«Прэзыдэнт Расеі Ўладзімір Пуцін не пераможа ў вайне з Украінай», — заявіў прэзыдэнт ЗША Джо Байдэн падчас сустрэчы ў Белым доме з прэм’ер-міністрам Вялікабрытаніі Кірам Стармэрам.
Як піша «Голас Амэрыкі», у парадку дня амэрыкана-брытанскіх перамоваў — пытаньне аб дазволе Кіеву выкарыстоўваць ракеты вялікай далёкасьці для ўдараў углыб тэрыторыі Расеі. Менавіта да гэтага прэзідэнт Украіны Ўладзімір Зяленскі заклікае лідэраў у Вашынгтоне і Лёндане.
Лідэры ЗША і Вялікабрытаніі пацьвердзілі сваю непахісную падтрымку Ўкраіны, якая працягвае абараняцца ад расейскай агрэсіі.
Яны выказалі глыбокую занепакоенасць наконт паставак Іранам і Паўночнай Карэяй сьмяротнай зброі Расеі і падтрымкі Кітайскай Народнай Рэспублікай расейскага абаронна-прамысловага комплексу.
Акрамя таго, прэс-служба Белага дома, паведаміла, што Байдэн і Крамэр пацвердзілі сваю непахісную прыхільнасьць да бясьпекі Ізраіля, настойлівую неабходнасьць дасягненьня пагадненьня аб спыненьні агню і вызваленьня закладнікаў. Абодва лідэры асудзілі атакі хусітаў, якія падтрымліваюцца Іранам, на гандлёвыя судны ў Чырвоным моры.
Прэзыдэнт ЗША і прэм’ер-міністар Вялікабрытаніі абмеркавалі супрацоўніцтва дзьвюх краін у галіне чыстай энэргіі і перадавых тэхналёгій, а таксама магчымасьці паглыбленьня трывалых эканамічных сувязей паміж ЗША і Вялікабрытаніяй.
Заявы аб магчымасьці выкарыстаньня амэрыканскай зброі на тэрыторыі Расеі не было
Раней прэзідэнт Байдэн сказаў, што «працуе» над запытам Украіны па ракетах вялікай далёкасьці. У чацвер прэзідэнт Уладзімір Пуцін заявіў, што падобны дазвол азначаў бы, што NATO знаходзіцца ў стане вайны з Расеяй.
Па шляху ў Вашынгтон Кір Стармэр пракаментаваў гэтае сьцьвярджэнне ў гутарцы з брытанскімі журналістамі, якія ляцелі разам з ім: «Расея пачала гэты канфлікт. Расея незаконна ўварвалася ва Ўкраіну. Расея можа спыніць гэты канфлікт у гэтую хвіліну».
Раней каардынатар Белага дома па камунікацыях у сфэры нацыянальнай бяспекі Джон Кірбі растлумачыў: «Ён [Пуцін] чапляецца за... [гэты наратыў] з самага пачатку вайны: што яму давялося ўварвацца ва Ўкраіну, што NATO яго атачае, што падтрымка Ўкраіны з боку NATO і ЗША даказвае, што гэта Захад ваюе з Расеяй. Усё гэта — суцэльная лухта. Гэта ў чыстым выглядзе агрэсіўная вайна Расеі супраць Украіны — так было заўсёды, з самага пачатку».
Прэзыдэнт ЗША Джо Байдэн і прэм'ер-міністар Вялікабрытаніі Кір Стармэр на сустрэчы 13 верасьня пацьвердзілі сваю «нязьменную падтрымку» Ўкраіны, гаворыцца ў заяве Белага дома пасьля перамоў. Тэма паслабленьня абмежаваньняў на прымяненьне Кіевам зброі далёкага дзеяньня ўглыб тэрыторыі Расеі ў дакумэнце ня згадваецца.
Злучаныя Штаты абмежавалі выкарыстаньне Ўкраінай амэрыканскай зброі далёкага радыюсу дзеяньня з-за асьцярогі, што гэта можа прывесьці да эскаляцыі вайны і, магчыма, падштурхнуць Расею да выкарыстаньня ядзернай зброі.
За некалькі гадзін да пачатку перамоваў прэс-сакратар Белага дома па нацыянальнай бяспецы Джон Кірбі заявіў, што ЗША не плянуюць абвяшчаць якую-небудзь новую палітыку ў гэтым пытаньні.
Дзяржсакратар ЗША Энтані Блінкен і кіраўнік брытанскага знешнепалітычнага ведамства Дэвід Лэмі здзейсьнілі на днях сумесны візыт у Кіеў, дзе абмяркоўвалі пытаньне далейшай вайсковай падтрымкі Ўкраіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум