Ազգային ժողովի նախագահը հստակ քայլեր է ակնկալում ԱՄՆ-ը նոր վարչակազմից՝ Բաքվում պահվող հայ ռազմագերիների ազատ արձակման համար:
Ալեն Սիմոնյանն այսօր նաև այդ քայլերը նախանշեց, հույս հայտնելով, թե ԱՄՆ նախագահի ազգային անվտանգության գծով խորհրդական Մայք Ուոլցի հայտարարությունը սոսկ հայտարարություն չի մնա:
Ադրբեջանի նախագահի խորհրդական Հիքմեթ Հաջիևի հետ զրույցում Մայք Ուոլցը ասել էր, որ պետք է վերջնականացնել խաղաղության գործարքը, ազատ արձակել բանտարկյալներին և միասին աշխատել տարածաշրջանն ավելի անվտանգ և բարգավաճ դարձնելու ուղղությամբ:
«Հուսանք, որ այդ հայտարարությանը կհետևեն հստակ քայլեր և դա ուղղակի հայտարարություն չի լինի հայտարարության համար։ Թող զանգեն, պայմանավորվեն՝ ոնց են մեր գերիներին, մեր մարդկանց հետ տալիս, բոլորին անխտիր՝ անկախ, որ ժամանակ են գերեվարվել», - ասաց ԱԺ նախագահը։
«Մենք շատ ենք կարևորում, որ Ուոլցը հատուկ նշել է բանտարկյալների ազատման մասին»
Մինչ Ազգային ժողով նախագահը ԱՄՆ-ից հստակ քայլեր է սպասում, իշխող «Քաղաքացիական պայմանագրի» վարչության մեկ այլ անդամ Արսեն Թորոսյանը դրական և կարևոր է գնահատում խաղաղության պայմանագիրը ավարտին հասցնելու և բանտարկյալներին ազատ արձակելու մասին ԱՄՆ նախագահի ազգային անվտանգության գծով խորհրդական Մայք Ուոլցի հայտարարությունը:
«Մենք շատ ենք կարևորում, որ Մայք Ուոլցը հատուկ նշել է բանտարկյալների ազատ արձակման մասին՝ շարունակելով նախադասությունը, որ պետք է խաղաղության գործարքը վերջնականացվի, ազատվեն բանտարկյալները և աշխատենք միասին ավելի ապահով ու ավելի բարգավաճ ռեգիոն ունենալու համար: Սա ուղղակիորեն այն է, ինչ որ մենք ենք ասում և մեր խորին համոզմամբ մեր հայրենակիցներին տուն վերադարձնելու բանալին խաղաղության պայմանագիրը կնքելու և այն իրագործելու մեջ է», - ասաց Թորոսյանը:
Բաքվի բանտում պահվող 23 հայ ռազմագերներից Ռուբեն Վարդանյանի ամերիկացի փաստաբան Ջարեդ Գենսերը նույնպես արձագանքել է ԱՄՆ-ը վարչակազմի բարձրաստիճան պաշտնյայի կոչին։
«Հարգելի՛ Հայաստանի վարչապետ Նիկոլ Փաշինյան և արտգործնախարար Արարատ Միրզոյան, խնդրում եմ կարդացեք ԱՄՆ անվտանգության գծով խորհրդական Մայք Ուոլցի հայտարարությունը: Նա ընդգծել է ոչ միայն խաղաղության պայմանագիրն ամբողջացնելու, այլև հայ, քրիստոնյա գերիներին ազատ արձակելու անհրաժեշտությունը: Ես հավատում եմ, որ դուք ամբողջությամբ համաձայն եք Թրամփի վարչակազմի այս առանցքային մոտեցման հետ», - գրել է Գենսերը:
Ավելի վաղ, Ռուբեն Վարդանյանի փաստաբանն ընդգծել էր, որ Հայաստանի վարչապետն ու իշխանությունը տարրական քայլեր անգամ չեն ձեռնարկել Բաքվի բանտերում պահվող հայ ռազմագերիների համար:
ՔՊ պատգամավոր Արսեն Թորոսյանը, չցանկանալով այս պահին հակադարձել փաստաբանի մեղադրանքներին, վստահեցնում է՝ իշխանությունը շարունակական ջանքեր է գործադրել Բաքվում պահվող հայ ռազմագերիներին ազատ արձակելու համար, և կարծում է, որ եթե Հայաստանը և Ադրբեջանն ի վերջո ստորագրեն խաղաղության պայմանագիրը և սկսեն խաղաղության հաստատման երկարատև և դժվար գործընթացը, ամենևին իմաստ չի լինելու Ադրբեջանում ունենալ գերեվարված հայեր:
«Ես էդտեղ եմ տեսնում մեր հայրենակիցներին տուն բերելու բանալին, այլ բանալի ես չեմ տեսնում, ինչքան էլ որ դա լինի ցավալի», - ասաց Թորոսյանը։
«Մենք պատրաստ ենք խաղաղության պայմանագիրը ստորագրել հենց այսօր և ցանկացած տեղում»
Անդրադառնալով խաղաղության պայմանագիրը վերջնականացնելու մասին Մայք Ուոլցի հայտարարությանը՝ Թորոսյանը նշում է, թե այն «շատ տրամաբանական հայտարարությունն է՝ հաշվի առնելով ԱՄՆ-ի ներգրավվածությունը խաղաղության գործընթացում և, մասնավորապես, նախագահ Թրամփի մոտեցումները խաղաղության վերաբերյալ»:
ՔՊ պատգամավորը հիշեցնում է ՝ «Թրամփը թե՛ իր նախընտրական քարոզարշավի և թե՛ պաշտոնը ստանձնելուց հետո բազմիցս է խոսել աշխարհում խաղաղություն հաստատելու վերաբերյալ:
«Մենք նաև ջանքեր ենք գործադրել՝ մեր դիվանագիտական ներկայացուցչությունը ԱՄՆ-ում, վարչապետը, Արտաքին գործերի նախարարությունը, որպեսզի ԱՄՆ նոր վարչակազմին ներգրավված պահենք այս գործընթացում և, ըստ էության, մենք տեսնում ենք դրա արտահայտությունը, որը շատ կարևոր է», - «Ազատության» հետ զրույցում ասում է ՔՊ վարչության պատգամավորը:
Անկախ Ադրբեջանի կողմից խաղաղության գործընթացը ձգձգելու կամ տորպեդարհարելու միտմանը, որն արտացոլվում է սահմանային լարվածության մասին կեղծ տեղեկատվություն տարածելով՝ Արսեն Թորոսյանը նշում է, որ Հայաստանը պետք է շարունակի ջանքերը՝ գործընկերներին ներգրավելու հարցում:
Ըստ նրա՝ դրանով է պայմանավորված նաև Նիկոլ Փաշինյանի վերջին օրերին զանգերը Իրանի, Ռուսաստանի, Ֆրանսիայի ղեկավարներին: Վարչապետը գործընկերներին տեղեկացրել է, որ խաղաղության պայմանագիրը պատրաստ է՝ ակնկալելով, որ նրանց կողմից էլ կառուցողական ջանքեր կլինեն, որ այդ խաղաղության պայմանագիրն արագ ստորագրվի:
«Ադրբեջանի հետ էլ պետք է երկխոսությունը շարունակենք, ինչքան էլ որ նրանք լինեն դեստրուկտիվ, մենք դա նոր չէ, որ տեսնում ենք, այնուամենայնիվ, մենք նրանց հետ պետք է կնքենք այդ համաձայնագիրը», - ասաց Թորոսյանը:
Հնարավո՞ր է, որ խաղաղության պայմանագիր ստորագրվի հենց Վաշինգտոնում, Արսեն Թորոսյանն ասում է, թե չունի նման տեղեկատվություն, հատկապես, որ խաղաղության պայմանագրի ստորագրման տեղն ու ժամկետները համաձայնեցված չեն:
Սակայն Թորոսյանն ավելի իմաստավոր է համարում, եթե այդ ստորագրությունը տեղի ունենա հայ-ադրբեջանական սահմանի որևէ կետում, որովհետև Հայաստանն ու Ադրբեջանի միասին պետք է ապրեն այս տարածաշրջանում:
«Մենք պատրաստ ենք խաղաղության պայմանագիրը ստորագրել հենց այսօր և ցանկացած տեղում, և մեր ջանքերը պետք է միտված լինեն Ադրբեջանին, ըստ էության, սեղանի շուրջ բերելու ուղղությամբ», - ընդգծեց ՔՊ պատգամավորը:
Առայժմ հայտնի չէ, թե երբ և որտեղ կարող է ստորագրվել խաղաղության պայմանագիրը: Օրերս Հայաստանի արտգործնախարար Արարատ Միրզոյանն ասաց, թե առաջիկայում Հայաստանի և Ադրբեջանի ղեկավարների հնարավոր հանդիպման մասին որևէ պայմանավորվածություն չկա:
