Kurti shpall fitoren

Kryetari i Lëvizjes Vetëvendosje, Albin Kurti, tha se partia e tij në koalicion me partnerët e saj, Partia Guxo dhe Alternativa, i ka fituar zgjedhjet parlamentare të 9 shkurtit dhe se do ta formojë Qeverinë e re të Kosovës.

“Zgjedhjet ishin të lira, demokratike dhe të ndershme. Falënderoj votuesit e LVV-së dhe të koalicionit tonë fitues. Jemi të parët dhe ky është konfirmim për qeverisjen tonë të mirë dhe progresive. Koalicioni ynë fitues do ta formojë Qeverinë e re, pra Kurti 3”, tha Kurti në një konferencë për media në Prishtinë.

Kurti nuk dha ndonjë shifër se sa për qind të votave mund t’i ketë fituar partia e tij.

“Rezultatet zyrtare nuk i kemi, por ato fillestare tregojnë se të dytën dhe të tretët edhe po t’i bëjnë bashkë votat, nuk bëjnë sa Vetëvendosje”, shtoi ai.

Augustin Palokaj, gazetar që prej vitesh përcjell politikat e Bashkimit Evropian, pret që Lëvizja Vetëvendosje ta kalojë shifrën prej 40% të votave.

Duke folur për Radion Evropa e Lirë, ai thotë se pakicat mund të vendosin se kush do ta formojë Qeverinë e re, nëse Vetëvendosje nuk bën koalicion me ndonjë parti opozitare.

"Besoj që Vetëvendosje si parti fituese do të jetë ajo që do ta marrë mandatin për të tentuar ta themelojë Qeverinë. Na pret një situatë jo e lehtë me turbulenca të mundshme politike në Kosovë, por edhe në skenën ndërkombëtare", thotë Palokaj.

BE-ja ka në fuqi disa masa ndëshkuese kundër Kosovës, për shkak të tensioneve në veriun e banuar me shumicë serbe.

Palokaj thotë se, pas zgjedhjeve dhe pjesëmarrjes së komunitetit serb në to, pret që BE-ja t'i heqë ato.

"Tash tensione në veri, për fat të mirë, nuk ka dhe nuk shoh arsye që të mos hiqen masat. Pra, mbeten vetëm disa aspekte ligjore se si të hiqen gradualisht ato", thotë Palokaj.

Sa i përket dialogut për normalizimin e marrëdhënieve mes Kosovës dhe Serbisë, ai pret që BE-ja ta vazhdojë presionin mbi Kosovën për themelimin e Asociacionit të komunave me shumicë serbe.

Ai, po ashtu, pret që BE-ja ta vlerësojë me notë të lartë rrjedhën e procesit zgjedhor.

Demokracia në Veprim - rrjet i organizatave që monitoron zgjedhjet në Kosovë - bëri të ditur se pjesëmarrja në zgjedhje ishte 42.1 për qind, me margjinë gabimi prej 0.84%.