Дата дня
У ноч на 23 красавіка 1794 году Якуб Ясінскі, кіраўнік паўстаньня Касьцюшкі ў ВКЛ, узначаліў паўстаньне ў Вільні. Паўстанцы абяззброілі расейскі гарнізон, узяўшы ў палон 1012 чалавек
Паўстаньне ставіла мэтай скасаваньне першага і другога падзелаў Рэчы Паспалітай, якія адбыліся ў 1772 і 1793 гадах.
Таксама ў гэты дзень
1725 — нясьвіскі ардынат, вялікі гетман Міхал Казімер Радзівіл, празваны Рыбанькам, ажаніўся з Уршуляй Францішкай Вішнявецкай. Хранікёры пішуць, што гэта быў шчасьлівы зьвяз.
1838 — украінскі паэт Тарас Шаўчэнка піша паэму „Кацярына“. На беларускую мову яе перакладзе Янка Купала:
Кахайцеся, чарнабрыўкі,
Ды не з маскалямі,
Маскалі — чужыя людзі,
Чыняць ліха з вамі, —
так пачынаецца гэтая паэма.
1915 — падчас Першай сусьветнай вайны Нямеччына ўжыла хлёр як хімічную зброю супраць англа-францускіх войскаў паблізу гораду Іпр ў Бэльгіі.
1919 — польскія войскі, выбіўшы з гораду бальшавікоў, занялі Вільню.
У гэты дзень нарадзіліся
1724 — Імануіл Кант, нямецкі філёзаф.
1870 — Уладзімір Ульянаў (Ленін), расейскі камуністычны тэарэтык, арганізатар і кіраўнік Кастрычніцкай рэвалюцыі ў Расеі, першы кіраўнік Савецкай дзяржавы.
1899 — Уладзімір Набокаў, расейскі і амэрыканскі пісьменьнік.
1979 — Кацярына Сумарава, мастачка.
У памяці
1937 — падчас сталінскага тэрору скончыў жыцьцё самагубствам Язэп Адамовіч, адзін зь першых кіраўнікоў беларускага савецкага ўраду. Застрэліўся ў цягніку Ўладзівасток-Масква.
1954 — у Рызе памёр Сяргей Сахараў, фальклярыст, этнограф, царкоўны гісторык. Вязень ГУЛАГу.
2009 — Барыс Пянчук, вайсковы дырыгент.
2023 — памёр горадзенскі архіяпіскап Арцемі. Адзіны высокапастаўлены ярарх праваслаўнай царквы, які асудзіў гвалт рэжыму Лукашэнкі ў 2020.
