Дата дня
16 студзеня 1919 году, праз два тыдні пасьля абвяшчэньня БССР, тэрыторыю савецкай Беларусі зьменшылі на карысьць Расейскай Фэдэрацыі. Да РСФСР адышлі Віцебская, Магілёўская і Смаленская губэрні. Больш падрабязна чытайце пра гэта ў нашым праекце «Як малявалі межы Беларусі».
Таксама ў гэты дзень
1593 — кароль і вялікі князь Жыгімонт Ваза склікаў паспалітае рушэньне, каб здушыць казацкае паўстаньне
1916 — фэльдмаршал Гіндэнбург выдаў загад, які надаваў беларускай мове роўныя правы зь іншымі мовамі, пашыранымі на тэрыторыях, акупаваных войскамі Нямеччыны.
1921 — падпісаная дамова паміж БССР і РСФСР. Наркаматы вайсковых справаў, зьнешняга гандлю, фінансаў, працы, пошты і тэлеграфу аб'ядноўваліся і ўваходзілі ў склад СНК РСФСР. Дамова фактычна пазбаўляла БССР сувэрэнітэту.
1966 — у Таронта ўтварыўся Каардынацыйны камітэт беларусаў Канады.
1969 — чэскі студэнт Ян Палах спаліў сябе на Вацлаўскай плошчы ў Празе, пратэстуючы супраць уварваньня войскаў Варшаўскай дамовы ў Чэхаславаччыну.
1998 — замест забароненай газэты «Свабода» рэдакцыя пачала выдаваць газэту «Навіны».
2023 - у Горадзенскім абласным судзе пачаўся працэс над журналістам, адным зь лідэраў польскай грамады Беларусі Анджэем Пачобутам. 8 лютага 2023 году яго асудзілі на 8 гадоў пазбаўленьня волі ў калёніі ўзмоцненага рэжыму.
У гэты дзень нарадзіліся
1708 — Юзаф Станіслаў Сапега, вялікалітоўскі дзяржаўны і рэлігійны дзяяч, мэцэнат.
1791 — Генрык Дэмбінскі, адзін з кіраўнікоў паўстаньня 1830–1831 гадоў. У 1831-м кіраваў няўдалай спробай адбіць у расейцаў Вільню, скончыў жыцьцё ў эміграцыі.
1826 — Рамуальд Траўгут, адзін з кіраўнікоў паўстаньня 1863–1864 гадоў. Быў схоплены і павешаны. У мястэчку Сьвіслач на Горадзеншчыне яму пастаўлены помнік.
1829 — Уладзімер Спасовіч, юрыст, тэарэтык права.
1905 — Алесь Пальчэўскі, беларускі пісьменьнік. За сталінскім часам быў двойчы рэпрэсаваны.
1919 — Уладзімер Алоўнікаў, беларускі кампазытар, народны артыст Беларусі. Сярод створаных ім папулярных песьняў — «Радзіма мая дарагая».
1940 — Іван Лагвіновіч, паэт.
У памяці
1893 — Іван Берман, праваслаўны сьвятар, этнограф, краязнавец, зьбіральнік беларускага фальклёру.
2012 — Уладзімер Жбанаў, скульптар, аўтар вулічных скульптураў.
