Uzbekistan Airways пачала ажыцьцяўляць рэйсы ў Эўропу ў абыход паветранай прасторы Расеі і Беларусі. Пра гэта паведамляе выданьне Daryo.
Маршрут палёту нацыянальнай авіякампаніі зьмяніўся з 20 студзеня, цяпер яе самалёты будуць лятаць праз Азэрбайджан і Турэччыну.
Repost.uz удакладніў у кампаніі, ці зьвязаная зьмена маршруту з крушэньнем самалёта Azerbaijan Airlines у казахстанскім Актаў 25 сьнежня.
«Не, гэта проста меры засьцярогі і ў нейкай ступені аптымізацыя маршрутаў», — адказалі ў прэс-службе Uzbekistan Airways.
Самалёт Embraer 190 авіякампаніі Azerbaijan Airlines вылецеў з Баку і павінен быў сесьці ў Грозным, але паляцеў у Актаў, дзе пацярпеў крушэньне. У выніку авіякатастрофы загінулі 38 пасажыраў, выжылі 29 чалавек.
Reuters і Euronews са спасылкай на крыніцы ў Азэрбайджане пісалі, што самалёт быў зьбіты расейскай сыстэмай СПА. Паводле іх дадзеных, лайнэру не дазволілі прызямліцца ў ніводным з расейскіх аэрапортаў, а загадалі ляцець праз Касьпійскае мора ў кірунку Актаў. Бартавыя самапісцы лайнэра адправілі для расшыфроўкі ў Бразылію. Чакаецца, што на наступным тыдні будзе апублікаваная частка вынікаў расьсьледаваньня авіякатастрофы.
Прэзыдэнт Азэрбайджану Ільхам Аліеў заявіў, што прадстаўнікі Расеі нясуць адказнасьць за крушэньне самалёта Azerbaijan Airlines у Казахстане. Ён запатрабаваў справядлівасьці, пакараньня вінаватых, «поўнай празрыстасьці і чалавечых паводзінаў».
На пачатку студзеня ўзбэкістанская Qanot Sharq прыпыніла шэраг рэйсаў, у тым ліку палёты ў Маскву, Санкт-Пецярбург і Ніжні Ноўгарад. У авіякампаніі такое рашэньне патлумачылі «вытворчай неабходнасьцю».
Форум