Kurti shpall fitoren

Me mbi 50 për qind të votave të procesuara, Lëvizja Vetëvendosje prin me 37.50 për qind të votave, sipas Komisionit Qendror të Zgjedhjve

Demokracia në Veprim - rrjet i organizatave që monitoron zgjedhjet në Kosovë - bëri të ditur se pjesëmarrja në zgjedhje ishte 42.1 për qind, me margjinë gabimi prej 0.84%.

Votat me kusht dhe ato nga diaspora nuk janë përfshirë në këtë llogaritje.

Sipas DnV-së, Lëvizja Vetëvendosje ka siguruar 40.4 për qind të votave, me margjinë gabimi 1.44%.

Partia Demokratike e Kosovës ka siguruar 21.7 për qind të votave, me margjinë gabimi 1.45%.

Lidhja Demokratike e Kosovës ka siguruar 17.5 për qind të votave, me margjinë gabimi 0.97%.

Koalicioni i Aleancës për Ardhmërinë e Kosovës dhe Nismës ka siguruar 7.2 për qind të votave, me margjinë gabimi 0.82%.

Koalicioni për Familje ka siguruar 2.4 për qind të votave, me margjinë gabimi 0.21%.

Lista Serbe ka siguruar 5.4 për qind të votave, me margjinë gabimi 1.68%.

Subjekti serb, Për Liri, Drejtësi dhe Mbijetesë ka siguruar 0.6 për qind të votave.

"Votat jashtë vendit dhe ato me kusht mund të kenë ndikim deri në një shkallë prej 5% te subjektet politike", tha Eugen Cakolli nga DnV-ja.

Politologu Adrian Shtuni thotë se deklaratat e kryeministrit të Kosovës, Albin Kurti, se marrëdhëniet me SHBA-në janë në nivelin më të mirë të mundshëm, janë një “shkëputje nga realiteti”.

Kushdo që ta formojë Qeverinë e Kosovës, sipas tij, do të duhet t’i trajtojë me seriozitet të jashtëzakonshëm këto marrëdhënie.

Ato janë jetike për Kosovën dhe popullin e saj, thotë Shtuni.

“Nëse vazhdohet me dredhi dhe premtime të pambajtura, kam përshtypjen se do të ketë probleme në këto marrëdhënie. Kushdo që ta bëjë Qeverinë e re, duhet të jetë i qartë për realitetin. Nëse nuk ka qartësi, do të ketë kosto të lartë”, thotë Shtuni për Radion Evropa e Lirë.

Sipas tij, angazhimi i administratës së presidentit amerikan, Donald Trump, në Kosovë do të varet edhe nga mënyra se si do të sillet Qeveria e Kosovës.

"Unë shpresoj të ketë më shumë angazhim nga SHBA-ja për të arritur një formulë për normalizimin e marrëdhënieve të Kosovës me Serbinë, por, siç e thashë, kjo varet edhe nga impenjimi i Qeverisë së Kosovës", thekson Shtuni.

Politologu Adrian Shtuni thotë për Radion Evropa e Lirë se populli i Kosovës dhe institucionet e saj treguan standarde shembullore me organizimin e zgjedhjeve parlamentare të 9 shkurtit.

"Mbarëvajtja e procesit zgjedhor tregon për konsolidimin e demokracisë në Kosovë", thotë Shtuni dhe shton se këto zgjedhje duhet të merren si shembull edhe nga vendet e tjera të rajonit.

Në lidhje me pjesëmarrjen më të ulët në votime, krahasuar me zgjedhjet e vitit 2021, Shtuni thotë se ky "është një mesazh për politikanët në Kosovë" se "populli është i lodhur nga retorika agresive dhe përplasjet".