26-гадовы грамадзянін Індыі Дыпак Кумар з штату Пэнджаб зьнік улетку 2024 году на тэрыторыі Беларусі, адкуль спрабаваў трапіць у Эўразьвяз, піша індыйскае выданьне The Indian Express. Меркаваным канчатковым пунктам ягонага маршруту была Партугалія, прамежкавым — Нідэрлянды.
Паводле выданьня, сувязь з Дыпакам Кумарам зьнікла 23 ліпеня 2024 году. Празь месяц ягоны бацька Віджай Кумар падаў заяву ў паліцыю. Празь 7 месяцаў, 27 сакавіка 2025 году, паліцыя завяла крымінальную справу на турыстычных агентаў, якія абяцалі за 1,15 млн рупіяў (каля 13,4 тысячы даляраў. — РС) аформіць мужчыну нідэрляндзкую шэнгенскую візу.
24 чэрвеня 2024 году Кумар вылецеў у Расею праз Дубай, адкуль, паводле бацькі, яму абяцалі просты пералёт у Нідэрлянды, але замест гэтага 27 чэрвеня адправілі ў Беларусь. Пры гэтым «прадстаўнікі агента адабралі ў сына пашпарт і 1,5 тысячы даляраў».
Пасьля зьнікненьня сына бацька зьвярнуўся да агента, які заявіў, што Кумара затрымалі на мяжы і павінны дэпартаваць, гаворыцца ў публікацыі. Бацька зьніклага зьвярнуўся ў мясцовую паліцыю.
28 сакавіка стала вядома, што сталічная пракуратура накіравала ў Менскі гарадзкі суд крымінальную справу аб выкраданьні двух грамадзян Індыі і вымаганьні. Адзначалася, што абвінавачваньні выстаўлены 31-гадоваму замежнаму грамадзяніну, пры гэтым яму інкрымінавалі зьдзяйсьненьне згаданых злачынстваў «групай асобаў з мэтай атрыманьня маёмаснай выгоды ў асабліва буйным памеры». Паводле матэрыялаў справы, абвінавачаны ў жніўні 2024 году, дзейнічаючы з «групай асобаў, выкраў двух чалавек і з ужываньнем да іх гвалту вымагаў у іхных сваякоў грошы».
Пацярпелыя ў кватэры ў Менску чакалі «далейшага перамяшчэньня празь мяжу ў краіны Эўразьвязу», гаворыцца ў паведамленьні. Калі ў іх скончылася ежа, яны зьвязаліся з куратарам іхнага далейшага транзыту, але той выклікаў таксоўку, завез іх да сябе дахаты, зьвязаў рукі й ногі і заткнуў раты. Пры гэтым мужчына пагражаў мігрантам, «прыстаўляў нож да сьпіны і горла» і інш. Паводле сьледзтва, свае дзеяньні мужчына запісаў на відэа, якое адправіў сваякам пацярпелых з патрабаваньнем перадаць грошы іншаму чалавеку, які дзейнічаў зь ім у групе.
У выніку Генэральная пракуратура Беларусі ацаніла маральную і фізычную шкоду, а таксама матэрыяльную страту, нанесеную пацярпелым, у 1,4 млн індыйскіх рупіяў, або 53,4 тысячы беларускіх рублёў. З апублікаваных зьвестак вынікае, што пацярпелыя — грамадзяне Індыі, якія рушылі празь Беларусь у Эўразьвяз маршрутам нелегальнай міграцыі. Дзе яны цяпер, пракуратура не ўдакладняла.
- Гэта ня першы падобны выпадак зьнікненьня грамадзян Індыі ў Беларусі. Так, напрыклад, у студзені 2025 году паліцыя індыйскага штату Гар’яна распачала крымінальную справу супраць турыстычнай кампаніі з Патыялы (штат Пэнджаб) у сувязі са зваротам сваякоў Маджыда Ахмада, якому згаданая турыстычная фірма абяцала паспрыяць у эміграцыі ў Нямеччыну праз Расею і Беларусь. Кампанія папрасіла за паслугі 850 тысяч індыйскіх рупіяў (каля 9,9 тысячы даляраў). Паводле бацькі мігранта, 12 жніўня 2024 году той прыляцеў у Расею, праз 6 дзён сувязь зь ім была страчаная. Летась індыйскія мэдыя паведамлялі і пра іншыя падобныя выпадкі.
- У сакавіку 2025 году арганізацыі «Oxfam» і «Egala», якія надаюць гуманітарную, мэдычную і юрыдычную дапамогу мігрантам, што прыбываюць з тэрыторыі Беларусі ў Польшчу, апублікавалі даклад са сьведчаньнямі гвалту беларускіх сілавікоў над мігрантамі.
- Міграцыйны крызіс на мяжы Беларусі і краін ЭЗ працягваецца зь вясны 2021 году. Улады суседніх эўрапейскіх дзяржаваў лічаць яго «гібрыднай атакай», арганізаванай рэжымамі ў Менску і Маскве. Улады Беларусі гэта адмаўляюць і рэгулярна паведамляюць пра пакуты, фізычныя траўмы і гібель іншаземцаў на мяжы з краінамі ЭЗ, нязьменна ўскладаючы адказнасьць за гэта на супрацоўнікаў сілавых ведамстваў Польшчы, Літвы і Латвіі. Пры гэтым беларускі бок не паведамляе, як мігранты аказваюцца на мяжы з краінамі ЭЗ у зоне адказнасьці памежнага ведамства.
Форум