"Азаттыктын" "Мигрант медиа" долбоорунун редактору. 2007-жылы К.Карасаев атындагы Бишкек Гуманитардык университетин аяктаган.
Бишкек шаардык соту эки жылдан бери камакта жаткан ишкер, KG Group курулуш компаниясынын негиздөөчүсү Имамидин Ташовдун ишин кайра кароо үчүн райондук сотко жөнөттү. Райондук сот аны тогуз жылга эркинен ажыраткан эле. Ташов бул иш кыйноо, коркутуп-үркүтүү менен токулганын айткан.
Жеңил акча, бат эле байып кетүү жана “ийгиликке жеткендердин” окуялары — социалдык тармактарда кеңири жайылып жаткан кабелтең убадалардын артында көз жаш, миллиондогон карыз жана кыйраган тагдыр турат. Лудоманиядан чыгуунун жолу татаал жана адистердин жардамы, узак реабилитация талап кылынат.
АКШда төрт кишинин өлүмүнө айыпталган кыргызстандык айдоочу иштеген трак компаниянын иши токтотулду. Окуя федералдык деңгээлде иликтенип, кыргызстандыктар ачкан трак компанияларды текшерүү башталды. “Азаттык” көп жылдан бери бул тармакта иштеп жүргөн мигранттар менен байланышты.
Элнура 2023-жылы күйөөсү менен Мексика аркылуу мыйзамсыз жол менен Америкага барган. Бирок үч айга жетпей эки чүрпөсү менен үй-бүлөлүк зомбулукка кабылган. 35 жаштагы келин Чикагодогу кризистик борборго жардам сурап кайрылып, ал жерде эки баласы менен бир жылдан ашуун жашаган.
Орусияда миграциялык мыйзамдардын катаалдашы кыргызстандык эмгек мигранттарынын турмушуна олуттуу сокку урду. Айрыкча мигранттардын балдарын мектепке кабыл алууда киргизилген жаңы талаптар миңдеген үй-бүлөлөрдү тагдыр чечкен тандоого түрттү.
Жаңы жылдан кийин Орусиянын "көзөмөл реестринен" чыга албай калган мигранттар депортацияланышы мүмкүн.
Кыргызстандык Жамал (аты өзгөртүлгөн) Америкага мыйзамдуу кирүүгө үмүт кылып, азыркы тапта Мексикада отурган мигранттардын бири. Ал Тихуанага үч баласы менен жыл башында барган. Ижарага батир алып, айына 1500 доллар төлөп жашап жатканын, күнүнө 5 миң сомдой тамак-ашка короторун айтып берди.
Орусияда теги тажикстандык жаранга өкүм чыкты. Новосибирск шаарында райондук сот аны "орус аскерлери тууралуу фейк маалымат тараткан, саясий ээнбаштыкка барган" деп, жети жылга эркинен ажыратты. Укук коргоочулар мигрантка тагылган айып далилсиз болгонун айтып жатышат.
Орусияда аскер кызматынан качты деп айыпталган теги кыргызстандык жигит Бишкекте кармалып, азыр тергөө абагында отурат. Жакындары Кыргызстандын укук коргоо органдары аны Орусиянын талабы менен кармаганын айтып, экстрадиция болушу мүмкүн деп тынчсызданууда.
Орусияда кийим тигип, дизайнерлик менен алектенген Айпери Сайдали кызы балдары менен жолуга албай жатат. Үч баласы мурдагы күйөөсүнүн колунда.
Орусиядагы “Сахарово” миграциялык борборунда кыйноого кабылып, арыздангандардын аягы тыйыла элек.
Москвада Украинадагы согуштан келгендердин кол салуусуна кабылган таксинин айдоочусу окуянын чоо- жайын айтып берди. Кыргызстандык мигрант өмүрүнөн кооптонуп турганын белгилеп, аты-жөнүн ачык айтпоону жана жүзүн көрсөтпөөнү өтүндү.
Бек Шеримбек уулу 2018-жылы Орусияда жумуш учурунда кырсыкка кабылган. Мигрантты курулушта кыш жүктөлгөн таңгак басып калып, омурткасы сынган. Белинен, бутунан майып болуп калган жигитти дарылатуу үчүн ата-энеси, бир туугандары да миграцияга кетүүгө аргасыз болгон.
Ош шаарынын тургуну Рысбү Абдыраева Орусияга иштегени кеткен небереси Улукман Капаровдон маалымат ала албай жатканын айтып кайрылды. Небереси 2022-жылы күздө Орусияга кетип, курьер болуп иштеп жатканын айткан. Бир ай өткөн соң Улукмандын теңтушу ал баңгизаты менен кармалганын кабарлаган.
Москвада курьер болуп иштеген Алиярбек Матраимов кардар берген баштыктын ичинен маңзатка окшогон шектүү зат табылган окуяга экинчи ирет кабылган. Мигрант жигит быйыл январда кооптуу баштыкты жолдон ыргытып жиберген. Бул жолу ал жеке коопсуздугунан чочуп, Кыргызстанга кайтып келди.
Орусияда 10 жылдан бери иштеп жүргөн Азат (аты өзгөртүлдү) 27-мартта Москванын “Шереметьево” аэропортуна учуп барып, 13 сааттык текшерүүгө кабылган. Мигранттын документтери гана эмес, телефону дагы текшерилген. Видеону “Азаттыктын” “Мигрант медиа” долбоору даярдады.
Орусиялык Вадим (аты өзгөртүлгөн) жакында эле кыргызстандык Айжан (аты өзгөртүлгөн) менен баш кошту. Учурда жубайлар Чүйдөгү айылдардын биринде жашайт. Вадим Орусиянын Украинага бастырып киришин сындап жүрүп, акыры мекенин таштап кетүүгө аргасыз болгон.
33 жаштагы Бактыгүл Жээнова Орусияда кулчулукта жүргөн жеринен жарым жыл мурда качып келгенин айтууда. Кулчулуктан кутулууга ал жашап жүргөн үйгө капыстан конокко барып калган мекендеши жардам берген. Бактыгүл суукта кой кайтарып, зордук-зомбулук көрүп, мекенине качып келүүгө аргасыз болгон.
29 жаштагы Даткайым Маматкадырова Американын Чикаго шаарында жашап жатканына алты айдан ашты. Ал АКШга өткөн жылы күйөөсү жана эки баласы менен Мексика аркылуу келген. Жубайлар бул үчүн балдары менен тобокелчиликке барып, жалпысынан 25 миң доллар сарптаган.
Дагы жүктөңүз
