У Беларусі зьявіўся новы турыстычны чыгуначны маршрут, які вядзе ў тым ліку па мясьцінах, зьвязаных з Аляксандрам Лукашэнкам, паведамілі ў прэс-службе Беларускай чыгункі.
Маршрут разьлічаны перадусім на расейскіх турыстаў. Яго распрацаваў турыстычны цэнтар «Дартур» БЧ сумесна з калегамі з «Расейскіх чыгунак» «для ўмацаваньня культурных сувязяў паміж краінамі».
Першыя госьці ўжо выпрабавалі новы кірунак. За два дні турысты з Масквы праехалі Гомель, Магілёў, Шклоў і Александрыю. Праграма прадугледжвала знаёмства зь мясцовымі славутасьцямі, гісторыяй, культурай і традыцыямі краіны, дэгустацыю страваў беларускай кухні.
У Гомлі расейцы наведалі палац Румянцавых-Паскевічаў, у Магілёве — катэдральны касьцёл Унебаўзяцьця Дзевы Марыі і сьвятога Станіслава, Сьвята-Мікольскі жаночы манастыр, мясцовы краязнаўчы музэй і Буйніцкае поле. А далей турыстаў павезьлі ў аграгарадок Александрыю, дзе яны наведалі Трафімаву крыніцу (названую так у гонар дзеда Лукашэнкі), а таксама школу, дзе вучыўся Аляксандар Лукашэнка.
Акрамя таго, падарожнікі пабывалі ў Копысі Аршанскага раёну, дзе Лукашэнка нарадзіўся.
У прэс-цэнтры БЧ заявілі, што паездка турыстам спадабалася, таму праект «Пэрліны Беларусі» будуць разьвіваць.
Форум