Күлкү кербени

Компүтерге жаңыдан отурган үйрөнчүктүн сөздөрүнөн

- Алло, бул компүтер адиси бекен? Айтып койсоңуз. Мен ворд документке текст жазып атсам, тексттин алды улам кызыл менен сызылып калып атат (ред. – тексттин грамматикалык катасы бар жогу текшерилүүдө). Мага минтип кызыл сыя менен алдын сызуунун эч кажети жок. Эртең текстти салык инспекциясына алып барам, ошол жактан сызып алышат, керек болсо!

- Алло, бул компүтер адиси бекен? Жооп берип койсоңуз. Мен электрондук катты кантип жөнөтөм? Мен почта индексимди билбейм да. Же аны почточудан сураш керекпи? Жиберген катым жетеби? Кайсы почто кутусун айтып жатасыз? Электрондук? Менин үйүмдүн почто кутусу электрондукпу же жокпу, аны кантип билсек болот? Сыртынан ал темир куту болуп эле көрүнөт. А берки, жанагы, сиз айткан электрондук кутуну кайсы дүкөндөн сатышат? Дордой базарда барбы?

- Алло, бул компүтер адиси бекен? Суроом бар эле сизге. Компүтеримди оңдоп кетпедиңиз беле, анан эле ачылбай калды. А-а, сырсөздү оңдодуңуз беле? Сырсөздү кайталап айтсаңыз? Бир-Эки-Үч-Эки-Бир... Эми аны кантип эстеп калам, кудай аткырдыкы...

* * * * *

Интернеттин шайтан-шабыры

- Балам, сен көп эле компүтерде отуруп, интернетиңди аңтара бербесеңчи, - де чоң эне небересине кайрылды. – Мында өтө коркунучтуу саат-балакет бар көрүнөт, көзүң да кызарып чыгат экен. Эми тетиги сүрөттөрдү карагандан уялбайсыңбы, чоңатаң да андай жылаңачтарды көрчү эмес.
- Ой чоң апа, мен бул интернетти ачаарда сиз үйрөткөндөй бысмылда деп үч жолу айтып, “Жараткан Теңир өзүң жаман иш кылсам кечире көр!” деп алып анан ачып атам. Ошого карабай бул сүрөттөр чыга калып атканын, шайтандар десе! Сүф! – деп небере чычканды басып койду эле, компүтердеги “периштелер” экрандагы сүрөттү ак кар баскан тоонун ажайып сүрөтүнө алеки заматта алмаштыра салышты.

* * * * *

Таңдануу

Мен кичүү кызыма жагыш үчүн эмнелерди гана кылбадым! Куурчактын түрлөрүн сатып бердим. Балдар аянтында (курсагым салаңдап турса да) эч кимге жеткирбей чуркап жүрдүм. Ал үйрөнчү чет тилди алдын-ала үйрөнүп жүрдүм.
Бирок мунун баарын ал ансыз да атасы жасай турган иш-аракеттей кадыресе кабыл алып келди.
Өмүрүмдө биринчи жолу анын таң калганын бүгүн гана учураттым.
Интернетке макала жайгаштырып жатсам, ал артымдан келип окуп жатыптыр:
- Опе-ей, ушул өспүрүмдөр көп окуган блогдун модератору сиз белеңиз, ата?

* * * * *

Орусиядагы интернетчилер күлүшөт...

Орус президенти Дмитрий Медведевге интернетте видеоблог ачуунун кандай кажети бар эле? Анын ансыз да Биринчи каналы бар эмеспи!

Ардактуу өкмөт башчыбыз Владимир Путиндин туулган күнүнүн урматына мындан ары Орусиянын интернет ресурстарынын дареги мурдагыдай “чекит ру” (.ru) деп аяктабастан, “чекит пу” (.pu) деп коюлмакчы.


* * * * *
TCh.

...1953-жылдын март айлары чени.

“Мидин Нарынга келиптир” деп уктук.

Мугалимдер институтунун үч-төрт студенти “Тянь-Шань правдасы” гезитинин редакциясына келдик.

Тегерек тарткан топ кыраан каткы күлкүгө баткан.

Башында эскилиги жеткен кара тумак, эски тыбыт моюнорооч, кара чокой, көзүнүн алды шишимек тартып, ортодо Мидин сайрап турат.

- Күндөрдүн биринде Райкан (Райкан Шүкүрбеков, 1913-1964. – ред.) экөөбүздү Борбордук Комитет чакырып калды. Ээрчишип жөнөдүк.

Экөөбүздүн кылык-жоругубуз эчак эле белгилүү болуптур.

Биринчи (катчынын) алдында маалымат жатат.

Жолдош Исхак Раззакович экөөбүздү алмак-салмак карап алды.

Карап туруп:
- Сиздер эл тааныган акындар болуп туруп, эмне үчүн аракты көп ичесиздер, жолдоштор? – деди.
- Жок, Исхак Раззакович! Биз вино гана ичебиз.
- Арак менен винонун айырмасы кайсы?
- Айырмасы жолдош Орозалиев менен Жакишовдой, - дедим эле, чоңдор күлүп калышты.

(Анда Керимкул Орозалиев өзү да отурган. Ал БКнын идеология боюнча катчысы, Жакишов – КыргызТАГдын бир өңүрүн жетектеген кызматкер эле. Бирөө өз атасынын, экинчиси – чоңатасынын атына катталып алган жакын туугандар экен).

Сырткы түрүбүзгө көз жүгүртүп алып:
- Көп ичет окшойсуңар? – деди Биринчи катчы.
- Жок, Исхак Раззакович! Аз эле ичебиз. 100 грамм. Анан өзү эле андан ары алып жүрүп кетет.
Кайрадан каткырык жаңырды.

- Үй-бүлөчүлүк да анча ынтымакта эмес ко? Үч аял кетирипсиз, ушул чынбы?
- Мен бир эле аял кетиргемин.
- Экөөнүчү?
- Экөө кайра мени кетирген, Исхак Раззакович!
Кайрадан жапырт күлүп калышты.


А.Акматалиев.

* * * * *

“Азаттыктын” Кыргызстандагы алгачкы жергиликтүү кабарчыларынын бири, журналист, этнограф, публицист Амантур Акматалиевдин (1934-2002) бул эскерүүсү Бекмырза Рахман уулу Жекембаевдин “Куйкум сөздүү куудулдар” жыйнагына (Бишкек, 2002, 64-65-беттер) жарыяланган.