Өкмөт интернетте мониторинг жүргүзүү, көзөмөлдөө үчүн түзүлгөн Маалыматтык чөйрөнү изилдөө борборуна жетекчи кылып Бактыгүл Иманбек кызын дайындады. Ал борбор интернет коопсуздугун камсыздоо багытында иш алып барарын билдирди. Коомдо борбор "цензурага курал болушу мүмкүн" деген тынчсыздануу бар.
Медиада, интернетте жалган маалымат тараткандарга ири айып пул салган мыйзам долбоору парламенттин комитетинде ушул аптада биринчи окууда өттү. Укук коргоочулар жана юристтер мыйзам мамлекеттик органга курал болуп калат деп кооптонуп жатышат.
Human Rights Watch (HRW) эл аралык укук коргоо уюму Кыргызстанда уурдалып, өлтүрүлгөн Айзада Канатбекованын иши боюнча милициянын мурдагы башчысынын акталганын сындады. Уюм бул аялдар укугун басмырлоого жатарын белгиледи.
19-сентябрда Бишкек шаардык соту активист, акын жана ырчы Аскат Жетигендин иши боюнча апелляциялык арызды кароону улантты. Жараянда Аскат Жетигендики деген видео кайрылуу боюнча лингвистикалык экспертиза жүргүзгөн эксперттер көрсөтмө беришти. Алар адвокаттардын өтүнүчү менен чакырылган.
Бишкектеги №1 тергөө абагында жаткан Улуттук илимдер академиясынын мурдагы кызматкери Жоомарт Карабаев атайын кызматтын кысымына кабылып жатканын айтып, президент Садыр Жапаровго кайрылды. 27 жаштагы Карабаев “массалык башаламандык” беренесине айыпталып, үч айдан бери камакта жатат.
Медиа каражаттарында жана интернетте, анын ичинен социалдык түйүндөрдө жалган маалыматтарды тараткандарга айып пул салуу тууралуу өкмөт сунуштаган мыйзам долбоору Жогорку Кеңештин бир комитетинен биринчи окуудан өттү.
Жапырт камалган 11 журналисттин кылмыш ишине негиз болгон корутунду чыгарган эксперт Азамат Жанышбек уулу сот аткаруучулар тарабынан Ысык-Көлдөн алып келинип, сурак берди.
Кыргызстанда Эгемендиктин 33 жылдыгы белгиленип жатат. «Азаттык» Эгемен Кыргызстандын каармандары - дарыгер Сыргак Турдалиев, акын Саид Султан жана активист Мубина Орумбаева менен баарлашып келди.
Аламүдүн райондук сотунда дөңгөлөк желимдөөчү жайда иштеген жумушчунун кылмыш иши каралууда. Аны Фейсбукта жазгандары үчүн 17-майда милиция кызматкерлери үйүнөн кармап кеткен. Төрт айга чукул тергөө абагында отурган 55 жаштагы жарандын жакындары менен адвокаты тагылган айыпты четке кагууда.
Кыргыз өкмөтү медиа каражаттарында, интернетте жалган маалымат тараткандарды жазалоо боюнча кезектеги мыйзам долбоорун сунуштады. Жалпыга маалымдоо каражаттарында, интернет же социалдык тармактарда жалган маалымат тараткандарга 100 миң сом, юридикалык тараптарга 200 миң сом айып пул салуу каралган.
21-августта Жогорку сот пикири үчүн кармалган Каныкей Аранованын адвокатынын кассациялык арызын карап, Бишкектин сотунун аны үч жарым жылга кескен чечимин күчүндө калтырды. Айыпталуучунун жакындары Аранованын атынан Фейсбукка жалган билдирүү жазылып, куугунтукка кабылып жатканын айтып жүрүшөт.
8-августта YouTube видеохостинги жана тиркемеси Орусиянын дээрлик бардык аймагында ачылбай калды.
Дагы жүктөңүз
