Аляксандар Лукашэнка прыляцеў у Маскву на перамовы з прэзыдэнтам Расеі Ўладзімірам Пуціным.
Як паведаміла дзяржаўнае агенцтва БелТА, асноўная тэма — разьвіцьцё супрацы Беларусі і Расеі, «супольная праца ў інтэграцыйных фарматах», а таксама «абмен думкамі ў пытаньнях цяпераняй міжнароднай сытуацыі».
У аэрапорце Лукашэнку сустракалі віцэ-прэм’ер Расеі Аляксей Авярчук і дырэктар дэпартамэнту дзяржаўнага пратаколу МЗС Расеі Ігар Багдашаў.
Прэсавая служба Лукашэнкі анансавала падпісаньне ў выніку перамоваў пакету дакумэнтаў, а таксама «шэраг іншых захадаў, прадугледжаных яго афіцыйным статусам».
Некалькі дзён таму Дзьмітрый Пяскоў, прэсавы сакратар расейскага прэзыдэнта, паведаміў, што перамовы з Лукашэнкам будуць «вельмі субстантыўныя».
Напярэдадні стала вядома, што Беларусь плянуе падпісаць з Расеяй дамову аб узаемнай абароне грамадзян ад неабгрунтаванага перасьледу замежнымі дзяржавамі і міжнароднымі органамі юстыцыі. Пра іншыя праекты дакумэнтаў не паведамлялі.
Трэцяга лютага ў Менску агучылі афіцыйныя вынікі выбараў прэзыдэнта Беларусі. Яны адбыліся 26 студзеня і, на думку праваабаронцаў, прайшлі ў атмасфэры запалохваньня. Дзясяткі краінаў сьвету не прызналі выбараў і, адпаведна, Лукашэнку як легітымнага кіраўніка дзяржавы.
Паводле ЦВК Беларусі, Аляксандар Лукашэнка атрымаў 5 136 293 галасы (86,82%), але дагэтуль не прайшла цырымонія інаўгурацыі.
Згодна з артыкулам 83 абноўленай Канстытуцыі Беларусі пераможца выбараў павінен скласьці прысягу «ва ўрачыстай абстаноўцы ў прысутнасьці чальцоў Прэзыдыюму Ўсебеларускага народнага сходу, дэпутатаў Палаты прадстаўнікоў і чальцоў Савету рэспублікі, судзьдзяў Канстытуцыйнага і Вярхоўнага судоў не пазьней, чым цягам двух месяцаў з дня абраньня».
Форум