نن د بې اسناده افغانانو لپاره له پاکستانه د وتلو د مهلت وروستۍ نېټه ده

په داسې حال کې چې نن د مارچ ۳۱ مه له پاکستانه د هغه افغان کډوالو د جبري ستنونې لپاره د ورکړل شوي مهلت وروستۍ ورځ ده چې د اس سي سي په نوم د کډوالۍ ځانګړي کارتونه لري، د پاکستان ډان ورځپاڼې راپور ورکړی چې د راولپنډۍ د پولیسو یو مشر پولیسو ته لارښونه کړي چې په دې ښار کې دبې اسناده او ای سي سي کارت لرونکو افغان کډوالو په وړاندې اقدام وکړي.

ډان ورځپاڼې نن دوشنبه د پولیسو د چارواکو له قوله ویلي چې په دې لارښونه کې راغلي، هغه افغانان چې د کډوالۍ ځانګړي پي او ار کارتونه لري دوی ته هم باید خبرداری ورکول شي چې د راتلونکې جون میاشتې تر ۳۰ مې پاکستان پرېږدي.

ډاڼ ورځپاڼې لیکلي پولیسو ته له کورنیو سره د هغه افغانانو د نیولو او ایستلو لارښونه هم شوې چې په جرمونو کې ښکیل دي.

د پاکستان حکومت د روان کال په جنوري میاشت کې اعلان کړی وو چې د مارچ تر ۳۱ مې دې دا کډوال له دې هیواده ووځي کنه د اپریل په لومړۍ نېټه به یې دوی په وړاندې له زوره کار واخلي.

خو د پاکستان په بیلابیلو سیمو کې میشتو یو شمېر افغان کډوالو له دې وړاندې ازادي راډيو ته ویلي چې پولیسو له لا وړاندې د دوی د نیولو او زورولو لړۍ پیل کړې ده.

په همدې حال کې د ای سي سي کارت لرونکې یو شمېر افغان کډوال وايي له پاکستانه د وتلو اعلان ترې د اختر خوښي اخیستې او دا چې نه پوهیږي د اپریل له لومړۍ نېټې وروسته به څه کوي.

د خیبر پښتونخوا په پېښور ښار کې میشت منصف ناصري ازادي راډيو ته وویل:

[نه د اختر په خوښۍ پوه شو او د د روژې، روژه ماتې ته به ناست وو خو فکر مو ټول همدا وو چې له اختر وروسته به څه کوو، چرته به ځو ، بد وضعیت دی ټول اندېښمن دي .]

د پاکستان په پیڼدۍ کې میشت یو افغان کډوال چې د ای سي سي کارت لري او نه غواړي نوم یې په دې راپور کې خپور شي وايي سخت اندېښمن دی.

[موږ ته راکړل شوی وخت پای ته رسېدلې او سر له سبا به پر موږ فشار زیاتیږي چې پینډۍ پرېږدو، دا د افغان کډوالو لپاره یوه سخته شېبه ده، په دومره کم، لنډ او تنګ وخت کې له دې ځایه تلل له ستونزو خالي نه دي، ځکه دلته خلک کاروبارونه لري او په وطن کې هم هیڅ نشته.]

په ورته وخت کې له پاکستانه د سلګونو زرو افغان کډوالو د جبري اخراج په درشل کې، یو شمېر بنسټونو او سیاسي څېرو د دغه وضعیت په اړه اندېښنه ښودلې ده.

په اسلام اباد کې د ملګرو ملتونو د کډوالو د عالي کمشنرۍ یو این ایچ سي ار مشرې نوم فیلیپا کاندلر د پاکستان دا پرېکړه هیښونکې بللې او په خپل اېکس پاڼه یې لیکلي چې جبري ستنېدل د هیچا په ګټه نه دي ځکه د هغې په خبره په ۲۰۲۳ کال کې افغانستان ته ستانه کړل شوي کډوال اوس مهال په پاکستان کې دي.

په پاکستان کې د کډوالو لپاره د اقدام ګډې کمېټې ((JAC for Refugees په خپله ايکس‌پاڼه کې لیکلي، په داسې وخت کې کورنۍ او ټولنې د اختر د خوښۍ لپاره راغونډیږي افغان کډوال په ویره کې ژوند کوي، او فکر کوي چې دروازه به یې وټکول شي او دوی به توقیف او یا ډیپورټ شي.

د کډوالو لپاره د اقدام ګډې کمېټې د ملګرو ملتونو په ګډون د بشري حقونو له سازمانونو او بهرنیو سفارتونو غوښتنه چې په بېړني ډول دا مسله په لوړه کچه راپورته کړي.

د پښتون ژغورنې غورځنګ ویلي چې پاکستان په افغانستان کې له واکمنو طالبانو سیاسي غچ له عامو افغانانو اخلي.

د دې غورځنګ مشر منظور پښتین په خپل اختریز پیغام کې ویلي خیبرپښتونخوا د افغانانو خپله خاوره ده او دا چې د دې سیمې خلک باید دغلته د میشتو افغانانو په ننګه ودریږي.

دا په داسې حال کې ده چې پاکستان د ۲۰۲۳ کال په نومبر میاشت کې د بې‌اسناده افغان کډوالو د ایستلو بهیر پیل کړ .

د ملګرو ملتونو د کډوالو د عالي کمشنرۍ د معلوماتو له مخې تر دې دمه له پنځه لکه شل زره ډېر افغانان له دې هیواده ایستل شوي دي.

دغه ادارې اټکل کړی چې په پاکستان کې ۱ عشاریه ۵ میلیونه راجستر شوي افغان کډوال مشیت چې له دې ډلې یې شاوخوا ۸ لکه د ای سي سي یا افغان سیتیزن کارت لرونکي دي.