Лукашэнка паляцеў зь візытам у Кітай, сустрэнецца зь Сі Цзіньпінам

Лукашэнка «зьдзейсьніць візыт у Кітайскую Народную Рэспубліку 2–4 чэрвеня», паведаміла яго адміністрацыя.

Лукашэнка правядзе «традыцыйную сяброўскую сямейную сустрэчу з кіраўніком КНР», гаворыцца ў паведамленьні.

Сустрэча адбудзецца «спачатку ў фармаце „сам-насам“, а затым у нефармальнай абстаноўцы. Аляксандр Лукашэнка і Сі Цзіньпін плянуюць абмеркаваць стан і пэрспэктывы адносін паміж Беларусьсю і Кітаем», — гаворыцца ў паведамленьні.

Лукашэнка апошні раз наведваў Кітай у сьнежні 2023 году.

23 траўня адзін з кіраўнікоў ураду Кітаю, віцэ-прэм’ер Лю Гочжун пабываў зь візытам у Беларусі і сустракаўся з Лукашэнкам.

Лукашэнка тады заявіў, што Беларусь — надзейны сябра Кітаю і кітайскага народу:

«Ня толькі таму, што гэта складаны час і ён ня просты для нашай эканомікі найперш. А таму, што мы з вамі ўжо ня першае дзесяцігодзьдзе выстройваем адкрытыя сяброўскія стасункі».

ГЛЯДЗІЦЕ ТАКСАМА:

Адзін з кіраўнікоў ураду Кітая прыбыў зь візытам у Беларусь. Лукашэнка назваў яго «надзейным сябрам»