Прэзыдэнт ЗША Дональд Трамп пасьля сэрыі сьмяротных нападаў Расеі на Ўкраіну заявіў, што расейскі прэзыдэнт Уладзімір Пуцін «абсалютна зварʼяцеў» і папярэдзіў, што калі ён паспрабуе заваяваць усю Ўкраіну, гэта прывядзе да «падзеньня» Расеі.
«У мяне заўсёды былі вельмі добрыя адносіны з Уладзімірам Пуціным, але з ім нешта здарылася. Ён абсалютна ЗВАРʼЯЦЕЎ!» — напісаў Трамп у сваёй сацыяльнай сетцы позна ўвечары 25 траўня.
«Ён без патрэбы забівае шмат людзей, і я кажу ня толькі пра салдат. Ракеты і бесьпілётнікі запускаюцца па гарадах Украіны без якой-небудзь прычыны», — дадаў Трамп.
«Я заўсёды казаў, што ён хоча ЎСЮ Украіну, а ня толькі яе кавалак, і, магчыма, гэта аказваецца правільным, але калі ён гэта зробіць, гэта прывядзе да падзеньня Расеі!»
Публікацыя ў Truth Social зьявілася неўзабаве пасля таго, як Трамп раскрытыкаваў Пуціна ў падобных камэнтарах для журналістаў.
«Я незадаволены тым, што робіць Пуцін. Ён забівае шмат людзей, і я ня ведаю, што, чорт вазьмі, здарылася з Пуціным», — сказаў ён журналістам у Нью-Джэрсі, рыхтуючыся да вылету назад у Вашынгтон.
Пуцін «пасылае ракеты па гарадах і забівае людзей, і мне гэта зусім не падабаецца», — злосна сказаў Трамп на ўзлётна-пасадачнай паласе аэрапорта Морыстаўн.
«Мы якраз размаўляем, а ён страляе ракетамі па Кіеве і іншых гарадах. Мне гэта зусім не падабаецца, — сказаў Трамп. — Я зьдзіўлены. Вельмі зьдзіўлены. «Нешта здарылася з гэтым хлопцам — і мне гэта не падабаецца».
Аднак у сваім пазьнейшым паведамленьні ў сацыяльных сетках Трамп таксама дадаў рэзкую крытыку прэзыдэнта Ўкраіны Ўладзіміра Зяленскага, сказаўшы:
«Зяленскі ня робіць сваёй краіне ніякай ласкі, кажучы так, як ён кажа. Усё, што ён кажа, выклікае праблемы, мне гэта не падабаецца, і лепш гэта спыніць».
Паток камэнтароў зьявіўся пасля таго, як Зяленскі, у рэдкім публічным дакоры найважнейшага саюзніка Кіева, асудзіў тое, што ён назваў «маўчаньнем Амэрыкі» пасля таго, калі ў выніку расейскіх нападаў на выходных загінулі як мінімум 13 чалавек і дзясяткі іншых атрымалі раненьні.
Дональд Трамп заявіў, што «абавязкова» разгледзіць магчымасьць увядзеньня дадатковых санкцый супраць Расеі, каб прымусіць да прагрэсу ў мірных перамовах, хоць і не ўдакладніў дэталяў.
«Маўчаньне Амэрыкі, маўчаньне іншых у сьвеце толькі падбадзёрвае Пуціна», — напісаў Зяленскі ў сацыяльных сетках 25 траўня.
Празь некалькі гадзін пасьля заўваг Зяленскага і да камэнтароў Трампа пасланец ЗША Кіт Кэлаг назваў напады на Кіеў «ганебнымі» і заклікаў да спынення агню.
«Забойствы жанчын і дзяцей уначы ў іх дамах зьяўляюцца відавочным парушэннем Жэнэўскіх мірных пратаколаў 1977 года, прызначаных для абароны нявінных... Спыніце забойствы», — напісаў Кэлаг у сваім акаўнце X.
Украінскія чыноўнікі заявілі раніцай 26 траўня, што Расея пачала новую хвалю паветраных нападаў, але падрабязнасьці пакуль невядомыя.
Эўрапейскія саюзьнікі Ўкраіны працягваюць гучна асуджаць апошнія напады Расеі і заяўляць пра неабходнасьць падтрымліваць Кіеў.
«Учорашнія напады зноў паказваюць, што Расея імкнецца да большых пакут і зьнішчэньня Ўкраіны», — напісала ў сацыяльных сетках галоўны дыплямат ЭЗ Кая Калас.
Яна заклікала да «наймацнейшага міжнароднага ціску на Расею, каб спыніць гэтую вайну».
Як паведамляе камандаваньне ВПС Украіны, у ноч на нядзелю 25 траўня Расея выпусціла па Ўкраіне не менш як 69 ракет і 298 бесьпілётнікаў. З іх 45 ракет і 266 дронаў зьбілі.
Паводле апошніх звестак, у выніку абстрэлаў па ўсёй Украіне загінулі 13 чалавек, у іх ліку трое дзяцей, больш за 50 атрымалі раненьні.
У выніку масавага расейскага нападу на Кіеўскую вобласьць загінулі чатыры чалавекі, яшчэ 16 атрымалі раненьні, сярод пацярпелых — трое дзяцей. У самім Кіеве пацярпелі 11 чалавек, пашкоджаныя бізнэс-цэнтар і інтэрнат.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум