Першую прэмію за філязофскую рэфлексію над пошукамі нацыянальнай ідэнтычнасьці свайго пакаленьня ўручылі Сяргею Дубаўцу за кнігу «Занзібар. Сталеньне маладой душы».
Другую прэмію месца за фантасмагарычнае адлюстраваньне зрухаў у Беларусі і творчую стыпэндыю з магчымасьцю цягам месяца працаваць у Доме пісьменьніка на выспе ў Швэцыі атрымала Югася Каляда за кнігу «Перамена месцаў».
Трэцюю прэмію за гістарычнае асэнсаваньне атрымаў Зьміцер Дзядзенка за кнігу«Гульні Цырцэі. Раман».
Спэцыяльную прэмію — сэртыфікат на выданьне кнігі ў аўдыёфармаце — атрымала Югася Каляда зь яе кнігай «Перамена месцаў».
За літаратурную прэмію імя Ежы Гедройця сёлета змагаліся 6 твораў:
- «Гульні Цырцэі. Раман» — Зьміцер Дзядзенка;
- «Занзібар. Сталеньне маладой душы» — Сяргей Дубавец;
- «Перамена месцаў» — Югася Каляда;
- «Там, дзе няма цемнаты: Радыё Свабода» — Аляксандр Лукашук;
- «Раз на дваццаць пяць тысяч гадоў» — Анка Упала;
- «Забойства на вуліцы Макаёнка» — Клёк Штучны.
Усе фіналісты атрымалі ганаровыя дыплёмы ўдзельніка гэтага літаратурнага конкурсу.
У залі стаялі некалькі пустых крэслаў, як напамін пра зьняволеных людзей слова. Такім чынам арганізатары цырымоніі вырашылі ўшанаваць іх і забясьпечыць ім сымбалічную прысутнасьць на ўрачыстасьці.
У межах цырымоніі працаваў кніжны кірмаш і адбылося некалькі важных для беларускай літаратуры дыскусій — пра пераклады беларускіх кніг, якія выходзяць у польскіх выдавецтвах, альбо не выходзяць. Таксама плянавалі сустрэчы з удзельнікамі шорт-ліста.
Прэмія імя Ежы Гедройця — найбуйнейшая незалежная літаратурная прэмія Беларусі, якая ўручаецца штогод з 2012 году за найлепшую кнігу прозы ў папярэднім годзе на беларускай мове.
Арганізатарамі конкурсу прэміі зьяўляюцца Аб’яднаньне «Беларускі ПЭН», асацыяцыя «Міжнародны саюз беларускіх пісьменьнікаў», пры падтрымцы Амбасады Рэспублікі Польшча і Польскага Інстытуту ў Менску.
Мэты прэміі: вызначэньне найлепшых празаічных кніг на беларускай мове; ушанаваньне памяці Ежы Гедройця — публіцыста, палітыка, пасьлядоўнага прыхільніка добрасуседзкіх зносінаў паміж Польшчай і Беларусьсю, Літвой, Украінай; падтрымка актуальных беларускіх пісьменьнікаў, спрыяньне выхаду іх творчасьці на міжнародны ўзровень; спрыяньне паглыбленьню польска-беларускіх стасункаў у галіне культуры, папулярызацыя сучаснай беларускай літаратуры ў Беларусі і Польшчы.
Форум