په داسې حال کې چې له پاکستانه د ای سي سي یا افغان سیتیزن کارت لرونکو او بې اسناده افغان کډوالو په وړاندې د نیولو او له دې هیواده د ایستلو د پراخه عملیاتو د پیل خبرونه خپاره شوي دي د ملګرو ملتونو د کارپوهانو ډلې له پاکستانه غوښتي چې د اسلام اباد، راولپنډۍ او نورو ښارونو څخه د افغان کډوالو د ایستلو او جبرې ستنونې لړۍ ودروي.
د کارپوهانو ډلې د اپریل په ۴ مه په یوه اعلامیه کې ویلي" میلیونه افغانان په پاکستان کې پرته له دې چې پر مشروع غوښتنو يې غور وشي، د ستنېدو له ګواښ سره مخ دي".
په اعلامیه کې ویل شوي، د پاکستان د حکومت دا اقدام د بشري حقونو او کډوالۍ د نړیوالو قوانینو څخه ښکاره سرغړونه ده.
میلیونه افغانان په پاکستان کې پرته له دې چې پر مشروع غوښتنو يې غور وشي، د ستنېدو له ګواښ سره مخ ديملګري ملتونه
په اعلامیه کې راغلي،" افغان ښځې، نجونې، نرښځیان، قومي او مذهبي لږه کي، د پخواني حکومت چارواکي او امنیتي کارکونکي، د بشري حقونو مدافعین، د رسنیو کارکونکي او خبریالان په دې برخه کې تر ټولو زیانمنونکې دي".
د ملګرو ملتونو کارپوهانو له پاکستانه غوښتي چې په دې برخه کې د یو ګاونډي هویاد په توګه خپل مهم رول ته دوام ورکړي.
په همدې حال کې د بښنې نړیوال سازمان له پاکستانه په جبري ډول د افغانانو د ایستلو په وړاندې ( د ضرب الاجل بېرته راګرځول ) په نوم کمپاین پیل کړی او په دې کمپاین کې یې د هغو افغانانو کیسې راخیستي چې له پاکستانه تر ایستلو وروسته یې ژوند د مرګ له ګواښ سره مخ کیږي.
دغه سازمان د اپریل په څلورمه په یوه اعلامیه کې ویلي چې پاکستان په غیر قانوني ډول افغانان وباسي.
په اعلامیه کې راغلي چې په دې اړه د دوي د پیل شوي کمپاین هدف د هغه افغانانو د غږ پورته کول دي چې له پاکستانه د جبري اخراج له خطر سره مخ دي.
پاکستان کې میشت افغان کډوال څه وايي؟
دا په داسې حال کې ده چې د پاکستان له بیلابیلو سیمو راپورونه وايي چې دغه هیواد د ای سي سي او بې اسناده افغان کډوالو په وړاندې د نیولو او ایستلو پراخه عملیات پیل کړي دي.
په اسلام اباد او راولپنډۍ کې د ای سي سي کارت یو درلودونکې افغان کډوال چې محمد الله نومیږي ازادي راډيو ته وویل،
"وضعیت ډېر خراب دی، پولیسو چاپې زیاتې کړي دي، افغانان نیسي او حاجي کمپ ته یې انتقالوي او له هغه ځایه یې افغانستان ته ډیپورت کوي، موږ کورونو کې پټ یو، کاروبار نه شو کولای، اقتصادي وضعیت ورځ تر بلې خرابیږي، زموږ غوښتنه داده چې پاکستان حکومت دې افغان کډوالو ته ورکړی وخت نور هم وغځوي".
په راولپیڼډۍ کې میشت یو بل افغان کډوال نورالله وویل،
"موږ له ویرې په کورونو کې پټ یو، دا وضعیت نه یوازې دلته په پنډۍ کې دی بلکې په پېښور او کراچۍ کې هم همدا وضعیت دی، پولیس افغانان نیسي او ډیپورت کوي یې، وضعیت ډېر خراب دی".
وضعیت ډېر خراب دی، پولیسو چاپې زیاتې کړي دي، افغانان نیسي او حاجي کمپ ته یې انتقالوي او له هغه ځایه یې افغانستان ته ډیپورت کويافغان کډوال
د پاکستان حکومت په جنوري کې اعلان کړی و، چې د (اې سي سي) یا افغان تابعیت کارت لرونکي کډوال باید د مارچ تر ۳۱ پورې له دغه هېواده په خپله خوښه ووځي، که نه نو له ټاکلې نېټې ورسته به د دوی په وړاندې له زور کار واخیستل شي.
که څه هم وروسته اسوشیتید پرس خبري اژانس د پاکستان د دولتي اسنادو پر بنسټ خبر ورکړو چې دا نېټه د اپریل تر ۱۰ مې غځول شوې ده خو راپورونه وايي چې همدا اوس د اسلام اباد او راولپیډۍ په ګډون د دې هیواد په بیلابیلو ښارونو کې د افغان کډوالو د نیولو عملیات پیل شوي دي او کور په کور یې د پولیسو پلټنې روانې دي.
د پاکستاني رسنیو د راپورونو پر بنسټ په تېرو څو ورځو کې لسګونه افغانې کورنۍ چې د ای سي سي کارتونه یې لرل د تورخم له لارې افغانستان ته ستنې شوې دي.
دغه راز پرون ډان ورځپاڼې د کراچۍ د چارواکو په حواله خبر ورکړ چې له دې ښاره د شپاړس زره یوسل او اته دیرش افغانانو د ایستلو بهیر پيل شو.
د راپور له مخې دا هغه افغانان دي چې ( اې سي سي) کارتونه لري او تر اوسه پولیسو څه باندې یونیم سل کسان نیولې دي.
