У папраўчыя калёніі сталі пускаць на кароткатэрміновыя і працяглыя спатканьні людзей, якія жывуць у «грамадзянскім» шлюбе, даведаліся праваабаронцы «Вясны», паведамляе тэлеграм-канал MAYDAY TEAM.
Як удакладнілі Свабодзе самі праваабаронцы, яны зафіксавалі прынамсі 4 такія выпадкі па ўсёй Беларусі. Паводле зьвестак прааваабаронцаў, усе гэтыя выпадкі не датычыліся палітвязьняў.
Пакуль правабаронцы не знайшлі ў адкрытым доступе нарматыўна-прававых дакумэнтаў, якія афіцыйна зацьвярджалі б гэтую практыку, але ім вядомыя мэханізмы атрыманьня такіх дазволаў на спатканьне.
Каб атрымаць кароткатэрміновае ці доўгатэрміновае спатканьне, «грамадзянскаму» мужу ці жонцы трэба было зьвярнуцца да ўчастковага з заявай аб выдачы пацьверджаньня аб сумесным пражываньні людзей, не расьпісаных у ЗАГСе. Пасьля гэтага міліцыянт павінен наведаць месца жыхарства і пацьвердзіць факт сужыцьця. Напрыклад, у пары ёсьць агульныя дзеці. Пасьля гэтага даведку, падпісаную ўчастковым, высылаюць у адрас начальніка калёніі, а асуджаны піша хадайніцтва, каб «грамадзянскую жонку/мужа» ўнесьлі ў ягоную асабістую справу.
На думку праваабаронцаў, шмат што залежыць ад артыкулу, паводле якога вязень адбывае пакараньне, а таксама ад ягонай характарыстыкі. Шанцаў атрымаць спатканьне з палітвязьнем па-ранейшаму няшмат, лічаць праваабаронцы. Часта палітвязьні ня могуць атрымаць спатканьні і са сваімі жонкамі ці мужамі.
Раней «грамадзянскім» мужам і жонкам не дазвалялі бачыцца ў калёніі. На спатканьні пускалі толькі сваякоў, унесеных у асабістую справу асуджанага. Для гэтага яны павінны былі адправіць у калёнію копіі дакумэнтаў, якія пацьвярджаюць сваяцтва.
Форум