У Літве заявілі, што выкарыстаньне Расеяй паветранай прасторы Беларусі пагражае краінам NATO

Як вынікае з апублікаванага дакумэнту, у Літве па-ранейшаму лічаць, што пагрозы нацыянальнай бясьпецы Літвы паходзяць з Расеі, Беларусі і Кітаю.

Сярод новых пагроз спэцыялісты назвалі выкарыстаньне Расеяй паветранай прасторы Беларусі ў вайне з Украінай.

«Зь ліпеня 2024 году Расея запускае ва Ўкраіну бесьпілётнікі Geran-2 (Shahed-136) праз паветраную прастору Беларусі. Паводле выведкі, частка дронаў перасякае паветраную прастору Беларусі і ляціць ва Ўкраіну, а іншыя пасьля ўваходу ў паветраную прастору з боку Расеі ляцяць у Беларусі і зноў вяртаюцца ва Ўкраіну. Тым ня менш асобныя дроны адхіляюцца ад маршруту і нясуць пагрозу для краін NATO, якія мяжуюць зь Беларусьсю», — адзначаецца ў дакумэнце.

ГЛЯДЗІЦЕ ТАКСАМА:

У Латвіі ў неба ўздымалі авіяцыю NATO празь «неапазнаны аб’ект» з тэрыторыі Беларусі

У якасьці прыкладу спэцслужбы Літвы нагадалі выпадак, калі расейскі дрон Geran-2 (Shahed-136) упаў на тэрыторыі Латвіі. Гэта адбылося 7 верасьня 2024 году.

«Беларускія ВПС і сілы СПА рэагуюць на малую колькасьць дронаў-камікадзэ, якія ўваходзяць у паветраную прастору Беларусі. Былі выпадкі, калі Ўзброеныя сілы Беларусі зьбівалі расейскія Geran-2 (Shahed-136), аднак Беларусь або не абвяшчае прыналежнасьці зьбітых бесьпілётнікаў, або не паведамляе аб інцыдэнтах», — адзначаецца ў справаздачы.

ГЛЯДЗІЦЕ ТАКСАМА:

У Латвіі паведамілі, што расейскі дрон, які ўпаў у іх, быў начынены выбухоўкай

Паводле літоўскіх спэцслужбаў, таксама захоўваюцца пагрозы вэрбаваньня беларускімі службамі беларусаў, якія жывуць у Літве, і літоўскіх грамадзян, якія наведваюць Беларусь.

ГЛЯДЗІЦЕ ТАКСАМА:

«Беларуска-расейская Дамова аб гарантыях бясьпекі — шлях да эскаляцыі ў рэгіёне», — палітоляг Марозаў