За рэзалюцыю A/HRC/58/L.10 прагаласавалі 25 краін, 17 устрымаліся. Супраць выступілі пяць краін: Балівія, Бурундзі, Кітай, Куба і Віетнам.
Сярод іншага Рада правоў чалавека ААН вырашыла падоўжыць на год мандаты спэцыяльнага дакладчыка аб сытуацыі з правамі чалавека ў Беларусі і Групы незалежных экспэртаў у сытуацыі з правамі чалавека ў Беларусі яшчэ на год. Яна заклікала ўлады Беларусі наладзіць поўнае ўзаемадзеяньне з усімі праваабарончымі мэханізмамі ААН, у тым ліку з спэцыяльным дакладчыкам і Групай незалежных экспэртаў, даць ім усім свабодны і поўны доступ у краіну, надаваць ім неабходную інфармацыю.
Рада просіць Генэральнага сакратара і Высокага камісара ў правах чалавека ААН даваць спэцыяльнаму дакладчыку і Групе незалежных экспэртаў неабходную дапамогу і рэсурсы для выкананьня іхных мандатаў.
Новым дакладчыкам ААН у правах чалавека ў Беларусі зь лістапада 2024 году прызначылі Нілса Муйжніекса, латвійскага дыплямата і праваабаронцу.
Група незалежных экспэртаў у сытуацыі з правамі чалавека ў Беларусі была створаная Радай па правах чалавека ААН 4 красавіка 2024 года «на аднаўляемы пэрыяд у адзін год» для расьсьледаваньня і выяўленьня фактаў, абставін і карэнных прычын усіх меркаваных парушэньняў і ўшчамленьняў правоў чалавека і парушэньняў, учыненых у Беларусі з 1 траўня 2020 года, уключаючы іх гендэрная і ўзроставыя аспэкты і іх узьдзеяньне на ахвяр і ахвяр.
Склад групы быў вызначаны ў чэрвені 2024 года. У яе ўвайшлі дырэктар Міжнароднага праекта па правах жанчын Сьюзан Базыльлі (Канада), загадчыца катэдры крыміналёгіі юрыдычнага факультэта Варшаўскага ўнівэрсытэта Маніка Станіслава Платэк (Польшча) і юрыст-праваабаронца Карына Маскаленка (Расея; кіраўніца групы).
Група незалежных экспэртаў у сытуацыі з правамі чалавека ў Беларусі нядаўна апублікавала на сайце Лічбавай бібліятэкі ААН свой першы даклад.
У сваёй рэзалюцыі Рада правоў чалавека ААН:
- Рашуча асуджае маштабныя і сыстэматычныя парушэньні Беларусьсю міжнародных законаў аб правах чалавека, у тым ліку адвольнае пазбаўленьне права на жыцьцё і свабоду, масавыя незаконныя затрыманьні і арышты паводле палітычных матываў ці за ажыцьцяўленьне беларусамі сваіх правоў, гвалтоўныя зьнікненьні, катаваньні і іншыя жорсткія, бесчалавечныя або зьняважлівыя для годнасьці віды абыходжаньня і пакараньня, у тым ліку сэксуальны і гендэрны гвалт, адмову затрыманым у праве на справядлівы суд, няздольнасьць абараніць правы і інтарэсы дзіцяці ў Беларусі, парушэньні права на адукацыю і працу, адвольныя адмовы грамадзянам Беларусі ў праве на ўезд ва ўласную краіну і парушэньне правоў на свабоду выказваньня думак, мірных сходаў і асацыяцый і на роўную абарону законам, а таксама іншыя парушэньні правоў чалавека.
- Асуджае дзеяньні ўладаў Беларусі ў сувязі з прымусовй пасадкай самалёту Ryanair у траўні 2021 году і наступным затрыманьнем Рамана Пратасевіча і Соф’і Сапегі, «што ёсьць абуральным і сур’ёзным парушэньнем Канвэнцыі аб міжнароднай цывільнай авіяцыі».
- Настойліва заклікае ўлады Беларусі цалкам выконваць усе свае абавязаньні ў рамках міжнароднага права ў галіне правоў чалавека: неадкладна і безумоўна вызваліць і рэабілітаваць усіх палітычных вязьняў, спыніць ужываньне сілы, катаваньняў, іншых жорсткіх формаў абыходжаньня з пратэстоўцамі, надаваць зьняволеным належную мэдычную дапамогу, гарантаваць усім затрыманым асобам права на незалежнае расьсьледаваньне, справядлівы суд і доступ да незалежнай юрыдычнай дапамогі, скасаваць рашэньні аб прымусовым роспуску грамадзкіх аб’яднаньняў, забясьпечыць асяродзьдзе, якое спрыяе функцыянаваньню незалежных мэдыя і інш.
- Заклікае ўлады Беларусі аднавіць нацыянальны дыялёг аб скасаваньні сьмяротнага пакараньня і, у якасьці першага кроку, увесьці мараторый на яго ўжываньне,
- Заклікае Беларусь паўторна далучыцца да Канвэнцыі аб доступе да інфармацыі, удзеле грамадзкасьці ў працэсе прыняцьця рашэньняў і доступе да правасудзьдзя ў пытаньнях навакольнага асяродзьдзя.
Форум