Գյումրիի երկու նախկին քաղաքապետերն արձագանքում են վարչապետի պնդմանը, թե այս ամիս կայանալիք ընտրություններին ինքնահայտարարագրվածները՝ «դուրս են եկել իրենց գողացած գույքերը պաշտպանելու վերջին կռվին և ճակատամարտին»: Սամվել Բալասանյանն ու Վարդան Ղուկասյանն ասում են՝ Նիկոլ Փաշինյանն անմեղության կանխավարկած է խախտում, ուղղորդում դատարաններին:
«Եթե ինքը նմանատիպ հայտարարություն է անում, նշանակում է ինքը ստիպում է դատավորներին և մնացածին, որ բացասական որոշում կայացնեն, այսինքն, ևս մի ոչ դեմոկրատական քայլ, որ անում է դատաիրավական ոլորտի նկատմամբ», - նշեց Ղուկասյանը:
ԱՄՆ-ում գտնվող ու Գյումրիի պատմական Սև բերդի հողատարածքների ապօրինի օտարման համար մեղադրվող Սամվել Բալասանյանը գրավոր է պատասխանել վարչապետի մեղադրանքներին:
«Սև Բերդ» ամրոցը մեր ընտանիքը ձեռք է բերել նախկին սեփականատիրոջից, այլ ոչ թե համայնքից: Այնպես որ, «Սև Բերդ» ամրոցը չի կարող դառնալ քո սիրելի #հատիկառհատիկի կոնտենտ և հայտնվել «Ռենջ ռովեռ»-ի կողքին: Այդ անձը խոսեց «վերջին բոյի» մասին, ասեմ որ վերջին բոյ պետք էր տալ ուրիշ տեղ, այլ ոչ թե Գյումրիում՝ «Սև Բերդ»-ի դեմ», - նշել է Սամվել Բալասանյանը:
Մինչդեռ վարչապետ Փաշինյանը, որ երեկ Գյումրիում էր աջակցելու իրենց քաղաքապետի թեկնածուին, կուսակցական ելույթում, ինչպես նախորդ համապետական ընտրությունների քարոզարշավում, շեշտը դարձյալ դրել էր նախկինների ու նրանց ենթադրյալ թալանի վրա: Անգամ գումարի չափ ու անուններ հնչեցրեց, թե ովքեր են պատրաստվել վերջին ճակատամարտին:
«Գյումրիի ընտրություններին մասնակցում է 300-350 միլիոն դոլարի ապօրինի ձեռք բերված գույք, որը սպասվում է վերադարձի Հայաստանի Հանրապետությանը և ժողովրդին ի սեփականություն: Ընդ որում՝ հայտնի է, ումն են այդ գույքերը, դրանք Միշիկի գույքերն են, դրանք Վարդանիկի գյուքերն են, դրանք Ռոբիկի գույքերն են, դրանք Սերժիկի գույքերն են», - հայտարարել է վարչապետը:
Կոմկուսի ցուցակով ընտրապայքար մտած Վարդան Ղուկասյանը չի ընդունում իրեն վերագրվող պաշտոնական դիրքի չարաշահման, փողերի լվացման ու ապօրինի հարստացման մեղադրանքները: Գլխավոր դատախազությունը նրանից և նրա հարազատներից պահանջում է բռնագանձել 17 անշարժ գույք, մեկ ավտոմեքենա, ավելի քան 222 միլիոն դրամ: Մտավախություն չունի, որ վարչապետի հայտարարությունը իր գույքի բռնագանձման գործընթացը կարագացնի:
«Ասենք բռնագանձեցին, իմ ինչը բան եղավ, գույք է էլի, որ մահացանք էդ գույքը հետներս ենք տանելո՞ւ, մերկ եկել ենք, մերկ էլ գնալու ենք: Ես էնքան բան եմ կորցրել, էնքան բան եմ գտել: Աշխատող տղերք ենք, հետո հո իրանով չի, իրանից հետո օրեր կան», - ասաց Վարդան Ղուկասյանը:
Իսկ «վերջին ճակատամարտի» մասին վարչապետի դիտարկման մասին ասում է. - «Ես չգիտեմ, թե ինչ ճակատամարտի մասին է խոսքը: իր համար հավանական է, որովհետև եթե ինքը ստեղ պարտվում է, ինքը ամեն ինչ կորցնում է»:
Մեղադրանքը չի ընդունում նաև Սամվել Բալասանյանը: Անցած հոկտեմբերին նրա ու մտերիմների դեմ հարուցված վարույթից հետո Գյումրիի իշխող «Բալասանյան» դաշինքը առանց որևէ բացատրության հրաժարական տվեց, ինչի հետևանքով էլ ի վերջո երկրորդ քաղաքում արտահերթ ընտրություններ նշանակվեցին:
Սամվել Բալասանյանն այդ իրադարձություններից մոտ կես տարի անց առաջին անգամ է խախտում լռությունը, իր ծավալուն արձագանքում անգամ քաղաքական հայտարարություն է անում՝ գյումրեցիներին կոչ անելով՝ «մասնակցել արտահերթ ընտրություններին՝ մինուս մեկ ձևաչափով, և մերժելով ազգին սև ու սպիտակի բաժանած խմբակին և նրանց դրածոյին»:
Այս հայտարարության պատասխանն էլ չուշացավ: Թեև Բալասանյանն ու նրա մերձավորներն այս ընտրություններին չեն մասնակցում, բայց Գյումրիի ավագանու ՔՊ խմբակցության ղեկավար Քնարիկ Հարությունյանը պնդեց, թե Բալասանյանը ևս ընտրապայքարում է. - «Նույն ոճով, նույն սկզբունքներով և նույն նպատակներով, ինչպես այս ընտրություններին սեփական դեմքերով չմասնակցող նախկին նախագահները»:
Իսկ Վարդան Ղուկասյանը դիմեց Գյումվրա հին առածի օգնությանը. - «Ինչ բրդես չանխդ, դեմ գուկա գդալդ: Ինչ արել ես, քո դեմը պիտի Աստված բրի անպայման»:
