Սպիտակ տնից Պուտինի հասցեին հնչող մեղադրանքների ու սպառնալիքների ֆոնին առաջիկայում ռուսական կողմի բանագնացը՝ Ուղղակի ներդրումների հիմնադրամի գործադիր տնօրեն, Պուտինի մերձավոր Կիրիլ Դմիտրիևը կմեկնի Վաշինգտոն՝ քննարկելու ռուս-ամերիկյան հարաբերությունների ամրապնդմանն ուղղված հարցեր: Ուկրաինա 2022-ին Ռուսաստանի ներխուժումից հետո սա կդառնա ռուս ամենաբարձրաստիճան պաշտոնյայի առաջին այցը Վաշինգտոն: Կրեմլի խոսնակը հաստատել է, որ նման այց հնարավոր է:
«Մենք շարունակում ենք շփումն ամերիկացիների հետ տարբեր խողովակներով։ Նախագահ Պուտինը բաց է մնում խաղաղ բանակցությունների համար», - ասել է Դմիտրի Պեսկովը։
Վերջին օրերին նախագահ Թրամփը մի քանի անգամ հայտարարել է, թե զայրացած է Պուտինի վրա և սպառնացել է անգամ պատժամիջոցներ կիրառել, եթե համոզվի, որ նա չի ցանկանում հրադադար հաստատել Ուկրաինայում և ժամանակ է ձգում: Այսօր էլ Սպիտակ տնից Fox News-ի թղթակցին էին ասել, թե ԱՄՆ վարչակազմը դիտարկում է Ռուսաստանի «ստվերային նավատորմի» դեմ պատժամիջոցների հնարավորությունը:
Մոսկվան նաև Վաշինգտոնին է փոխանցել էներգետիկ օբյեկտների ցուցակը, որոնց, ըստ ռուսական կողմի, հարվածել է Ուկրաինան: «Չեմ ուզում կանխատեսումներ անել, բայց տեսնում ենք ներկայիս առաջընթացը և ԱՄՆ գործընկերների ցանկությունը՝ վերացնելու մայրաքաղաքներում դիվանագետների բնականոն աշխատանքի համար միանգամայն անընդունելի խոչընդոտները», - նշել է Ռուսաստանի արտգործնախարար Սերգեյ Լավրովը:
Եվրոպան պետք է լինի բանակցությունների սեղանի շուրջ. Կալլաս
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասն «Ազատությանն» ասել է, որ Ուկրաինան պետք է բանակցի Ռուսաստանի հետ: Ըստ նրա՝ բանակցություններին պետք է մասնակցի նաև Եվրոպան, քանզի դրանց արդյունքն առնչվում է նաև Եվրոպայի անվտանգությանը:
«Ցանկացած գործարք չի աշխատի, եթե դրա իրականացմանը եվրոպացիները չմասնակցեն», - հավելել է նա:
Հազվագյուտ հանածոների գործարքը չի կարող հակասել ԵՄ-ին Ուկրաինայի անդամակցությանը. Զելենսկի
Ուկրաինայի նախագահը երեկ հայտարարել է, որ ուկրաինական հազվագյուտ հանածոների համատեղ արդյունահանման համաձայնագրում ՆԱՏՕ-ին Ուկրաինայի անդամակցության պայման չկա և չի եղել, ապա հավելել, որ գործարքը չի կարող հակասել ԵՄ-ին Ուկրաինայի անդամակցությանը: Վլադիմիր Զելենսկին նշել է, որ ամենօրյա ռեժիմով ԱՄՆ-ին են փոխանցում տեղեկություններ, թե ինչպես են ռուսները խախտում էներգետիկ օբյեկտներին չհարվածելու պայմանավորվածությունը: Նա հույս է հայտնել, որ դա անհետևանք չի մնա:
«Մենք իսկապես հուսով ենք, որ նախագահ Թրամփն ունի բոլոր համապատասխան գործիքները՝ ուժեղացնելու պատժամիջոցների ճնշումը ռուսների վրա: Այստեղ շատ կարևոր է որոշակի պայմանավորվածությունների մշտադիտարկումն ու իրականացումը», - ասել է Զելենսկին:
ԱՄՆ 50 հանրապետական և դեմոկրատ սենատորներ օրենքի նախագիծ են ներկայացրել, որն առաջարկում է 500 տոկոս մաքսատուրք սահմանել Ռուսաստանից նավթ և ուրան գնող երկրների նկատմամբ, եթե Մոսկվան խափանի հրադադար հաստատելուն ուղղված բանակցությունները: Պատժամիջոցները կկիրառվեն նաև, եթե Ռուսաստանը կրկին ձեռնարկի քայլեր, ներառյալ ռազմական ներխուժումը, որոնք կխարխլեն Ուկրաինայի ինքնիշխանությունը խաղաղության հասնելուց հետո:
Ռուբիոն ժամանում է Բրյուսել՝ ՆԱՏՕ-ի արտգործնախարարների հանդիպմանը մասնակցելու
Հրադադարի հարցում շոշափելի արդյունքների բացակայության ֆոնին ԱՄՆ պետքարտուղար Մարկո Ռուբիոն այսօր ժամանում է Բրյուսել՝ ՆԱՏՕ-ի արտգործնախարարների հանդիպմանը մասնակցելու: Կքննարկվեն հյուսիսատլանտյան դաշինքի անվտանգային առաջնահերթությունները, դաշնակիցների պաշտպանական ներդրումների ավելացումն ու Ուկրաինայում կայուն խաղաղության ապահովումը:
Ռազմական գործողությունները չեն դադարում
Դիվանագիտական այս զարգացումներին զուգահեռ կողմերը չեն դադարեցնում ռազմական գործողությունները: Գիշերը ռուսական անօդաչուների զանգվածային հարձակման է ենթարկվել Խարկովը, կան տուժածներ: Զելենսկին հայտարարել է, որ Սումիում և Դնեպրոպետրովսկում ռուսական հարվածները վնասել են էներգետիկ օբյեկտներ՝ չնայած դրանց չհարվածելու պայմանավորվածությանը: Ըստ ռուսական կողմի՝ ուկրաինական զինուժը Տագանրոգում և Կուրսկում անօդաչուներով հարվածել է բնակելի շենքերի:
