Эўрапейскі суд пацьвердзіў законнасьць санкцый супраць Гуцэрыева ў сувязі з атрыманьнем выгады ад рэжыму Лукашэнкі

8 траўня Эўрапейскі суд пацьвердзіў законнасьць рашэньня суду агульнай юрысдыкцыі ЭЗ, прынятага ў верасьні 2023 году, пра мэтазгоднасьць санкцый Эўразьвязу супраць расейскага бізнэсоўца Міхаіла Гуцэрыева. Ягоная апэляцыя была адхіленая, піша «Позірк» з спасылкай на партал Global Sanctions.

У рашэньні суду найвышэйшай інстанцыі ЭЗ адзначаецца, што Гуцэрыеў атрымліваў выгаду ад рэжыму прэзыдэнта Лукашэнкі і падтрымліваў яго, будучы заўважным бізнэсоўцам у жорстка рэгуляваных і эканамічна значных калійным і энэргетычным сэктарах.

Эўрапейскі суд зазначыў, што «Гуцэрыеў ня меў рацыі, калі сьцьвярджаў, што ягонае ўключэньне ў сьпіс было абгрунтавана толькі мінулымі дзеяньнях»:

«Суд агульнай юрысдыкцыі пастанавіў, што Гуцэрыеў па-ранейшаму валодаў або кантраляваў адпаведныя кампаніі, якія сьведчаць пра атрыманьне выгады ад рэжыму / падтрымку рэжыму („Славкалий“, „Русснефть“, „Нефтиса“) на момант яго ўключэньня і знаходжаньня ў санкцыйным сьпісе», — гаворыцца ў судовай пастанове.

На дадатак Гуцэрыеў абавязаны кампэнсаваць судовыя выдаткі.

ГЛЯДЗІЦЕ ТАКСАМА:

Алігарх, зь якім Лукашэнка на «вы». Як Міхаіл Гуцэрыеў зблізіўся з кіраўніцтвам Беларусі і да чаго гэта прывяло

Гуцэрыеў трапіў пад санкцыі Эўразьвязу ў чэрвені 2021 году за тое, што

• ён даўні сябар Аляксандра Лукашэнкі, што дазволіла яму «займець значны капітал і ўплыў сярод палітычнай эліты Беларусі»,
• ён падтрымліваў Лукашэнку ў нафтавых спрэчках з Расіяй,
• ягоная расейская кампанія была адзінай, якая працягвала экспарт нафты на беларускія нафтаперапрацоўчыя заводы падчас энэргетычнага крызісу паміж Беларусьсю і Расіяй на пачатку 2020 году.
• ягоная кампанія «Славкалий» будавала прадпрыемства для вытворчасьці хлярыстага калію каля Любані ў Менскай вобласьці.
• Лукашэнка «падтрымаў Гуцэрыева пасьля таго, як супраць яго ў Расеі пачалі крымінальную справу»
• Лукашэнка «дзякаваў Гуцэрыеву за яго фінансавыя ахвяраваньні на дабрачыннасьць і шматмільярдныя інвэстыцыі ў Беларусь».

ГЛЯДЗІЦЕ ТАКСАМА:

Кіпр пазбавіў «залатых пашпартоў» Дзерыпаску, Гуцэрыева і іншых расейскіх алігархаў і іх сваякоў

Міхаіл Гуцэрыеў — набліжаны да Аляксандра Лукашэнкі расейскі бізнэсовец. Сярод бізнэс-інтарэсаў Гуцэрыева ў Беларусі — Мазырскі НПЗ, здабыча калійных угнаеньняў, гатэль «Рэнэсанс», рэзыдэнцыя «Краснасельскае».

Падарунак Лукашэнку ў выглядзе «Майбаха» ў 2012 годзе зьвязваюць менавіта зь імем Гуцэрыева. Бізнэс Міхаіла Гуцэрыева трапіў пад санкцыі ЭЗ яшчэ ў канцы чэрвеня 2021 году менавіта за супрацоўніцтва з Лукашэнкам.

З пачаткам вайны санкцыі супраць бізнэсоўца толькі ўзмацніліся: ён трапіў у санкцыйныя сьпісы Польшчы і Канады.

ГЛЯДЗІЦЕ ТАКСАМА:

Алігархі, сярод якіх Міхаіл Гуцэрыеў, пастаўляюць расейскаму войску наймітаў — расьсьледаваньне