3 лютага 1920 году памёр Антон Шабуня, палітык, адзін зь лідэраў Беларускай сацыялістычнай грамады (БСГ.) Падпольная мянушка Фама. На сваёй кватэры па цяперашняй вуліцы Інтэрнацыянальнай у Менску і ў фальварку каля Пухавічаў ладзіў кансьпірацыйныя сустрэчы. Адзін з заснавальнікаў кніжнага таварыства «Мянчук», якое выдавала і распаўсюджвала беларускія кнігі.
Таксама ў гэты дзень
1919 — на Ўсебеларускім зьезьдзе Саветаў была прынятая першая Канстытуцыя БССР.
1926 — у Вільні выйшаў першы нумар газэты «Беларускае слова», выданьня Часовай беларускай рады, потым Беларускай нацыянальнай рады.
1927 — у мястэчку Косаве польскія ўлады расстралялі мірную дэманстрацыю людзей, якія выступалі ў абарону Беларускай сялянска-работніцкай грамады. Было забіта шэсьць чалавек і некалькі дзясяткаў паранена.
1993 — Вярхоўны Савет Беларусі адмяніў уласную пастанову аб прыпыненьні дзейнасьці Кампартыі Беларусі. За аднаўленьне дзейнасьці КПБ прагаласавала камуністычная большасьць парлямэнту.
У гэты дзень нарадзіліся
1952 — Алег Манаеў, беларускі сацыёляг.
1985 — Андрэй Касьціцын, хакеіст. Паходзіць з Наваполацку. Гуляў у НХЛ.
У памяці
1468 — Ёган Гутэнбэрг, пачынальнік кнігадрукаваньня.
1964 — Станіслаў Станкевіч, беларускі грамадзка-культурны дзеяч, паэт, выдавец. Стась-кнігар, уладальнік уласнай беларускай кнігарні ў Вільні, вязень ГУЛАГу.
1989 — Анатоль Анікейчык, беларускі скульптар, народны мастак Беларусі.
2002 — Аркадзь Астрамецкі, цымбаліст, народны артыст Беларусі.
2019 — Васіль Сёмуха , перакладчык, удзельнік нацыянальна-культурніцкага руху 1970–1980-х і нацыянальна-дэмакратычнага руху 1980-х — пач. ХХІ ст.
