На 3 красавіка ў Палаце прадстаўнікоў Нацыянальнага сходу Беларусі анансавалі сустрэчу з дэпутатам Ляндтага — зямельнага парлямэнта — нямецкай зямлі Баварыя Ўльрыхам Зінгерам.
Ульрых Зінгер зьяўляецца чальцом правай папулісцкай партыі «Альтэрнатыва для Нямеччыны».
Вядома, што ён раней пабываў зь візытам у Расеі, калі яшчэ з двума дэпутатамі Ляндтага назіраў за выбарамі Пуціна.
Калі гэты факт стаў вядомы нямецкай прэсе, выявілася, што Зінгер добра ведае расейскую мову, праходзіў практыку ў Маскве і нават мае дачу ў Падмаскоўі. Пра гэта пісала DW.
МЗС ФРГ пракамэнтавала Позірку чаканы візыт нямецкага дэпутата ў непрызнаны ў дэмакратычным сьвеце беларускі парлямэнт:
«Фэдэральны ўрад рашуча асудзіў сыстэмныя рэпрэсіі ў Беларусі. Гэта тычыцца таксама парлямэнцкіх выбараў у 2024 годзе, якія прайшлі ў атмасфэры страху. Усім незалежным палітычным партыям, кандыдатам было адмоўлена ў рэгістрацыі для ўдзелу ў гэтым выбарчым працэсе. Акрамя таго, рэжым не запрасіў місію назіраньня Арганізацыі па бясьпецы і супрацоўніцтве ў Эўропе (АБСЭ) — насуперак міжнародным абавязацельствам Беларусі. Гэта дакладна тлумачыць: працэс, з дапамогай якога была абрана беларуская Палата прадстаўнікоў, ня быў ні свабодным, ні сумленным».
У камэнтары нагадалі, што рэзкае пагаршэньне сытуацыі з правамі чалавека, а таксама падтрымка беларускім рэжымам расейскай агрэсіўнай вайны супраць Украіны сур’ёзна адбіліся на двухбаковых адносінах з Беларусі і ФРГ. З гэтай прычыны фэдэральны ўрад да мінімуму скараціў кантакты і супрацоўніцтва з дзяржаўнымі структурамі ў Беларусі.
Нямецкае зьнешнепалітычнае ведамства не асудзіла візыт Зінгера ў Менск: дэпутаты зямельных парлямэнтаў у палітычным сэнсе нікому не падпарадкоўваюцца і арганізуюць свае паездкі пад уласную адказнасьць, паведамляе Позірк.
Форум