтаи пайвандон, ӯ мавриди фишори зани аввали шавҳар ва хонаводаи ӯ қарор гирифта, ба худкушӣ даст зад. Додситонӣ шавҳари ӯро боздошт кардааст.
Бино ба ҳисобҳои расмӣ дар якуним соли гузашта дар кишвар бештар аз 430 мавриди худкушӣ ва қасди ҷони худ кардан сабт шудааст. Дар ин миён, 208 нафар заноне будаанд, ки ба истилоҳи мардумӣ аз “зиндагӣ безор” шуда, худкушӣ кардаанд ва ё хостаанд, худро бикушанд.
Кумитаи кор бо занон ва оилаи ҷумҳурӣ қаблан гуфта буд, хушунати оилавӣ, муҳоҷирати тӯлонии ҳамсарону падарон ва вазъи ноустувори моддӣ аз сабабҳои асосии дилсардӣ аз зиндагӣ дониста мешаванд.
Муҳоҷири тоҷик дар Русия модару кӯдакро аз сӯхтор наҷот дод
Як муҳоҷири кории тоҷик дар шаҳри Екатеринбург зану кӯдакеро аз коми оташ наҷот додааст.
Дар бораи корнамоии муҳоҷир расонаҳои Русия хабар дода, аз ӯ Манучеҳр ном бурдаанд.
Сӯхтор рӯзи якуми август дар ошёнаи 25 -уми биное дар шаҳраки Светлий рух додааст. Муҳоҷири тоҷик баъд аз шунидани фарёди зане, ки бо тифли навзодаш дар миёни оташ монда буд ба кӯмак шитофт. Ӯ қабл аз омадани оташнишонҳо дари хонаро шикаста, модару кӯдакро наҷот додааст.
Муҳоҷири тоҷик ҳангоми сар задани сӯхтор дар баландошёна, дар сохтмоне дар наздикии он кор мекардааст.
“Ҳангоми пӯхтани ширинӣ дар хонае дар 25-ум ошёна сӯхтор сар зад. Зан аз балкон фарёд кард ва коргари сохтмоне дар ҳамсоягӣ садои ӯро шунид ва дуди оташро дида, пеш аз сӯхторхомӯшкунҳо омад. Оташнишонҳо ба далели мошини зиёд дар назди бино натавонистанд сари вақт бирасанд” – навиштаанд, сокинон дар гурӯҳи “ЖК Светлий микрорайон” дар “ВКонтакте”.
Ба нақли худи муҳоҷир, ӯ бо болға дари хонаеро, ки оташ гирифта буд, шикаста, зану кӯдакро берун овард.
Муҳоҷири тоҷикро барои ин корнамоӣ ва сари вақт расидан ба кӯмаки одамон қадрдонӣ кардаанд.
Ба навиштаи расонаҳо, вақте баъди сӯхтор масъулин барои изҳори миннатдорӣ ба суроғи муҳоҷири тоҷик рафтаанд, ӯ дар сохтмон корашро идома медод ва бо дидани онҳо тарсид. Фикр кард, ки барои беиҷоза аз маҳалли кор берун шудан огоҳӣ мегирад, аммо ташаккур шунид ва қадрдонӣ шуд.
Бори аввал нест, ки муҳоҷирони тоҷик худро дар хатар гузошта, барои наҷоти одамон дасту остин бармезананд. Бархе ҳатто дар чунин ҳодисаҳо ҷони худро аз даст медиҳанд.
Додгоҳи Иркутск гумонбарони оташ задани муҳоҷирони тоҷикро бегуноҳ донист. ВИДЕО
Додгоҳи шаҳри Иркутски Русия як пулис ва се сокини маҳаллиро, ки дар оташ задани вагони зисти муҳоҷирон ва куштани ду тан аз онҳо айбдор мешуданд, бегуноҳ эълон кардааст.
Сафорати Тоҷикистон дар Русия гуфт, ҳанӯз дар ин бора маълумот дастрас накардааст.
Наздикони муҳоҷирони ҷабрдида дар суҳбат бо Радиои Озодӣ гуфтанд, ки рӯзи 1-уми август додрас онҳоро комилан бегуноҳ дониста, аз толори додгоҳ раҳо кард.
Ин чор нафар ба он айбдор мешуданд, ки шаби 12-уми ноябри соли 2021 дар деҳаи Заларии Иркутск ба муҳоҷирони тоҷик ҳамла карда, вагони зисти онҳоро оташ заданд. Чор муҳоҷири тоҷик, ки зинда монда, вале захмӣ шуданд, аз ҷониби мақомоти рус боздошт ва барои муноқиша бо сокинони маҳаллӣ, айбдор мешаванд. Парвандаи
- Маҳмадтоҳир Ашӯров,
- Қурбонмад Содиқов,
- Далер Ҳасанов,
- Ҷумъабой Искандаров бо иттиҳоми "авбошӣ” ва “қасди куштор” ҳанӯз ба поён нарасидааст, вале ҳамлагрон ба онҳо, аллакай аз боздошт раҳо шуданд.
Ҳодиса аз он оғоз шуд, ки дар моҳи ноябри соли 2021 вагони муҳоҷиронро дар деҳаи Заларии Иркутск оташ заданд ва сокинони ноҳияи Файзобод Насимҷони Сайидалии 21-сола бо Сироҷиддин Гулзодаи 19-сола, бар асари ҳамла ва нафасгир шудан аз дуди оташ ҳалок шуданд.
Матбуоти маҳаллии Русия он замон навишт, ки ин муҳоҷирон бо чанд сокини маҳаллӣ он рӯз баҳс кардаанд ва сокинон ҳамроҳ бо як милиса шабона ба макони зисти муҳоҷирон ҳамла кардаанд. Мақомоти Русия чор муҳоҷирро барои ҷанҷол бо сокинони маҳаллӣ ҳамон рӯз боздошт кард, вале дар ибтидо ҳеч чорае нисбат ба ҳамлагарон надид.
Баъдан, мақомоти Тоҷикистон эътироз кард ва додситонии Иркутск нисбат ба як корманди Шӯъбаи кофтукоби ҷиноии Иркустк ва се ҷавони маҳаллӣ парванда боз кард. Ба гуфтаи манобеи Радиои Озодӣ, се тан аз онҳо баръакси муҳоҷирони тоҷик дар боздошт набуданд.
Рӯзи 1-уми август додраси мурофиа гуфтааст, ки афсари пулис ва се сокини маҳаллӣ ҳеч гуноҳе надоранд. Ҳарчанд, шоҳидон ба Радиои Озодӣ гуфтанд, ки худи онҳо ба гуноҳашон дар чанд мурофиа иқрор шуда буданд. "Онҳо аз ҷабрдида узр пурсида, гуфта будаанд, ки аз сари эҳсос вагони муҳоҷиронро оташ задаанд" вале додгоҳ онҳоро раҳо кардааст.
Як тан аз ҷабрдидагон ба пайвандонаш нақл кардааст, ки вақте аз додрас пурсид, агар онҳо бегуноҳ бошанд, пас вагонро кӣ оташ зад ва кӣ косахонаи сари ӯро шикаст, додрас посухе надодааст.
Ду сол пеш Вазорати корҳои хориҷии Тоҷикистон аз мақомоти рус талаб карда буд, ки ҳодисаро одилона таҳқиқ кунанд. Модарони чаҳор муҳоҷири боздоштшуда низ ба Эмомалӣ Раҳмон, президенти Тоҷикистон ва Владимир Путин, президенти Русия нома навишта, ба бегуноҳии фарзандонашон таъкид карда буданд.
Наздикони ҷабрдидаҳо ва муҳоҷирони фавтида ҳукми додгоҳи Иркутскро дар мавриди раҳоии чор муттаҳам маҳкум карда, онро як намунаи барҷастаи ноадолатии Русия ва таҳқири ғайрирусҳо медонанд. Онҳо мегӯянд, ин ҳукм нишон дод, ки дар Русия ҳарфи мақомоти тоҷик ва муҳоҷирони тоҷик ҳеч таъсире надорад ва онҳоро ҷиддӣ намегиранд.
12 талоши оташ задани комиссариатҳои ҳарбӣ дар Русия
Дар як шабонарӯзи ахир дар Русия талош шудааст, 12 комиссариати ҳарбиро оташ зананд.
Кӯшишҳо барои оташ задани военкомат ё маркази сафарбарӣ ба артиш, дар минтақаҳои гуногуни Русия, аз ҷумла Санкт-Петербург, Қазон, Омск, Калуга ва Подолск сабт шудааст. Дар ин бора расонаву шабакаҳои Телеграмии Русия хабар додаанд.
Аксари онҳое, ки бо гумони оташ задани комиссариати ҳарбӣ боздошт шудаанд, занон будаанд. Ба гуфтаи гумонбарон онҳоро ба ин кор афроде маҷбур намудаанд, ки гӯиё худро корманди мақомоти интизомӣ муаррифӣ кардаанд.
Бино ба навиштаи хабаргузории русии “Фонтанка” дар Санкт-Петербург, барои оташ задани комиссиариати ҳарбӣ алайҳи як марде парвандаи ҷиноятӣ боз кардаанд. Гумонбар, ки ҳоло дар боздошт аст, ронандаи як ширкати сохтмонӣ будааст.
Ба навиштаи расонаҳо ӯ баъди гирифтани як занги телефонӣ аз шахсе, ки худро корманди ФСБ ё Хадамоти федеролии амнияти Русия, Колесников муаррифӣ кардааст, ба ин кор даст зад.
Колесников гӯё ба ӯ дастур додааст, ки барои дастрас кардани баъзе санадҳои марбут ба Украина ташкили чунин як тавтеа зарур аст.
Баъд аз ҳамлаи Русия ба хоки Украина дар моҳи феврали соли 2022 ва сафарбарӣ ба ҷанг мавридҳои оташ задани комиссариатҳои ҳарбӣ зиёд шуд.
Дар як соли гузашта дар Русия 77 маротиба талош шудааст, ки комиссариатҳои ҳарбӣ оташ зада шаванд. Дар ин бора аз Додгоҳи ҳарбии ҳавзаи марказӣ хабар дода, таъкид кардаанд, ки чунин ҳолатҳо чун ҳамлаи терористӣ дониста шуда, барои он ба гумонбар то 10 соли маҳрумият аз озодӣ таҳдид мекунад.
Ҷасади қурбониёни садама дар Ҷомиро, ба хок супориданд.АКС
Садамаи мудҳиши рӯзи 21-уми июл як оиларо дар ноҳияи Абдураҳмони Ҷомӣ нобуд кард.
Падари хонавода барои охирин дидор бо рӯйи сарду ҷисми беҷони фарзандон ва ҳамсар аз Русия омад.
Болтобой Юлдошев, сокини деҳаи Шерободи ноҳияи Абдураҳмони Ҷомӣ, ки дар садамаи рӯзи 21- уми июл се фарзанд ва ҳамсару модарашро аз даст дод, гуфт, ҷасади ду тифлашро баъди 3 рӯзи ҳодиса аз соҳили дарёи Вахш пайдо ва ба хок супурдаанд. Вай дар ин садама ҳамаи аъзои хонаводаашро аз даст дод ва аз як оилаи калон фақат худаш танҳо монд.
Мошине, ки зану фарзандони Болтобой дар он буданд, дар роҳи ноҳияи Абдураҳмони Ҷомӣ, ба дарё сарозер шуд ва дар маҷмӯъ шаш кас ба ҳалокат расиданд. Ду нафари дигар маҷрӯҳ шуда, дар беморхона бистариянд.
Дар он садама ронандаи нақлиёт, сокини ноҳияи А. Ҷомӣ Диловар Давлатов;
Мусофирон: Тухтарой Мустафоқулова, соли таваллудаш 1958,
Бибизайнаб Гулмирзоева, соли таваллудаш 1997,
Барно Юлдошева, соли таваллудаш 2017,
Фаридун Юлдошев, соли таваллудаш 2019,
Лайло Юлдошева, соли таваллудаш 2022 дар ҷойи ҳодиса ба ҳалокат расиданд.
“Ҷасади Барнову Фаридунро се рӯз баъд аз садама пайдо кардем, баъди ташхис дар беморхонаи ноҳия, ба хок супоридем”, - гуфт Болтобой Юлдошев.
Мақомот сокинонро пурсуҷӯ доранд ва шоҳид меҷӯянд
Бо гузашти бештар аз 10 рӯз аз садама мақомоти милиса ва додситонии вилояти Хатлон аз миёни сокинони ноҳия шоҳид меҷӯянд.
Пештар Радиои Озодӣ ба нақл аз бархе сокинон гуфта буд, эҳтимол, нозири БДА барои итоат накардан ба фармони ист, мошини Диловар Давлатовро таъқиб мекард ва ронанда ҳам бо суръати баланд фирор менамуд. Вазорати корҳои дохилии Тоҷикистон дар як изҳорот “даст доштани нозири БДА-ро дар ин садама” рад кард.
Чанд тан аз сокинони деҳаи Чашмасори ноҳияи А. Ҷомӣ, ки садама дар ҳудуди деҳаи мазкур рух дод, дар суҳбат бо Радиои Озодӣ гуфтанд, ҳам аз мақомоти додситонии вилояти Хатлон ва ҳам аз Шӯъбаи милисаи ноҳия омада, аз онҳо дар ин бора пурсидаанд.
Умед, сокини ноҳия, ки дар лаҳзаи садама чанд қадам дуртар аз ҷойи ҳодиса ба таъмири биное машғул буд, гуфт, мақомоти милиса аз ӯ пурсиданд, ки “оё нақлиёти дигаре мошини ба об афтодаро таъқиб мекард?”
“Ман дар дохили бино ба кор машғул будам. Роҳро намедидам, фақат овози “тормоз”-ро шунидам. Давида берун баромадам, дар як лаҳза мошину одами зиёд ҷамъ шуд. Лаҳзаи даҳшатнок буд, дар он ҳолат касе дар ғами ин набуд, ки мошинро кӣ “сур” мекард. Аз чанд ҳамсоя ҳамин саволро пурсидаанд”, - гуфт Умед.
Ба иттилои мақомоти БДА, садама соати тақрибан 15:30 дақиқа рух додааст; дар соате, ки ба далели гармо кӯчаҳо тақрибан бе одам аст ва пайдо кардани шоҳид кори мушкиле.
Ягона дурбини назоратӣ чиро сабт кард?
Дурбини назоратӣ дар мағозаи “Ҳоҷӣ Раҳматулло” дар деҳаи Чашмасори ноҳия - дар фосилаи тақрибан 150-метрӣ аз ҷойи садама - ягона “шоҳиди ҳодиса” аст. Дастгоҳи сабти наворҳои ин дурбинро мақомот як рӯз баъд аз садама бо худ бурдаанд. Як сокини деҳа, ки нахост номаш зикр шавад, гуфт, ҳангоми бурдани дастгоҳи сабт кормандони мақомот нахуст наворҳои онро дар телефонҳояшон сабт кардаанд.
“Дар камера омадагӣ аст. Мошини аввал сахт меравад, мошини дувум оҳистатар, дар чуқуриҳо оҳиста ҳай мекунад. Дар камера дида мешад, ки як бача дар сояи дарахт нишастагӣ аст, милисаҳову прокурорҳо ҳамон одама суроғ доранд, мехоҳанд шоҳидӣ диҳад”, - гуфт сокине, ки шоҳиди бурдани дастгоҳи ҳифзи наворҳои дурбин шудааст.
Нозире, ки эҳтимол дорад, мошини ба об афтодаро таъқиб мекард, кист?
Ҳарчанд мақомот даст доштани кормандони БДА-ро дар таъқиби мошин рад мекунанд, аммо барои тасдиқи ин шарҳи худ наворҳои дурбини назоратиро ҳам нашр намекунанд. Ин ҳам сабаб шуда, ки овозаҳо дар мавриди таъқиби мошини ба фалокат афтида, хомӯш нашаванд.
Бино ба наворҳои дурбини назоратӣ, нозири БДА Д.Г., ки низ сокини ҳамин ноҳия аст, бо мошини шахсиаш (Радиои Озодӣ тамға ва рақами қайди давлатии мошини шахсии нозири БДА-ро дар ихтиёр дорад) ба дунболи мошине меравад, ки баъдан дар об чаппа шуд. Бархе аз сокинон гуфтанд, ин нозир баъди он садама дигар дар роҳҳои ноҳия навбатдорӣ намекунад.
Д.Г. нозири роҳ, рӯзи 31 июл ба зангҳои ба такрори Радиои Озодӣ посух надод.
Латтапораи сафед - нишоне аз қурбониён
Рӯйи пул ё купруке, ки мошин аз онҷо ба об сарозер шуд, ҳоло латтапораи сафеде баста шудааст, ки нишоне аз қурбониёни садама аст. Ин латтапораро Болтобой Юлдошев ба ёди модар, ҳамсар ва се тифлаш бастааст. Вай нақл кард, ки як рӯз пеш аз садама ҳамсараш ба вай занг зад ва аз бемор шудани писараш Фаридун хабар дод. Падар барои муолиҷаи писараш аз Русия охирин захирааш - 3 ҳазор рубл - муодили тақрибан 360 сомонӣ ирсол кард.
Рӯзи ҷумъаи 21-уми июл ҳамсари Болтобой бо роҳнамоии модари ӯ ва ҳар се тифлаш ба бемористон рафт. Модаршӯ ва келин дар хона касеро надоштанд, ки аз ду тифли дигар нигоҳубин кунад. Онҳо маблағро аз бонк гирифтанд, Фаридунро ба беморхона бурданд ва … дар роҳи баргашт ба хона ҳамагӣ ҳалок шуданд.
Хешовандони дигар Болтобойро бо баҳонаи ин ки модараш ба бемории вазнине гирифтор шудааст аз Русия даъват карданд.
“Бародари ронандаи мошин маро дар фурудгоҳ дар Москва дид, ба оғуш гирифту гиря кард. Гуфтам, чӣ гап аст, гуфт, бародарам “авария” кардасту мурдаст. Дар мошинаш 2 зан ва 3 кӯдаки дигар мурдаанд. Модару ҳамсар ва кӯдакони худам пеши рӯям омад. То Душанбе расидем, дар фурудгоҳ хешовандон пешвоз рафта буданд. Нагуфтанд, қарибии хона расидам, баъд гуфтанд. Мурдаи модарамро худам дар қабр мондам, Фаридуну Барноро ҳам”, - гуфт Болтобой.
Вай гуфт, танҳо баъди ёфтани ҷасади Фаридуну Барно дар беморхона, ҳангоми аз ташхис гузаронидан кормандони милиса аз вай хостанд, дар варақае имзо гузорад. Болтойбой мегӯяд, намедонад, ки он варақ чӣ буд. Баъд аз ин дигар касе аз мақомот ба суроғи ӯ наомада ва напурсидаанд, ки чӣ арзу шикояте дорад.
Мақомот мегӯянд, феълан додситонӣ ҳодисаро таҳқиқ дорад. Аммо расман рад шудани фарзияи таъқиби нозири БДА аз мошини сарозершуда, умеди бархеро ба таҳқиқи одилонаи қазия кам кардааст.
Дар як садама дар Туркия 12 қазоқистонӣ захмӣ шудааст
Консули Қазоқистон дар Туркия ба аёдати қазоқистониҳое, ки дар натиҷаи садамаи нақлиётӣ осеб дидаанд, ба бемористони Аланияи Анталия рафтааст.
Дар ин бора сомонаи "Arbat.media" рӯзи душанбе бо истинод ба дафтари матбуотии Вазорати умури хориҷии Қазоқистон хабар дод.
Нашрияи туркии "Hurriyet" иттилоъ дод, ки автобуси сайёҳони қазоқистонӣ субҳи 30 июл дар ноҳияи Аланияи Туркия бо мошини боркаше бархӯрд. Дар натиҷа ронандаи автобус ва роҳбалади украинӣ ҷон бохта, беш аз 10 кас осеб дидааст.
Тибқи иттилои дипломатҳои қазоқ, дар ин садама 12 шаҳрванди ин кишвар захм бардоштааст. Вазъи ду нафарашон "вазнини миёна" арзёбӣ мешавад.
Дар Батумӣ сайёҳони русро бо эътироз пешвоз гирифтанд
Дар бандари Батумии Гурҷистон киштии "Astoria Grande" сайёҳони русиягиро субҳи имрӯз бо ҳамоиши эътирозӣ пешвоз гирифтанд.
"Эхо Кавказа" хабар дод, ки субҳи имрӯз дар бандари Батумӣ донишҷӯён, фаъолони маданӣ ва мухолифон таҷаммуъ карданд. Ба иттилои телевизиони "Рустави 2", ҳамоиши эътирозӣ ба задухӯрд бо кормандони пулис печида, дасти кам 10 кас дастгир шудааст.
Киштии "Astoria Grande", ки беш аз 800 мусофирро интиқол медиҳад ва бештари онҳо шаҳрвандони Русия ҳастанд, дар масири Сочӣ–Трабзон–Батумӣ–Амасра–Истамбул–Сочӣ ҳаракат мекунад. Он 27 июл ҳам вориди бандари Батумӣ шуда буд. Шоми он рӯз дар эътироз ба сафари сайёҳони рус дар шаҳрҳои Тифлис ва Батумӣ тазоҳурот баргузор шуда буд.
Иштирокчиёни иқдом зидди ҳамлаи Русия ба Украина эътироз ва аз посухи бархе аз сайёҳони русиягӣ ба саволи рӯзноманигорон тааҷҷуб карданд.
Дар суҳбат бо рӯзноманигорон бархе аз русиягиҳо гуфтанд, аз ҳамлаи соли 2008-и Русия ба хоки Гурҷистон ҳимоят мекунанд. Яке аз сайёҳон гуфт, "Русия Абхозистонро аз гурҷиҳо озод кард".
Як соат баъд аз эътирози сокинон, киштӣ бандари Батумиро тарк кард.
Фаъоли тоҷик баъди истирдод дар Душанбе аз худ дарак дод
Низомиддин Насриддинов, як фаъоли тоҷик пас аз даҳ рӯзи истирдодаш аз Минск ба Душанбе, аз худ дарак дод.
Мақомоти интизомии Беларус Низомиддин Насриддиновро, баъд аз 7 моҳи боздошт, рӯзи 21-уми июл ба Тоҷикистон истирдод кардаанд. Дар ин бора вакили мудофеъи Низомиддин Насриддинов дар Белорус, ба пайвандонаш хабар дода буд.
Аммо мақомоти тоҷик ҳанӯз дар ин бора шарҳе надодаанд. Талоши хабарнигори Озодӣ барои тамос бо Вазорати корҳои дохилӣ ҳам бенатиҷа буд.
Бо дархости пайвандон, Эътилофи зидди шиканҷа Низомиддин Насриддиновро бо вакили дифоъ таъмин кардааст. Ба гуфтаи наздиконаш, имрӯз 31-уми июл вакил бо ӯ мулоқот кардааст.
Саодат Насриддинова, модари Низомиддин, ба Радиои Озодӣ гуфт, бо вакили мудофеъи писараш сӯҳбат кард ва вай гуфтааст, ки “саломатии Низомиддин хуб асту шиканҷа нашудааст. Танҳо ба либоси тоза ва лояи дандоншуӣ ниёз дорад”
“Ман ҳафтаи гузашта ба созмони Эътилофи зидди шиканҷа дар Тоҷикистон муроҷиат карда будам ва онҳо адвокат Муҳаббатшо Баллаевро ба мо доданд, ки аз писарам ҳимоя кунад. Имруз дар мулоқот бо Муҳаббатшо бовар ҳосил кардам, ки писарам дар боздоштгоҳи рақами яки Душанбе мавсум ба амният будааст”,- гуфт, модари Низомиддин
Ба гуфтаи Саодат Насриддинова, пеш аз ин, рӯзи 24- уми июл фарде ба ӯ занг зад ва худро нафари наздик ба мақомот муаррифӣ намуда, хабар додааст, ки Низомиддин дар бинои амният аст ва ӯро латтукӯб кардаанд. “Ман ин ҳарфҳоро шунида, фиғон кардам, ки телефонро хомӯш кард, ҳарчанд кӯшиш кардам, ки тамос гирам, нашуд”- нақл кард, модари Низомиддин Насриддинов.
Баъд аз ин ӯ ба Эътилофи зидди шиканҷа муроҷиат карда, кӯмаки ҳуқуқӣ хостааст.
Низомиддин Насриддинов, 8-уми январи имсол ҳангоми гузаштан аз Литва ба Беларус дастгир шуд ва то истирдодаш дар боздоштгоҳи шаҳри Гродно буд. Ӯ дар Тоҷикистон ба "даъвати оммавӣ ба ифротгароӣ" (моддаи 307, замимаи 1-и Кодекси ҷиноӣ) гумонбар аст.
Саидризо Насриддинов, бародари Низомиддин рӯзи 24-уми июл ба Радиои Озодӣ гуфт, хабари истирдоди бародарашро дар Додситонии кулли Беларус ба адвокаташ гуфтаанд. “Адвокат гуфт, ки се рӯз қабл, вақте барои суҳбат бо Низомиддин ба боздоштгоҳи Гродно рафт, ба вай гуфтаанд, ки Низомиддин ба Минск интиқол дода шуд ва вақте ба Минск меравад, аз додситонӣ мегӯянд, ки ӯ истирдод шуд,”- гуфт ӯ.
Энира Бронитская аз созмони “Human Constanta” моҳи март баъди боздошти Низомиддин ба Радиои Озодӣ гуфта буд, ки Додситонии кулли Тоҷикистон истирдоди Насриддиновро талаб кард ва ҷониби Беларус рӯзи 21-уми феврал розӣ шудааст.
Низомиддин Насриддинов, ки соли 2017 дар суханронияш дар нишасти Созмони Амният ва Ҳамкорӣ дар Аврупо худро узви "Гурӯҳи 24" муаррифӣ кард, аз моҳи октябри соли 2015 дар Олмон мезист. “Гурӯҳи 24” эълон кард, ки ӯ аз соли 2018 ба ин тараф узви ин созмон нест. Мақомоти Олмон ба ӯ ва оилааш санади паноҳандагӣ додаанд.
Дӯстонаш гуфтанд, ки солҳои ахир Насриддинов ба тиҷорати мошин шуғл дошт ва бо ҳадафи тиҷорат ба Беларус рафта буд.
Чанд созмони бонуфуз аз мақомоти Беларус талаб карда буданд, ки ба ҳеч сурат ин фаъоли сиёсиро ба Тоҷикистон надиҳад.
Баъди садамаҳои маргбор нозирони БДА-ро месанҷанд. ВИДЕО
Баъди як силсила садамаҳои пурфоҷеа дар роҳҳои Тоҷикистон, аз ҷумла бо ширкати ходимони роҳ, дар сохтори Бозрасии Давлатии автомобилӣ Аттестатсия санҷиши сартосарӣ шурӯъ шудааст. Ба қавли мақомот як ҳадаф аз шахсони тасодуфӣ пок кардани сафи бозрасон будааст.
Ҷумъа Давлат, раиси Оҷонсии хизмати давлатии Тоҷикистон, 27-уми июл ҳангоми як нишасти хабарӣ дар Душанбе гуфт, ин аттестатсия ғайринавбатӣ буда, бо дастури раиси ҷумҳур сурат мегирад.
“Сабаби баргузории он аз баъзе сустфаъолиятии худи мақомот аст. Шахсони лоиқ, салоҳиятнок, донишманд, қобилиятнок дар вазифаҳо монанд ва мақомоти мазкур аз кадрҳои тасодуфӣ, ки дар ҳама ҷо ҳаст, озод карда шаванд”-афзуд, ӯ.
Дар гузашта шаффофияти баргузории аттестатсия миёни хизматчиёни давлатӣ борҳо зери шаку шубҳа қарор гирифтааст.
Шокирҷон Ҳакимов, ҳуқуқшинос ва таҳлилгари тоҷик бар ин назар аст, ки барои таъмини шаффофият, дар чунин аттестатсияҳо намояндагони ҷомеаи шаҳрвандӣ бояд ҷалб шаванд. Вай шеваи баргузории санҷишро дар ҳама идораҳои давлатӣ интиқод карда гуфт, ин як намоиш аст.
“Зеро ки бо ном аттестатсияҳо доир мекунанд ва бо ин баҳона бо мақсади вонамуд кардани кор ва вокуниш ба эътирози раҳбарият чанд нафарро дур мекунанд ва ҷои холишударо дар заминаи муносибатҳои коррупсионӣ ва хешутаборӣ, аз ҳисоби дигар шахсони тасоддуфӣ пур мекунанд”-, шарҳ дод, Шокирҷон Ҳакимов.
Вале раиси Оҷонсии хизмати давлатӣ гуфт, аттестатсяи нозирони роҳ зери назари чанд ниҳод ҷараён дорад: “Дар он мутахассисон аз дастгоҳи иҷроияи президенти Тоҷикистон, Агентии назорати давлатии молиявӣ ва мубориза бо коррупсия, Прокуратураи генералӣ, Агентии хизмати давлатӣ, худи раҳбарияти Вазорати корҳои дохилӣ ва Бозрасии давлатии автомобилӣ низ дар аттестатсия иштирок доранд”.
Мақомот борҳо сабаби сар задани садамаҳои нақлётиро ба суръати баланди ҳаракати автомобилу бетаваҷҷӯҳии сокинон ва ронандагон рабт додааст. Вале сокинон ва бархе аз соҳибназарон дар бораи ҷой доштани мушкил дар низоми додани шаҳодатномаи ронандагӣ ва фасод ҳам сӯҳбат мекунанд.
Шурӯъи аттестатсияи нозирони роҳ дар ҳоле сурат мегирад, ки тайи моҳҳои охир садама дар роҳҳои Тоҷикистон афзоиш ёфта, бархеи онҳо бо ҳузури кормандони БДА рух додааст.
Ба гунаи мисол, 21-уми июн дар садамаи мудҳиш дар шаҳри Душанбе, ки боис ба марги чаҳор нафар, аз ҷумла тифли сесола шуд, як майори милисаро масъул донистанд.
Раёсати корҳои дохилии пойтахт 23-юми июн дар эъломияи расмӣ гуфт, сабабгори садама Орзубек Ҳабибзода, корманди 38-солаи БДА-и Вазорати корҳои дохилии Тоҷикистон аст.
Рустам Нозимзода, муовини сардори Шӯъбаи БДА-и ноҳияи Восеъ ба он муттаҳам мешавад, ки 21-уми июл дар шаҳри Кӯлоб бо суръати тез ҳаракат карда, пирамарди 83-соларо пахш кардааст, ки дар натиҷа мард ҷон бохт.
Сар задани чунин ҳодисаҳо интиқоди корбарони шабакаҳои иҷтимоиро низ ба миён гузоштааст.
Дар пайи тасоддуфҳои мудҳиш дар роҳҳои кишвар, ки чандин нафарро қурбон кард, раҳбари Бозрасии давлатии автомобилӣ ва чанд мақомдори ин идора барканор шудаанд.
Бино бар иттилои расмӣ, соли гузашта дар Тоҷикистон тақрибан 1100 садама рух додааст. Дар натиҷа, 416 нафар ҳалок шуда, зиёда аз ҳазор нафар ҷароҳат бардоштанд.
Ҳоло маълум нест аттестатсия ё санҷиш миёни нозирони роҳ метавонад боис ба ҳалли мушкил, аз ҷумла коҳиши садамаҳои нақлётӣ шавад ё на.
Гуфтугӯ