Выканаўца абавязкаў генэральнага інспэктара Пэнтагону Стывэн Стэбінс абвясьціў аб пачатку расьсьледаваньня ў сувязі з выкарыстаньнем групавога чату ў мэсэнджары Signal, у якім міністар абароны Піт Гэґсэт зь іншымі службоўцамі абмяркоўвалі ўдары па емэнскіх хусітах.
Аб гэтым паведамляе Bloomberg.
Праверка павінна выявіць, у якой ступені Гэґсэт і іншыя супрацоўнікі Міністэрства абароны ЗША выконвалі «палітыку і працэдуры выкарыстаньня камэрцыйных мэсэнджараў для вядзеньня дзяржаўных справаў», гаворыцца ў мэмарандуме Стэбінса. Ён адзначае, што будзе вывучана «выкананьне патрабаваньняў да клясыфікацыі дадзеных і захоўваньні запісаў».
Раней было ўхваленае рашэньне, што адміністрацыя прэзыдэнта ЗША мусіць захаваць групавы чат у мэсэнджары Signal з абмеркаваньнем удараў па емэнскіх хусітах, у які памылкова ўключылі галоўнага рэдактара выданьня The Atlantic Джэфры Голдбэрга.
Такое рашэньне вынес судзьдзя акругі Калюмбія Джэймс Босбэрг. Пазоўнікам выступіла арганізацыя American Oversight, якая абвінаваціла адміністрацыю Трампа ў парушэньні закону аб захоўваньні інфармацыі.
Прэс-сакратарка Белага дому заявіла, што адміністрацыя Трампа выконвае і будзе выконваць законы аб захоўваньні запісаў.
Раней часопіс The Atlantic апублікаваў, як сьцьвярджаецца, поўны тэкст перапіскі высокапастаўленых амэрыканскіх службоўцаў у чаце Signal. Такое рашэньне рэдакцыя патлумачыла тым, што адміністрацыя Дональда Трампа адмаўляла наяўнасьць сакрэтнай інфармацыі ў гэтай перапісцы.
З публікацыі The Atlantic, у сваю чаргу, вынікае, што ў чаце былі такія зьвесткі, як час амэрыканскіх удараў па хусітах, тыпы выкарыстаных для гэтых удараў самалётаў, а таксама папярэдняя інфармацыя аб выніках удараў.
Дарадца прэзыдэнта ЗША ў нацыянальнай бясьпецы Майк Уолц заявіў, што бярэ на сябе «поўную адказнасьць» за працёк інфармацыі. У інтэрвію Fox News Уолц прызнаў, што стварыў гэты чат і каардынаваў яго працу. Паводле яго словаў, ён ня ведае, як Джэфры Голдбэрг апынуўся ў чаце, дзе, акрамя яго, былі 18 чалавек.
Уолц выказаў здагадку, што мог дадаць Голдбэрга ў чат выпадкова, пераблытаўшы яго нумар тэлефону з нумарам чалавека, якога ён зьбіраўся дадаць. Пры гэтым Уолц назваў Голдбэрга «нягоднікам», абвінаваціў у публікацыі недакладнай інфармацыі і сказаў, што Голдбэрг мае «жахлівую рэпутацыю» і «ненавідзіць прэзыдэнта».
Уолц сьцьвярджае, што ніякіх «лякацыяў, мэтадаў, крыніц, ваенных плянаў» у перапісцы не было.
Форум