Паводле зьвестак Дзяржаўнай выбарчай камісіі Польшчы, Караль Наўроцкі абраны новым прэзыдэнтам краіны. Ён набраў 50,89% галасоў, ягоны супернік у другім туры выбараў Рафал Тшаскоўскі — 49,11%.
Яўка ў другім туры склала 71,63%.
Перамогу Наўроцкага прадказала таксама late poll — позьняе сацыялягічнае апытаньне, згодна зь якім ён атрымліваў 51 працэнт галасоў у другім туры прэзыдэнцкіх выбараў, а Рафал Тшаскоўскі — 49 працэнтаў. Такія зьвесткі давала кампанія Ipsos для TVN24, TVP і Polsat News, у ім улічваліся вынікі з 90 працэнтаў камісіяў, паведаміла агенцтва PAP.
Экзыт-пол а 21-й гадзіне 1 чэрвеня мінімальную перавагу даваў Тшаскоўскаму.
Яўка выбарнікаў у другім туры ацэньваецца ў 71,7 працэнта.
У першым туры выбараў Тшаскоўскі набраў 31,36 працэнта галасоў, а Наўроцкі — 29,54 працэнта.
- Прэзыдэнт Польшчы абіраецца на пяць гадоў, уплывае на замежную палітыку, прызначае ўрад і мае статус галоўнага вайскавода. Кіраўнік выканаўчай улады ў Польшчы — прэмʼер-міністар.
- Караль Наўроцкі працуе дырэктарам Інстытуту нацыянальнай памяці Польшчы. Наўроцкага падтрымліваюць Ярослаў Качыньскі і ягоная партыя «Права і справядлівасьць», але афіцыйна на выбарах Наўроцкі рэпрэзэнтаваў сам сябе.
- Рафал Тшаскоўскі — мэр Варшавы, кандыдат ад партыі «Грамадзянская плятформа», якая ўваходзіць ува ўрадавую кааліцыю, яго актыўна падтрымліваў прэм’ер Дональд Туск.
Форум