ԱՄՆ նախագահ Դոնալդ Թրամփի վարչակազմն, ամենայն հավանականությամբ, պատժամիջոցներ կկիրառի Ռուսաստանի դեմ, եթե Ռուսաստանի նախագահ Վլադիմիր Պուտինը հրաժարվի Ուկրաինայի հարցով բանակցություններից, հաղորդում է Reuters-ը՝ նշելով, որ նախօրեին Թրամփն է նման հայտարարություն արել։
Հնարավոր լրացուցիչ պատժամիջոցների մասին Թրամփը մանրամասներ չի ներկայացրել։ Միացյալ Նահանգները միշտ էլ պատժամիջոցներ է սահմանել Ռուսաստանի դեմ Ուկրաինա ներխուժելուց (2022 թվականի փետրվար) ի վեր։
ԱՄՆ նախագահը միևնույն ժամանակ ասել է, որ դիտարկում են Ուկրաինային զենք վաճառելու հնարավորությունը՝ ընդգծելով՝ իր կարծիքով Եվրամիությունը պետք է ավելի շատ օգնություն ցուցաբերի Ուկրաինային։
«Մենք խոսում ենք Վլադիմիր Զելենսկու հետ և շատ շուտով կխոսենք նախագահ Պուտինի հետ»,- ասել է Դոնալդ Թրամփը։
Նախագահի պաշտոնը ստանձնելուց մի քանի ժամ անց, պատասխանելով լրագրողների հարցերին, Դոնալդ Թրամփն ասել էր, որ Վլադիմիր Պուտինը կործանում է Ռուսաստանը, որ Ռուսաստանը թուլացել է Ուկրաինա ներխուժման հետևանքով և որ Պուտինի գործերն այնքան էլ լավ չեն։
Ըստ արևմտյան մեկնաբանների՝ սրանք Պուտինի հասցեին Թրամփի ամենաուժեղ քննադատական հայտարարություններն էին։
