Гаворка пра законапраект «Аб сямейных каштоўнасьцях і абароне непаўналетніх» і папраўкі яшчэ ў 18 законаў, паведамляе грузінская служба Радыё Свабода з спасылкай на сьпікера парлямэнту Шалву Папуашвілі.
Паводле яго, пакет законапраектаў, сярод іншага, прадугледжвае забарону на
- «рэгістрацыю альтэрнатыўнага шлюбнага саюзу»;
- усынаўленьне дзяцей і апеку над непаўналетнімі для аднаполых пар;
- любыя мэдычныя маніпуляцыі па зьмене полу;
- «ЛГБТ-прапаганду» ў сэктары адукацыі і ў СМІ;
- правядзеньне сходаў ці маніфэстацыяў з мэтай папулярызацыі аднаполых шлюбаў ці інцэсту і г.д.;
- любое абмежаваньне ў дзяржаўных установах і прыватных кампаніях свабоднага выкарыстаньня тэрмінаў «мама» і «тата»;
- правядзеньне «Маршаў годнасьці» (шэсьцяў прадстаўнікоў ЛГБТ);
- спэцыяльная камісія будзе сачыць за тым, каб у любых мастацкіх творах, у тым ліку ў літаратуры, фільмах, спэктаклях або малюнках, аўтары не прапагандавалі «аднаполыя адносіны або інцэст».
Паводле Папуашвілі, адзін з законаў усталюе ў Грузіі новае дзяржаўнае сьвята — «Дзень сьвятасьці сям’і», якое будзе штогод адзначацца 17 траўня. У гэты дзень у сьвеце адзначаецца Дзень барацьбы супраць гамафобіі і трансфобіі.
У кіроўнай партыі ў парлямэнце Грузіі дастаткова галасоў, каб зацьвердзіць ініцыятыву — у адрозьненьне ад раней ініцыяваных канстытуцыйных паправак аналягічнага зьместу, для прыняцьця якіх «Мары» неабходная падтрымка апазыцыі.
Папуашвілі кажа, што законапраекты зацьвердзяць у першым чытаньні ўжо на вясновай сэсіі, у другім і трэцім чытаньні — на восеньскай.
Апазыцыя ня ўдзельнічае ў абмеркаваньні як канстытуцыйных паправак, так і заканадаўчага пакету супраць ЛГБТ, называючы ініцыятыву ўладаў «надуманай» і «неактуальнай». Аднак з улікам стаўленьня да праблемы значнай часткі грузінскага грамадзтва апазыцыйныя празаходнія партыі на дадзены момант устрымліваюцца ад занадта актыўных пратэстаў — у адрозьненьне ад пратэстаў супраць нядаўна прынятага закону аб так званых «іншаземных агентах».
Зрэшты, як сказаў у гутарцы з Радыё Свабода дысыдэнт савецкай эпохі, літаратар Леван Бэрдзэнішвілі, «грузінскае грамадзтва значна пасталела і наблізілася да эўрапейскага разуменьня талерантнасьці».
«Ня вельмі многія ўхваляць у нашай краіне такое цемрашальства, як выманьне зь бібліятэк або фільматэк жамчужын сусьветнай культуры адпаведнага зьместу», — адзначыў Бэрдзэнішвілі.
Форум