Аляксандар Лукашэнка прызначыў кіраўніком Віцебскага абласнога ўпраўленьня ўнутраных Максіма Суботу, які да гэтага прызначэньня працаваў намесьнікам начальніка ўпраўленьня ўнутраных справаў Берасьцейскага аблвыканкаму.
Як вынікае з адпаведных указаў Лукашэнкі, кіраўніка Віцебскага абласнога УУС Андрэя Любімава перавялі ў Менск на аналягічную пасаду.
Праваабаронцы лічаць абодвух палкоўнікаў міліцыі датычнымі да рэпрэсіяў і гвалту супраць удзельнікаў пратэсту ў 2020 годзе.
У прыватнасьці, Андрэй Любімаў асабіста ўдзельнічаў у сілавым разгоне пратэстаў з выкарыстаньнем фізычнага і псыхалягічнага гвалту. У 2018–2020 гадах ён працаваў першым намесьнікам начальніка галоўнага ўпраўленьня ўнутраных справаў Менскага гарвыканкаму, кіраўніком крымінальнай міліцыі сталіцы Беларусі.
Максіма Суботу лічаць адказным за гвалт над пратэстоўцамі, незаконныя затрыманьні і катаваньні ў ізалятарах і спартовых залях. У канцы 1990-х ён пачынаў працу ў крымінальным вышуку кобрынскай міліцыі, займаўся расьсьледаваньнямі злачынстваў у сфэры аўтамабільнага бізнэсу, потым узначаліў Кобрынскі РАУС. У 2015 годзе яго перавялі ў УУС Берасьцейскага аблвыканкаму, у траўні 2020 году падвысілі да ўзроўню намесьніка абласнога УУС.
Аляксандра Астрэйку, які кіраваў Менскім абласным УУС і ў часе пратэстаў 2020 году сьцьвярджаў, што затрыманых ня білі, а журналістаў не затрымлівалі, Лукашэнка прызначыў начальнікам Акадэміі МУС.
Пасада намесьніка кіраўніка ўпраўленьня ўнутраных справаў Берасьцейскага аблвыканкама пакуль засталася вакантнай.
Форум