Максім Рыжанкоў 26 лютага выступіў ў пасяджэньні высокага ўзроўню Канфэрэнцыі ААН па раззбраеньні ў Жэнэве, піша БЕЛТА.
«Хопіць казаць аб пагрозе „расейцы ідуць“. Нікуды яны далей не прыйдуць: ні ў Бэрлін, ні ў Парыж. І ня трэба ліць ваду ў млын рыторыкі ваенна-прамысловых камітэтаў і зьвязаных зь імі палітычных колаў», — падкрэсьліў кіраўнік МЗС Беларусі Максім Рыжанкоў.
Ён заявіў сярод іншага, што Беларусь «пасьлядоўна і празрыста для суседзяў і міжнароднай супольнасьці робіць вымушаныя крокі ў адказ па забесьпячэньні нацыянальнай бясьпекі і ўмацаваньні абараназдольнасьці краіны, у тым ліку пры падтрымцы найбліжэйшага саюзьніка — Расеі».
Паводле Рыжанкова, супрацоўніцтва Беларусі і Расеі не нясе пагроз трэцім краінам.
«Асобна кажу гэта для NATO. Мы ажыцьцяўляем сваё супрацоўніцтва ў рамках міжнароднага права і ў строгай адпаведнасьці з палажэньнямі ДНЯЗ (Дамова аб нераспаўсюджаньні ядзернай зброі)», — заявіў дыплямат.
Рыжанкоў сказаў, што Беларусь ня мае намеру «ўвязвацца ў вар’яцкі закуп дарагой зброі і кратнага павелічэньня ўзброеных сіл, правакуючы далейшую канфрантацыю».
«Гэта бескарысна. Ды і ў нас ёсьць на што марнаваць дзяржаўныя грошы: ахова здароўя, сацыяльныя патрэбы, разьвіцьцё, дарогі, стварэньне бясьпечнага асяродзьдзя для нашых грамадзян», — сказаў кіраўнік МЗС Беларусі.
Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў. За гэта супраць Беларусі былі ўведзеныя замежныя санкцыі.
Аляксандар Лукашэнка і Ўладзімір Пуцін заявілі аб разьмяшчэньні ў Беларусі расейскай ядзернай броі і навучаньні беларускіх пілётаў яе выкарытсоўваць.
У Беларусі чацьвёрты год парцягваюцца розныя вайсковыя вучэньні, у тым ліеу з удзелам расейскіх груповак. На 2025 год заплянавана некалькі маштабных манэўраў.
Форум