ԱՄՆ նախագահ Դոնալդ Թրամփի կարծիքով՝ Մոսկվան ձգձգում է Ուրաինայի հետ պատերազմը դադարեցնելու բանակցությունները, հայտնում է Fox News-ի լրագրող Ջեքի Հենրիխը՝ վկայակոչելով քննարկումներին ծանոթ աղբյուրը։
Ընդգծելով, որ Թրամփը հիասթափված է Ռուսաստանի նախագահ Վլադիմիր Պուտինից՝ լրագրողը X-ում գրել է, որ Սպիտակ տունը դիտարկում է կոշտ պատժամիջոցներ կիրառելու տարբերակը, թիրախում՝ «ռուսական ստվերային նավատորմն» է։
«Ռուսաստանի «ստվերային նավատորմը»՝ Բալթիկ ծովով նավթի անօրինական փոխադրումը, ճնշման հեշտ թիրախ կլինի», - ասել է աղբյուրը՝ նշելով, որ նավատորմի մեծ մասն արդեն պատժամիջոցների տակ է, և Ռուսաստանի ապօրինի նավթի վաճառքի 70 տոկսն իրականացվում է հենց ստվերային նավատորմի միջոցով:
Սպիտակ տան մամուլի քարտուղարն ավելի վաղ հայտնել էր, որ Թրամփը դժգոհ է Ռուսաստանի և Ուկրաինայի նախագահների վերջին հայտարարություններից՝ չհստակեցնելով, թե կոնկրետ որ հայտարարությունների մասին է խոսքը։
Օրեր առաջ ԱՄՆ նախագահն առաջին անգամ քննադատել էր Պուտինին՝ շեշտելով, որ իրեն շատ է զայրացրել Ռուսաստանի նախագահի հայտարարությունը, թե Ուկրաինային դրսից կառավարվող անցումային իշխանություն է հարկավոր:
Թրամփն ասել էր, որ նման սցենարի դեպքում ստիպված կլինեն նորից բանակցել նոր իշխանությունների հետ, և դեռ երկար ժամանակ գործարք հնարավոր չի լինի կնքել: Սպիտակ տան ղեկավարը սպառնացել էր մինչև 50 տոկոս մաքսատուրք սահմանել ռուսական նավթի վրա, եթե մեկ ամսում Պուտինը չհամաձայնի հրադադարին։
