Як паведаміў урад Беларусі, тарыфы на электраэнэргію для насельніцтва з 1 студзеня 2025 году павышаюцца на 11,9%.
Для тыпавой кватэры пры нарматыўным спажываньні электрычнай энергіі гэта складзе 4 рублі 51 капейку.
З 1 студзеня 2024 года тарыфы былі ўстаноўленыя ў памеры 0,1294 рубля за 1 кіляват-гадзіну пры мінімальных загрузках з 23 да 6 гадзін, 0,3881 рубля за 1 кіляват-гадзіну пры максымальных загрузках з 17 да 23 гадзін, астатнія гадзіны 0,1509 рубля.
Паводле ранейшага ўказу Лукашэнкі, з 1 студзеня павысілі тарыфы на ўсе паслугі ЖКГ, акрамя ацяпленьня і гарачага водазабесьпячэньня, паведаміла прэсавая служба Лукашэнкі. А з 1 чэрвеня — на цеплавую энэргію з мэтай ацяпленьня і гарачага водазабесьпячэньня.
Такім чынам, з разьлікам на тыпавую двухпакаёвую кватэру з трыма жыльцамі аплату камунальных паслуг падымуць на 17,05 рубля, з 1 чэрвеня — яшчэ на 3,95 рубля. Агулам 21 рубель.
Летась утрыманьне тыпавой двухпакаёвай кватэры з трыма жыхарамі абыходзілася, па падліках рэсурсу telegraf.news у 173,15 рубля, а цяпер складзе 194,15 рубля. Такім чынам, сёлета падвышэньне складзе 12,13%, ці 6,4 даляра.
Як паведамляў у 2023 годзе міністар жыльлёва-камунальнай гаспадаркі Андрэй Хмель, у 2020–2021 гадах на жыльлёва-камунальныя паслугі зь бюджэту сям’і трацілася ад 4,7 да 4,8% пры дваіх працоўных, якія атрымліваюць сярэднерэспубліканскі заробак і пражываюць у двухпакаёвай кватэры.
Цяпер, як разьлічваюць улады, сярэдняя сям’я, якая жыве ў двухпакаёвай кватэры, будзе траціць на ЖКГ 3,8% сямейнага бюджэту.
