Սահմանամերձ դարձած Խոզնավարի (Սյունիքի մարզ) բնակիչներն արդեն անգիր գիտեն ժամերը, երբ գյուղին կպած ադրբեջանական դիրքերից կրակում են: Այս գիշերը ևս խաղաղ չի եղել, պատմեց խոզնավարցի Ռոման Գրիգորյանն ու նշեց՝ վնասներ այս պահին չեն արձանագրել, գուցե և հաջորդ օրերին դրանք ի հայտ գան:
«Սովորական է դարձել, նույն ձևի կրակում են էլի: {Այս գիշեր} ժամը 22:30, 00:30, 2:30, 4:30 տենց կրակում են», - ասաց նա, - «Մարդը կարող է պատահաբար ելնել տանիք, տեսնի՝ ընկած է փամփուշտը»:
Ապրիլի 19-ի լույս 20-ի գիշերն, ի տարբերություն այս գիշերվա, ծանր էր հատկապես Կարինե Հակոբջանյանի ընտանիքի համար: Ադրբեջանական կրակոցները վնասել են նրանց տան տանիքին տեղադրված ջրատաքացուցիչը:
7 հոգանոց ընտանիքի երեք երեխաները բարեբախտաբար քնած են եղել, ոչինչ չեն լսել, բայց տան տիկինն արթուն էր: «Ազատության» հետ զրույցում ասաց. «Եթե 2 մետր իջներ ներքև, սենյակին էր դիպչելու»:
Ընտանիքի կրած վնասին մոտիկից ծանոթացել են տարածքում դիտորդություն անող եվրոպացիները: Կարինե Հակոբջանյանը ցույց է տվել վնասված ու անպիտան դարձած ջրատաքացուցիչը:
Պաշտպանության նախարարությունն այս գիշերվա կրակոցների մասին պաշտոնական տեղեկատվություն չի տարածել: Անցած մեկ ամսում ռազմական գերատեսչությունը երեք անգամ է անդրադարձել ադրբեջանական կրակոցներին, ընդ որում՝ այն ժամանակ, երբ դրանք վնասել են որևէ շինություն, որոնցից մեկն էլ վնասված ջրատաքացուցիչի մասին էր: Մյուս դեպքերում կրակոցները համարվել են ոչ թիրախային: Ռազմական կառույցը հայկական կողմի ուղղությամբ կրակոցների մասին չհայտնեց նաև այն բանից հետո, երբ ադրբեջանական կողմն օրերս ուղիղ հայտարարեց՝ պատասխան կրակ է բացել Սյունիքում տեղակայված հայկական դիրքերի ուղղությամբ:
Խոզնավարի մասին հաղորդագրություն տարածել է նաև հայ - ադրբեջանական սահմանին դիտորդություն անող Եվրամիության առաքելությունը՝ ենթադրելով, որ կրակոցներն ադրբեջանական կողմից են. «Խոզնավարում ԵՄ դիտորդական առաքելությունը նկատել է երկու կրակոցների հետևանքները, որոնք վնասել են քաղաքացիական ենթակառուցվածքը. [կրակոցները] հնարավոր է՝ արձակվել են տեղանքում առկա ադրբեջանական դիրքերից»:
Պատերազմի հավանականությունը որևիցե ձևով, քայլով չի ավելացվելու. ԱԺ նախագահ
Չնայած ադրբեջանական կրակոցները մեկ ամիս է չեն դադարում, խորհրդարանի խոսնակ Ալեն Սիմոնյանը համարում է, որ պատերազմի հավանականությունը չի մեծացել ու մեծանալու, հայ-ադրբեջանական բանակցություններն էլ փակուղում չեն:
«Բանակցությունները փակուղում չեն հայտնվելու, և պատերազմի հավանականությունը որևիցե ձևով, որևիցե քայլով չի ավելացվելու», - ասաց նա:
Կողմերն ավելի քան մեկ ամիս առաջ են համաձայնեցրել խաղաղության պայմանագրի տեքստը, սակայն Բաքուն հրաժարվում է ստորագրել փաստաթուղթը, քանի դեռ չի փոխվել Հայաստանի Սահմանադրությունն, ու չի լուծարվել Մինսկի խումբը: Եթե Ադրբեջանը խաղաղություն հաստատելու նպատակ ունի, ինչո՞ւ է, այնուամենայնիվ, կրակում: Ալեն Սիմոնյանն ասում է. «Բացատրությունը նա է, որ մենք պետք է ամեն ինչ անենք, որ մեր օրակարգը, որը խաղաղությունն է, իրականություն դառնա: Թե այնտեղ կրակեցին, չկրակեցին, այո, դրանք բաներ են, որոնց մենք ուշադրություն ենք դարձնում, հետևություններ ենք անում, բայց մեր նպատակը արդեն ասացի»:
Արդյո՞ք մտավախություն չկա, որ, այնուամենայնիվ, կարող է էսկալացիա առաջանալ, ԱԺ նախագահը պատասխանեց. «Կարող է ոչ մի կրակոց չլինի, և էսկալացիա լինի, և դրանով չի պայմանավորված. կա հիմնական պրոցես, այդ հիմնական պրոցեսին հետևելով և այդ հիմնական պրոցեսը տանելով է, որ դու կանխում կամ կանխատեսում ես նման բաներ: Մինչև 2018 թվականը բավականին շատ կրակոցներ են եղել, բայց պատերազմ չի եղել: Մինչև 2018թ. բազմաթիվ մահեր են եղել սահմանին, բազմաթիվ կրակոցների հետևանքով, բայց այլ իրավիճակ է եղել: Հիմա ունենք իրավիճակ, երբ որ կա համաձայնեցված փաստաթուղթ»:
Կարճ զրույց են ունեցել Սիմոնյանն ու Գաֆարովան
Խորհրդարանի խոսնակը նաև պատմեց, որ օրերս կարճ զրույց է ունեցել իր ադրբեջանցի պաշտոնակցի հետ: Ալեն Սիմոնյանն ու Սահիբա Գաֆարովան մասնակցում էին ԱՊՀ միջխորհրդարանական վեհաժողովին:
«Իմ տպավորությամբ՝ ես կարծում եմ, որ որևէ փակուղու մասին չի կարելի խոսել, և ադրբեջանական կողմին է ձեռք տալիս, որ գործընթացը հնարավորինս արագ ավարտին հասցվի, որով մենք զբաղվում ենք՝ անկախ նրանից, եթե նույնիսկ մեկ կրակոց էլ չլիներ, այդ նույն տրամաբանությունը», - նշեց Ալեն Սիմոնյանը:
Վերջին մեկ ամսվա ընթացքում Հայաստանի պաշտպանության նախարարությունն Ադրբեջանի մեղադրանքներին ի պատասխան գրեթե ամեն օր հիշեցրել է հրադադարի խախտման հետաքննության համատեղ մեխանիզմ ստեղծելու՝ Երևանի առաջարկը, որին Բաքուն որևէ կերպ չի արձագանքում:
