Пра гэта паведамляе інфармацыйнае агенцтва «Позірк».
Мерапрыемства прайшло ў Менскай гарадзкой ратушы з удзелам замежных дыпляматаў.
Паводле слоў Алейніка, у Беларусі «ніколі не дзялілі сваіх людзей ні па моўным, ні па этнічным прынцыпе».
Кіраўнік МЗС падкрэсьліў, што ў Беларусі цяпер дзьве дзяржаўныя мовы, а калісьці было і чатыры.
Пры гэтым, паводле сьцьвярджэньня міністра, «асаблівае месца заўсёды займала і будзе займаць родная беларуская мова», якая «дае нам сілу і стойкасьць, у яе мілагучнасьці нязломная воля беларусаў, самабытнасьць і калярыт нашай найбагацейшай культуры».
«Позірк» адзначае, што разьвіцьцё беларускай мовы дзесяцігодзьдзямі было прэрагатывай грамадзкіх ініцыятываў і арганізацыяў. Пасьля сфальсыфікаваных прэзыдэнцкіх выбараў 2020 года рэжым Лукашэнкі разгарнуў маштабныя рэпрэсіі, у выніку якіх было ліквідавана мноства арганізацыяў і ініцыятываў, якія разьвівалі беларускую культуру, у тым ліку Саюз беларускіх пісьменьнікаў, Беларускі ПЭН-цэнтар, «Таварыства беларускай мовы імя Францішка Скарыны», шэраг прыватных выдавецтваў, якія спэцыялізаваліся на перакладах на беларускую мову і сучаснай беларускамоўнай літаратуры.
У краіне праводзіцца палітыка русыфікацыі. Паводле перапісу насельніцтва, колькасьць беларусаў, якія лічаць сваёй роднай мовай беларускую, зьнізілася з 85,6% у 1999 годзе да 61,2% у 2019-м.
Намінальна 40% школ у краіне беларускамоўныя, але навучаецца ў іх усяго каля 10% вучняў (крыху больш за 100 тысячаў дзяцей і падлеткаў).
