Аляксандар Лукашэнка заявіў аб неабходнасьці павелічэньня вытворчасьці і аб’ёму экспарту прадукцыі, якую вырабляюць беларускія прадпрыемствы мікраэлектронікі.
«Як мяне інфармуюць, пэўныя вынікі ёсьць. Валютная выручка павялічваецца. Заробкі на прадпрыемствах у паўтара разы вышэй за сярэднюю па краіне. Упэўнены, ёсьць рэзэрвы для таго, каб паднаціснуць і сёлета нарасьціць аб’ёмы вытворчасьці і дабавіць у экспарце», — працытавала Аляксандра Лукашэнку дзяржаўнае агенцтва БелТА.
Паводле яго, сёньня ў сьвеце патрэбны «мільярды чыпаў, мікрасхем, транзыстараў».
«Але і барацьба за рынкі ідзе значная. Ніхто так проста сваю нішу нікому не аддасьць. Канкурэнцыя будзе станавіцца ўсё больш жорсткай. Мы на гэтым рынку можа канкураваць. Гэта наша вялізнае дасягненьне. Таму неабходна як мага далей зазіраць у будучыню і ўкладвацца ў разьвіцьцё», — заявіў ён.
«Роля электронікі для будучыні Беларусі, у тым ліку для Беларусі і Расеі, вельмі важная. У наш час перадавыя тэхналёгіі — гэта абароназдольнасьць, сувэрэнітэт, незалежнасьць дзяржавы», — перакананы Аляксандар Лукашэнка.
Лукашэнка 14 лютага наведаў прадпрыемства «Інтэграл», на якім праводзіць нараду ў пытаньнях разьвіцьця беларускай мікраэлектронікі.
Беларускае прадпрыемства «Інтэграл» у сакавіку 2022 году – чэрвені 2024-га паставіла ў Расею звыш 6 мільёнаў мікрасхем на суму больш як 130 мільёнаў эўра, якія расейскія прадпрыемствы выкарыстоўваюць для вытворчасьці ракет Р-37, Х-59М2А, С-300, Х-101 і «Іскандэр» — імі расейскія войскі абстрэльваюць мірныя гарады Ўкраіны.
Паводле Беларускага расьсьледніцкага цэнтру, з пачатку поўнамаштабнай вайны ва Ўкраіне даходы «Інтэгралу» вырасьлі шматкроць. У 2023 годзе чысты прыбытак прадпрыемства павялічыўся больш як у 11 разоў у параўнаньні 2022 годам — амаль да 150 мільёнаў беларускіх рублёў (прыблізна 50 мільёнаў даляраў у эквіваленце). Гэта ў 40 разоў больш за прыбытак «Інтэгралу» у 2021-м.
У сакавіку 2022 году – чэрвені 2024-га паставіла ў Расею звыш 6 мільёнаў мікрасхем на суму больш як 130 мільёнаў эўра, якія расейскія прадпрыемствы выкарыстоўваюць для вытворчасьці ракет Р-37, Х-59М2А, С-300, Х-101 і «Іскандэр» — імі расейскія войскі абстрэльваюць мірныя гарады Ўкраіны.
Беларусь купляе кампанэнты для вытворчасьці ў Казахстане, а туды яны трапляюць зь нямецкіх прадпрыемстваў праз Польшчу і Турэччыну.
Як высьветлілі расьсьледнікі, беларускае прадпрыемства набывае неабходныя для вытворчасьці мікраэлектронікі саляную кіслату, газавыя рухавікі MWM 2032 і запчасткі да іх у абыход санкцый. Як адзначаюць экспэрты, такія пастаўкі небясьпечныя яшчэ і тым, што іх можна скапіяваць і аднавіць у працэсе рэінжынэрынгу. Іншыя заходнія кампанэнты, важныя для мікрасхем — аргонна-ённыя лазэры, паліравальныя суспэнзіі, паліравальныя кругі, дэталі, якія выкарыстоўваюцца ў вытворчасьці паўправаднікоў і мікраэлектронікі — зусім, як сьцьвярджаюць журналісты, ня ўключаныя ў санкцыйныя сьпісы ЗША і Эўразьвязу.
Эўразьвяз прапанаваў уключыць гэтыя складнікі ў 16-ы пакет санкцый супраць Расеі і Беларусі за падтрымку агрэсіі супраць Украіны і расейскага вайскова-прамысловага комплексу. Санкцыі плянуюць ухваліць да трэцяй гадавіны з дня расейскага поўнамаштабнага ваеннага ўварваньня ва Ўкраіну, якое падтрымаў рэжым Аляксандра Лукашэнкі.
Форум