Эўрапейскі парлямэнт на пасяджэньні 3 красавіка прыняў рэзалюцыю «Непасрэдная рызыка далейшых рэпрэсіяў з боку рэжыму Лукашэнкі ў Беларусі — пагрозы з боку Сьледчага камітэту».
За рэзалюцыю прагаласавалі 535 дэпутатаў Эўрапарлямэнту, супраць — 19, устрымаліся 55.
Прыняцьце рэзалюцыі ініцыяваў эўрапарлямэнтар ад Польшчы Міхал Кабоска, намесьнік старшыні дэлегацыі Эўрапарлямэнту па сувязях зь Беларусьсю, распавёў намесьнік кіраўніцы Аб’яднанага пераходнага кабінэта (АПК), кіраўнік «Народнага антыкрызіснага ўпраўленьня» (НАУ) Павал Латушка.
У тэксьце рэзалюцыі адзначаецца, што Эўрапарлямэнт «разглядае перасьлед грамадзян Беларусі за іх мірную дэмакратычную дзейнасьць за мяжой з дапамогай „спэцвядзеньняў“ Сьледчага камітэту як прамое парушэньне тэрытарыяльнага сувэрэнітэту дзяржаў-чальцоў Эўразьвязу», а таксама «заклікае да агульнаэўрапейскай прававой падтрымкі і абароны беларусаў у выгнаньні, у тым ліку тых, хто ня мае магчымасьці абнавіць дакумэнты, што сьведчаць асобу, і зазнае экстэрытарыяльны перасьлед.
- Эўрапарлямэнт у рэзалюцыі таксама «заклікае Міжнародны крымінальны суд паскорыць разьбіральніцтва па злачынствах супраць чалавечнасьці, учыненых рэжымам Лукашэнкі».
- У дакумэнце зьмяшчаецца заклік увесьці да прадстаўнікоў рэжыму «дадатковыя санкцыі, аналягічныя тым, якія прымяняюцца ў дачыненьні да Расеі, у прыватнасьці супраць службовых асобаў, адказных за транснацыянальныя рэпрэсіі».
- Апрача таго Эўрапарлямэнт «выказвае непахісную падтрымку беларускай дэмакратычнай супольнасьці ў выгнаньні, якая прадэманстравала інстытуцыйную ўстойлівасьць і эфектыўнасьць у павышэньні міжнароднай інфармаванасьці і абароне дэмакратычных каштоўнасьцяў;
- падкрэсьлівае неабходнасьць захоўваць пільнасьць да магчымых правакацый і актаў рэпрэсій, арганізаваных беларускім рэжымам у межах ЭЗ, асабліва ў супрацоўніцтве з расейскімі службамі бясьпекі;
- настойліва заклікае ЭЗ і яго дзяржавы-чальцы ўзмацніць падтрымку беларусаў у выгнаньні шляхам спрашчэньня працэдур легалізацыі і пражываньня ў краінах ЭЗ, падтрымкі незалежных беларускіх СМІ і захаваньня доступу да свабоднай інфармацыі, захаваньня культурнай, нацыянальнай і моўнай ідэнтычнасьці беларускай дыяспары».
21 сакавіка СК Беларусі паведаміў, што працягвае ідэнтыфікаваць і прыцягваць да адказнасьці «удзельнікаў вулічных акцый за мяжой» і што падазраванымі ў крымінальнай справе прызнаныя каля 400 удзельнікаў і арганізатараў «антыбеларускіх», праведзеных у дзень выбараў 26 студзеня 2025 году.
Паводле СК, па месцах іх рэгістрацыі і на аб’ектах уласнасьці правялі вобшукі, на маёмасьць і нерухомасьць накладаюць арышт «для наступнага забесьпячэньня кампэнсацыі прычыненай дзяржаве шкоды».
Таксама СК прыгразіў вызначыць усіх удзельнікаў замежных акцыяў да Дня волі 25 сакавіка.
Форум