Ілан Вайс — жыхар кібуца Беэры. Па дадзеных ЦАХАЛ, ён быў забіты яшчэ сёмага кастрычніка 2023 г. і вывезены баевікамі групоўкі ХАМАС (прызнана тэрарыстычнай арганізацыяй у ЗША і ЭЗ). На момант сьмерці яму было 55 гадоў. Яго жонка Шыры і дачка Нага былі таксама выкрадзеныя, але былі вернутыя дадому ў лістападзе 2023 года. Пасьля апазнаньня яго сям’ю апавясьцілі, што яго цела знойдзена.
«Працэс ідэнтыфікацыі яшчэ аднаго загінулага закладніка ў Нацыянальным цэнтры судовай мэдыцыны яшчэ працягваецца», — паведамілі ў ізраільскай арміі.
Вайна Ізраіля і ХАМАС пачалася сёмага кастрычніка 2023 года з масіраваных ракетных удараў узброеных груповак ХАМАС і «Ісламскі джыхад» (прызнаны тэрарыстычнымі арганізацыямі ў ЗША і ЭЗ) з сэктара Газа, заходу баевікоў на тэрыторыю краіны і захопу заложнікаў. У адказ Ізраіль пачаў наносіць масіраваныя авіяўдары па сэктары Газа, а позна ўвечары 27 кастрычніка зайшоў буйнымі сіламі на тэрыторыю паўночнай часткі сэктара.
У выніку вайны ў Ізраілі з сёмага кастрычніка загінулі 1200 чалавек, каля 800 з якіх — вайскоўцы. Больш за 250 чалавек былі захоплены баевікамі ХАМАС у якасьці заложнікаў. Паводле апошніх зьвестак, у палоне зараз застаюцца 48 чалавек. Некаторыя з іх былі завочна абвешчаныя памерлымі ізраільскімі ўладамі. У сэктары Газа, паводле зьвестак палестынскага боку, загінулі больш за 60 тысяч чалавек. ААН, Human Rights Watch, СААЗ, ізраільская праваабарончая арганізацыя «Бэцэлем» і іншыя лічаць гэтыя дадзеныя ў асноўным сапраўднымі, аднак улады Ізраіля і некаторыя амэрыканскія арганізацыі — Вашынгтонскі інстытут блізкаўсходняй палітыкі, Фонд абароны дэмакратый, Амэрыканскі інстытут прадпрымальніцтва — аспрэчваюць іх дакладнасьць.
Форум