Сёмыя прэзыдэнцкія выбары не прынесьлі аслабленьня рэпрэсій. Наадварот, праваабаронцы адзначаюць пагаршэньні ў розных сфэрах чалавечага жыцьця ў Беларусі. І называюць сытуацыю з правамі чалавека стабільна цяжкай.
У Беларусі цяпер актыўна ідзе перагляд заканадаўства. Таму ў 2025—2026 годзе можна чакаць пашырэньня фармалізацыі падставаў для перасьледу ў сфэрах:
- адміністрацыйнай адказнасьці,
- працоўных адносінаў,
- аховы здароўя,
- адукацыі,
- культуры.
Праваабаронцы прагназуюць павышэньне рэпрэсіўнага ціску на работнікаў прыватнага сэктару эканомікі.
З студзеня павялічылася колькасьць адміністрацыйных парушэньняў, за якія бацькоў могуць дадаткова пакараць пастаноўкай сям’і на ўлік «сацыяльна небясьпечнага становішча». Сярод гэтых парушэньняў ёсьць і тыя, якія ўлады выкарыстоўваюць для палітычнага перасьледу:
- уцягненьне непаўналетніх ва ўдзел у несанкцыянаванай акцыі,
- выкарыстаньне забароненай сымболікі,
- захоўваньне ці распаўсюд экстрэмісцкай інфармацыйнай прадукцыі, а пад гэта можа трапіць нават лайк ці перапост.
З эканамічных пагаршэньняў праваабаронцы адзначылі пазбаўленьне права на дапамогу для тых беспрацоўных, хто ня мае 5 гадоў стажу.
А ў адукацыі зьвярнулі ўвагу на новыя абмежаваньні для рэпэтытараў, якім сярод іншага загадалі вучыць так, як прапісана ў дзяржаўных праграмах. Мэта гэтых абмежаваньняў — ва ўвядзеньні ідэалягічнага кантролю і за нефармальным навучаньнем, пішуць праваабаронцы.
Усё шырэй прымяняецца артыкул «здрада дзяржаве». Прычым здрадай у вачах рэпрэсіўнай машыны становяцца нават сацыялягічныя апытаньні. У 2022 асуджаных паводле гэтага артыкулу было 12, у лютым 2024 — 55, у лістападзе 2024 — 88.
У 2025 годзе ўлады закрылі публічны доступ да электроннага раскладу судовых рашэньняў. У выніку праваабаронцы страцілі практычна ўсе афіцыйныя крыніцы інфармацыі для маніторынгу палітычнага перасьледу ў краіне.
Форум