Հայաստանի նախագահ Արմեն Սարգսյանը առարկություններով վերադարձրել է Հայաստանի Զինված ուժերի գլխավոր շտաբի պետ Օնիկ Գասպարյանին պաշտոնից ազատելու հրամանագրի նախագիծը։
Այդ կապակցությամբ նախագահը հանդես է եկել հայտարարությամբ, որում ասված է․
«2021թ. փետրվարի 25-ին Հանրապետության նախագահին է ներկայացվել ՀՀ զինված ուժերի գլխավոր շտաբի պետ, գեներալ-գնդապետ Օնիկ Գասպարյանին պաշտոնից ազատելու վերաբերյալ առաջարկությունը՝ համապատասխան հրամանագրի նախագծով:
Առաջարկության կապակցությամբ Հանրապետության նախագահը խորհրդատվություններ և հանդիպումներ է ունեցել իշխանության ներկայացուցիչների, խորհրդարանական և արտախորհրդարանական ուժերի, զինված ուժերի բարձրագույն հրամանատարական կազմի հետ:
Հրամանագրի նախագիծն ուսումնասիրվել է Հանրապետության նախագահի աշխատակազմում, ամենայն մանրամասնությամբ քննարկվել է առաջատար իրավաբանների և անկախ փորձագետների հետ:
Իրավաբանների և փորձագետների տեսակետներն ամփոփելով՝ կարելի է եզրակացնել, որ հրամանագրի նախագիծն առերևույթ հակասում է Սահմանադրությանը:
Մեկ անգամ ևս շեշտում ենք, որ Հանրապետության նախագահը չի պաշտպանում որևէ քաղաքական ուժի և որոշումները կայացնում է՝ առաջնորդվելով բացառապես համապետական և համազգային շահերով:
Անվիճելի է, որ զինված ուժերը քաղաքական հարցերում պետք է պահպանեն չեզոքություն:
Ակնհայտ է նաև, որ պատերազմով պայմանավորված՝ զինված ուժերի անձնակազմն այսօր ավելի քան երբևէ բոլորիս աջակցության և ուշադրության կարիքն ունի: Բանակի և անձնակազմի խնդիրների լուծումն առաջնային է և չի կարող որևէ պարագայում անտեսվել:
Ստեղծված իրավիճակն աննախադեպ է, պահանջում է համակարգային և համապարփակ լուծումներ և չի կարող կարգավորվել կադրային հաճախակի փոփոխությունների միջոցով՝ առանց հաշվի առնելու երկրում առկա վիճակը:
Հիշեցնում ենք, որ հրամանագրի նախագիծը Հանրապետության նախագահին է ներկայացվել զինված ուժերի գլխավոր շտաբի պետի և գլխավոր շտաբի ավելի քան չորս տասնյակ բարձրաստիճան զինվորական պաշտոնյաների հայտարարությունից հետո, ռազմական դրության իրավիճակում, քաղաքական ճգնաժամի և անվտանգային լուրջ մարտահրավերների առկայության պայմաններում:
Հանրապետության նախագահը, իր սահմանադրական լիազորությունների շրջանակում, առարկություններով վերադարձրել է հրամանագրի նախագիծը:
Հանրապետության նախագահը հետապնդում է մեկ նպատակ՝ երկիրը զերծ պահել սահմանադրական կարգին ու անվտանգությանը սպառնացող վտանգներից, ապահովել երկրի կայունությունը և զինված ուժերի բնականոն գործունեությունը»:
Սահմանադրագետ Վարդան Այվազյանը, «Ազատության» հետ զրույցում մեկնաբանելով նախագահի հայտարարությունը, մասնավորապես նշեց․ - «Սահմանադրականության հետ կապված հարցը հետևյալն է, որ Զինված ուժերի գլխավոր շտաբի պետին, որը միևնույն ժամանակ համարվում է բարձրագույն սպայական կոչում ունեցող զինծառայող, մենք ունենք օրենք՝ «Զինվորական ծառայության և զինծառայողի կարգավիճակի մասին», և այդ օրենքը սպառիչ կերպով թվարկում է այն հիմքերը, որոնց առկայության դեպքում կարելի է բարձրագույն սպայական կոչում ունեցող անձնակազմի ներկայացուցիչներին աշխատանքից ազատել, որոնց բոլորին վարչապետի առաջարկությամբ նշանակում է հանրապետության նախագահը, հիմա, նախատեսված օրենքով որևէ հիմք չկա, և ստացվում է, որ առանց հիմք պաշտոնից ազատելը արդեն դառնում է Սահմանադրության 57-րդ հոդվածին հակասող, հակասահմանադրական։ Դա է հիմքը, որ ազատման կոնկրետ հիմքերը կան, և այդ օրենքի վրա հղում է կատարում Սահմանադրությունը, որ դա կարգավորվում է այդ օրենքով, իսկ այդ հիմքերը բացակայում են։ Առանց հիմքի մարդուն աշխատանքից ազատելը բա հակասահմանադրական չի՞»։
«Առարկությունները գնաց վարչապետի մոտ, նույն օրենքով, որը ես մատնանշեցի, վարչապետը հինգ օրվա ընթացքում կա՛մ պետք է պնդի իր առաջարկությունը, կա՛մ հրաժարվի առաջարկությունից։ Եթե պնդեց առաջարկությունը, նախագահը ստանալուց հետո երեք օրվա ընթացքում պետք է դիմի Սահմանադական դատարան, Սահմանադրական դատարանն էլ նախագահի դիմումը ստանալուց հետո 10 օրվա ընթացքում պետք է վերջնական որոշում կայացնի սահմանադրականության վերաբերյալ», - հետագա հնարավոր զարգացումների մասին ասաց սահմանադրագետը։
Գլխավոր շտաբի պետին պաշտոնից ազատելու առաջարկությունը նախագահին է ներկայացրել վարչապետ Նիկոլ Փաշինյանը փետրվարի 25-ին, երբ առավոտյան հրապարակվեց Զինված ուժերի անունից ԳՇ հայտարարությունը՝ վարչապետի և Կառավարության հրաժարականի պահանջով։ Վարչապետն այդ հայտարարությունը «ռազմական հեղաշրջման փորձ» որակեց։
Նույն օրը կայացած հանրահավաքում Փաշինյանը նաև հրաժարական տալու կոչ արեց Գասպարյանին։