Як адзначаецца ў афіцыйным паведамленьні, у часе ператрусаў у Вільні і Рудаміне ў памяшканьнях кампаній, якія займаюцца грузаперавозкамі і продажам тэхнікі, затрымалі 17 грузавікоў і 15 паўпрычэпаў на 1,2 мільёна эўра.
Апроч таго, на месцах сьледчых дзеяньняў знайшлі кантрабандныя цыгарэты.
У крымінальнай службе мытні Літвы праводзяць расьсьледаваньне праз падазрэньне, што кампаніі займаліся перавозкай розных транспартных сродкаў у Расею і Беларусь у абыход санкцый.
Сьледчыя мяркуюць, што такім чынам у Расею і Беларусь трапіла каля 30 транспартных сродкаў, у тым ліку цягачы і паўпрычэпы, а таксама легкавыя аўтамабілі клясы люкс — BMW X3, BMW X5, BMW X6, BMW X7 2024 году выпуску, Mercedes-Benz G-Class і іншыя. Іх агульны кошт можа сягаць 1,7 мільёна эўра.
«Хоць аўтамабілі заставаліся зарэгістраванымі ў Літве, іх таксама зарэгістравалі ў Расеі і Беларусі», — адзначаецца ў паведамленьні.
Падазрэньні ў парушэньні міжнародных санкцый выставілі двум грамадзянам Беларусі, аднаго зь якіх Віленскі раённы суд арыштаваў на месяц, а другога — на два месяцы. Грамадзянам Літвы, якіх падазраюць таксама, выбралі больш мяккія меры стрыманьня.
Форум