«Մենք առաջարկել ենք լուծում և հույս ունենք, որ Ադրբեջանը դրական կարձագանքի»
Վարչապետ Նիկոլ Փաշինյանը հայտարարում է՝ ապաշրջափակման այն պայմանները, որոնք Երևանն առաջարկել է Բաքվին, պետք է գործեն փոխադարձության սկզբունքով: Փաշինյանը երեկ առանց բովանդակությունը գաղտնազերծելու պնդեց, թե դա ավելին է, քան առաջարկը: Առաջին փուլով հայկական կողմը փորձում է հասնել երկաթուղային բեռնափոխադրումները վերականգնելուն:
«Մենք առաջարկել ենք լուծում և հույս ունենք, որ Ադրբեջանը դրական կարձագանքի այդ լուծմանը: Ես շատ վերլուծում եմ և ուզում եմ հասկանալ՝ իսկ ինչո՞ւ պետք է Ադրբեջանը բացասական արձագանքի մեր այդ լուծման առաջարկին: Մի քիչ չեմ վերապահի ինձ Ադրբեջանի փոխարեն պատասխանել, բայց օբյեկտիվ վերլուծությունը ցույց է տալիս, որ դա մերժելու հիմքեր ուղղակի չկան», - լրագրողներին ասաց նա:
Երևանն ու Բաքուն չորրորդ տարին է՝ բանակցում են տարածաշրջանային հաղորդակցությունների բացման շուրջ, բայց համաձայնության չեն հասնում: Ադրբեջանի պահանջն այս տարիներին չի փոխվել՝ առանց ստուգումների անխոչընդոտ ճանապարհ դեպի Նախիջևան:
Բաքվին առաջարկված տարբերակը, ըստ Փաշինյանի, համապատասխանում է երկու կողմերի պատկերացումներին: Սա արդյո՞ք նշանակում է, որ հայկական կողմը Ադրբեջանին պատրաստ է տրամադրել առանց ստուգումների ճանապարհ, վարչապետն ի պատասխան՝ նախ հիշեցրեց փոխադարձության մասին, ապա հավելեց. «Հայաստանի Հանրապետությունը երբեք, ոչ մի անգամ, ոչ մի տեղ, ոչ մի փաստաթղթով, ոչ գրավոր, ոչ բանավոր չի պարտավորվել, չի համաձայնվել, չի ընդունել, որ տարածաշրջանային ապաշրջափակման համատեքստում Հայաստանի ինքնիշխանությունը, իրավազորությունը, տարածքային ամբողջականությունը որևէ ձևով կարող է նսեմացվել կամ որևէ ձևով կարող է սահմանափակվել»:
Նիկոլ Փաշինյանը երեկ մանրամասնեց՝ այն պայմանները, որ Իրանն է իր տարածքով տրամադրում Ադրբեջանին, նույնը պատրաստ է անել նաև Հայաստանը, ավելին՝ հայկական կողմը պարզեցումների էլ պատրաստ է. «Որովհետև նույն սկզբունքով մենք նույնպես խնդիր ունենք Երասխից Մեղրի երկաթուղային հաղորդակցություն ապահովել և փոխադարձության սկզբունքով պատրաստ ենք», - նշեց նա:
Հարցին, թե Բաքվի համար այս սկզբունքն ընդունելի՞ է, վարչապետը պատասխանեց, որ սպասում են պաշտոնական պատասխանի:
Ըստ Գեղամ Մանուկյանի՝ Բաքուն փոխադարձության սկզբունքը չի ընդունի
Ընդդիմադիր պատգամավոր Գեղամ Մանուկյանի գնահատմամբ՝ Երևանն ինչ էլ առաջարկի, Բաքուն փոխադարձության սկզբունքը չի ընդունի և այսպես կոչված «Զանգեզուրի միջանցքի» պահանջից չի հրաժարվի: Ըստ Մանուկյանի՝ դա է փաստում նաև հայկական առաջարկների վերաբերյալ Ադրբեջանի արտգործնախարարության գնահատականը, թե դրանք «գործնական նշանակություն չունեն»:
«Նույն այս տարիներին՝ նոյեմբերի 9-ի փաստաթղթի ստորագրումից հետո բոլոր կոմունիկացիաների բացումը, ի վերջո, Հայաստան-Ադրբեջան բանակցություններում վերածվեց Մեղրիով ճանապարհի հարցի քննարկման, և ոչ թե Ղազախով երկաթուղու բացումն էր, որևէ այլ ճանապարհի բացումն էր, ամբողջը տեղափոխվեց Մեղրիի այդ երկաթուղու 41-42 կիլոմետրանոց հատվածի շահագործում, որի մասին այսօր շատ ակտիվ թուրքերն էլ են խոսում», - ասաց Գեղամ Մանուկյանը:
Դաշնակցական պատգամավորի կարծիքով՝ իշխանությունը ձախողել է տարածաշրջանային ապաշրջափակման օրակարգը՝ քննարկելով միայն ապաշրջափակման կոնկրետ ուղղություն: Նիկոլ Փաշինյանը երեկ նշեց՝ փուլերով առաջ կգնան, երկու երկրներն էլ հնարավորություն կունենան միմյանց տարածքներն օգտագործել միջազգային բեռնափոխադրումների համար: Բայց ընդդիմադիր պատգամավորը թե այս, թե ամբողջ հայ-ադրբեջանական բանակցային գործընթացը համարում է տապալված:
«Այս ամբողջը լոկ իմիտացիա է մեկ բանի համար՝ 21 թվականին մուրճը ձեռքին խաղաղություն էր քարոզում, 25 թվականին չի ստացել այդ խաղաղությունը Հայաստանի Հանրապետությունը, և հիմա ուղղակի բառախաղերով պետք է տպավորություն ստեղծի, որ խաղաղություն է ստացել», - շեշտեց նա:
Վարչապետը երեկ նաև տեղեկացրեց, որ ստացել են խաղաղության պայմանագրի 12-րդ խմբագրումը: Չհամաձայնեցված երկու կետերի վերաբերյալ Երևանն առաջարկներ էր արել, Նիկոլ Փաշինյանի փոխանցմամբ՝ դրանք մնում են չհամաձայնեցված:
