19 студзеня падчас наведваньня заводу «БелДжы» Аляксандар Лукашэнка заявіў, што нямецкі вытворца аўтамабіляў BMW шмат гадоў таму нібыта падарыў яму аўтамабіль. Журналісты Беларускага расьсьледніцкага цэнтру зьвярнуліся ў нямецкі аўтаканцэрн, каб высьветліць, ці так гэта.
«Увесь сьвет сёньня заточаны на вытворчасьць... гібрыдных аўтамабіляў. Гэта значыць дызэльнае паліва, бэнзін той жа, рухавік, падзарадка — электрамабіль. І чыстыя электрамабілі. Увесь сьвет сёньня, усе кампаніі, усе, і BMW, неяк яны мне падарылі першы маленькі-маленькі аўтамабіль шмат гадоў таму. Гэта значыць, яны ўжо тады пачалі рабіць электрамабілі. Гэта значыць, сьвет нам дэманструе, куды рухацца», — сказаў Лукашэнка работнікам прадпрыемства.
Беларускі расьсьледніцкі цэнтар зьвярнуўся ў BMW з просьбай пракамэнтаваць гэтую заяву.
«Мы ўважліва выслухалі гэтую прамову спадара Лукашэнкі. Для BMW AG і яго гандлёвых партнэраў, як сусьветнага вытворцы аўтамабіляў, выкананьне законаў і правілаў зьяўляецца абавязковым.
Пасьля праверкі фактаў нашым афіцыйным імпартэрам BMW у Беларусі мы ня можам пацьвердзіць заяву спадара Лукашэнкі аб тым, што ён „у мінулым атрымаў аўтамабіль у падарунак ад BMW“», — адказалі ў аўтаканцэрне.
У 2019 годзе Аляксандар Лукашэнка ўжо хваліўся, што атрымаў у падарунак аўтамабіль Tesla ад мільярдэра Ілана Маска. «У мяне ёсьць электрычная машына Tesla, я часам яе тэстую. Маск падарыў».
Заснавальнік кампаніі Tesla Ілан Маск гэтыя словы Лукашэнкі абверг, а ягонае ляканічнае «Uh no», напісанае ў Твітэры з гэтай нагоды, нават стала мэмам.
