Күлкү кербени

Мубарак жана "кум-таш бизнеси"


Президент Хосни Мубарак катуу кеселдеп, өз сааты жакындап калганын сезет да, “оң колу” болгон жөкөрлөрүнүн бирин чакырат.
- Эми мен “аркы дүйнөгө” ооп кетсем, калкым кантээр экен? Кыйналып калбайбы?
- Өз жаныңызды ойлосоңуз, урматтуу райис! Калкың кыйналбайт.
Нил суусу соолсо да, мысырдыктар чөлдөгү кум-ташты жеп жата берет.
- Анда менин акыркы жардыгым ушундай болсун – чөлдөгү кумду неберемдин менчигине өткөрүп койсок туура болот көрүнөт.

* * * * * * *

Балдар менен баарлашканда

Президент Хосни Мубарак баштапкы мектепке келип, жеткинчектер менен жолугушат.
- Кана, кимиңерде суроо бар? – дейт жолугушуунун этегинде.
Рами деген бала кол көтөрөт.
- Менде төрт суроо бар.
Биринчиден, эмнеге 25 жыл бою кызматтан түшпөй койдуңуз? Экинчи. Неге сиздин вице-президентиңиз жок? Үчүнчү. Эмне үчүн уулдарыңыз өлкөнүн экономикасын да, саясатын да укуруктап алышкан? Төртүнчү. Эмне үчүн өлкөбүздүн экономикасы мышык ыйлагандай акыбалга кептелип калганда да эч бир чара көрбөй атасыз?

Капысынан мектептин коңгуроосу шыңгырап калды.

Мубарак сөздү танапистен соң уланталы деген соң, балдар бир аз убакытка сыртка чыгып келди.

- Кана, баарлашуубузду уланталы. Кимде кандай суроо бар? – деди президент Мубарак.
- Менде бар.
- Атың ким?
- Атым Тамир. Менде алты суроо бар.
- Болуптур, айта гой, Тамир!
- Биринчиден, эмнеге 25 жыл бою кызматтан түшпөй койдуңуз? Экинчи суроом. Неге сиздин вице-президентиңиз жок? Үчүнчү. Эмне үчүн уулдарыңыз өлкөнүн экономикасын да, саясатын да укуруктап алышкан? Төртүнчү. Эмне үчүн өлкөбүздүн экономикасы мышык ыйлагандай акыбалга кептелип калганда да Сиз эч бир чара көрбөй атасыз?
Бешинчи суроом. Эмне үчүн мектептин танапис жарыялаган коңгуроосу 20 мүнөт эртерээк кагылды?
Алтынчысын айтайын. Танапис маалында Рамини каякка жоготтуңар?


* * * * * * *

Профессор айткан азил

Белгилүү мысырдык профессор, доктор Абду-л-Вахаб ал-Месири 2007-жылы март айында “Хосни Мубарак жөнүндөгү анекдоттор” деген темада илимий жыйын өткөрөйүн десе, бийликтер ар шылтоону айтып ага уруксат бербей коюшкан.
Бирок профессор жыйнаган анекдоттордун айрымдары интернет аркылуу кеңири жайылып кеткен. Алардын бири...

Бир киши машинеси менен чөлдө баратып, анысы капысынан бузулуп калат. Тегеректе жардам берчү эч ким жок.

Анан төбөсүн караса, бир учак келаткан экен. Машинесинин үстүнө чыгып кол булгалап кыйкырса да учактагылар көңүл бурбай өтүп кете беришет.

Үч-төрт сааттан кийин дагы бир учак көрүнөт. Берки бечара машинесин өрттөп, учакка белги берет. Бирок ал да көздөн кайым болот.

Анан бир канча убакыттан соң үчүнчү учак көрүнөт. Тиги бечара кийимдерин бүт чечип, өрттөп, учакка белги берсе да, анысы байкабай өз жолу менен учуп кетет.

Эми анык өлөөрүнө көзү жеткен соң, алиги киши чөл жаңырта кыйкырат:
- Ушул өкмөттү шайтан алсын! Жоголсун Мубарактын өкмөтү!

Ошол замат кайдан-жайдан келгени белгисиз полициянын сүрдүү машинеси пайда болот да, берки кишини камакка алат.

* * * * * *

Атымды кантип билип алдыңар?

Кичинекей Сайрагүл апасынан таңдана сурады:
- Апаке, мен төрөлгөндө атымдын Сайраш экенин кантип билип алдыңар эле?


* * * * * *

Канчага келдиң?

Таалайбектен сурап калышты.
- Канча жаштасың?
- Жакында тогузга чыгам, азыр үчтөн аштым.
- Атаң канчада?
- Мен канчада болсом, ошончодо.
- Кантип эле?
- Жөнөкөй эле да. Мен төрөлгөндө ал менин атам болуп калды да!

* * * * *

Кийим тикчү элчи

Ата-энеси Саматты эркелетип, «чоңойгондо элчи болосуң, алыскы-ы өлкөдө элчи, дипломат болуп иштейсиң. Маселен, Жапонияда иштейсиң. Анан бизге сону-ун кийимдерди алып келесиң» дей беришет.
Бир күнү атасынын досу Саматтан сурап калды.
- Чоңойгондо ким болосуң?
- Элчи, и-и... эмне эле... дипло-м-м-ас болом.
- Дипломас болсоң эмне кылып иштейсиң?
- Кийим тигем. Анан атам менен апама көп-көп кийим апкелем.


* * * * * *

Тамгалардын ирээти

- Темирбек, сен ариптерди билесиңби?
- Ооба. Эжекемдин «Алиппеси» бар.
- Айтчы, анда А тамгасынан кийин кайсы тамга келет?
- Ошону да билбейсизби? Калган тамгалардын баары да!


* * * * * *

Жарма каалаганда

Биринчи мугалим Өмүр агай мектеп босогосун жаңы аттаган балдарга түшүндүрүп жатты.
- Эгерде суроо бергиңер келсе, демек, бир нерсе тууралуу сурагыңар келсе, анда кол көтөрүшүңөр керек. Түшүнүктүүбү? Мына минтип кол көтөрүү керек. Кана, кимде суроо бар? Ким кол көтөргүсү келээр экен?
Ары жак – бери жакта анда-санда көтөрүлгөн колдор. Кээлеринин колдору уялыңкырагандан жарым бүгүлгөн.
- И-и, Өмүрбек, аты уйкашым, сен туруп айтчы?
- Агай, - деди тиги шымаланып тура калып. – Үйгө барып жарма ичип келе калсам болобу?


* * * * * *

Мектепсиз деле оокат өтөт

Кичинекей Айдай бүгүн алгачкы ирет мектепке барган болчу.
- Мен эртеңден тартып мектепке барбайм, - деди Айдай чоңатасына.
- Ошо кантип болсун? Эмнеге антип жатасың? – деп чоңата таңдана сурады.
- Мен азырынча окуганды, анан жазганды билбейм да. А мектепте сүйлөшкөнгө уруксат беришпейт экен. Тайакча эле чийдире беришти.



* * * * * *
ТЧ.