KQZ: Në të gjitha qendrat e votimit ka nisur procesi zgjedhor
Zëdhënësi i Komisionit Qendror të Zgjedhjeve, Valmir Elezi, tha se në të gjitha qendrat e votimit në Kosovë, procesi i votimit ka filluar, duke shtuar se i gjithë materiali zgjedhor është shpërndarë me kohë.
Gjatë konferencës së parë për media të KQZ-së, ai iu bëri thirrje qytetarëve të Kosovës që të ushtrojnë të drejtën e tyre të votës dhe tha se të drejtë vote brenda Kosovës kanë mbi 1.9 milion qytetarë.
Elezi ua kujtoi qytetarëve vendimin e KQZ-së se ata mund të identifikohen në qendrat e votimit me letërnjoftim me afat të skaduar.
A do të votoni?
📈 Shifrat nga proceset e kaluara zgjedhore na tregojnë se prej vitit 2008, asnjëherë në zgjedhje nuk ka dalë gjysma e popullsisë.
❗ Rikujtim, dalja në zgjedhje e forcon demokracinë.
Zyrtarë të Komisionit Qendror të Zgjedhjeve kanë bërë të ditur se do të pranohen edhe dokumentet e identifikimit që tashmë kanë skaduar.
Pamje nga votimet në Prishtinë
Në mbarë Kosovën mëngjesin e 9 shkurtit ka nisur votimi për zgjedhjet parlamentare.
Kameramani ynë, Ibrahim Berisha, sjell pamje nga votimet në Prishtinë.
Pesë të ndaluar për shkelje zgjedhore
Pesë persona janë ndaluar për veprën penale “cenim i përcaktimit të lirë të votuesve”, bëri të ditur Prokurori i Shtetit.
Prokuroria Themelore në Mitrovicë ka iniciuar dy raste të ndara lidhur me këtë vepër penale, pas pranimit të informacione nga qytetarët për shkelje zgjedhore.
Prokurori i Shtetit tha se ka angazhuar afër 100 prokurorë dhe staf të sistemit prokurorial për procesin zgjedhor, në mënyrë që të procedohet çdo parregullsi e mundshme në zgjedhje.
“Prokurorët do të qëndrojnë në zyrat e tyre në qytetet ku ekzistojnë prokuroritë themelore, ndërsa në ato vende ku Prokuroria nuk ka objekt, prokurorët do të qëndrojnë në stacione policore, ku në bashkëpunim me hetuesit e Policisë së Kosovës do të jenë në mbrojtje të votës së lirë të qytetarëve”, u tha në njoftim.
Ky institucion u bëri thirrje qytetarëve, partive e institucioneve të tjera që të denoncojnë çdo rast që dyshojnë për keqpërdorim të votave.
Po ashtu, Policia e Kosovës njoftoi se po zbaton planin e saj për ditën e zgjedhje, në koordinim me Prokurorinë për të mbrojtur votën.
