Каля 20 удзельнікаў акцыі, арганізаванай бэрлінскім офісам арганізацыі, з плякатамі і імправізаванымі гірляндамі з паштовак сабраліся ля будынка дыпмісіі. Яны зачыталі некалькіх пасланьняў, адрасаваных калегамі зь Нямеччыны і іншых краін Золатавай, з дапамогай мэгафона запатрабавалі неадкладнага вызваленьня яе і іншых журналістаў, якія знаходзяцца ў зьняволеньні за сваю прафэсійную дзейнасьць, пасьля чаго паспрабавалі перадаць каля сотні паштовак у пасольства.
«Журналістыка — гэта не злачынства, а незалежныя беларускія мэдыя і журналісты маюць патрэбу ў падтрымцы, таму што рэпрэсіўны рэжым Аляксандра Лукашэнкі пасьля фальсыфікацыі выбараў прыгаварыў многіх журналістаў, такіх як Марына Золатава, да зьняволеньня, за іх прафэсійную дзейнасьць», — зачыталі прысутныя.
Пасьля таго, як з будынка да ўдзельнікаў акцыі ніхто не выйшаў, частку пасланьняў удалося апусьціць у паштовую скрыню пасольства.
Акцыя стартавала 6 верасьня. Пасланні ў адрас Золатавай зьбіралі аддзяленьні арганізацыі ў Нямеччыне, Аўстрыі, Швэцыі, Швайцарыі, Вялікай Брытаніі, ЗША, на Тайвані, а таксама галаўны офіс у Парыжы.
Арганізацыя нагадвае, што ў яе рэйтынгу свабоды СМІ Беларусь займае 157-е месца са 180.
Золатаву затрымалі ў траўні 2021 года. У сакавіку 2023-га ёй прысудзілі 12 гадоў пазбаўленьня волі праз абвінавачаньні ў нявыплаце падаткаў, распальваньні варожасьці і прычыненьні шкоды нацыянальнай бясьпецы. У кастрычніку 2022 года Золатаву ўключылі ў пералік асоб, якія маюць дачыненьне да тэрарыстычнай дзейнасьці, у жніўні 2023 года — у пералік асоб, якія маюць дачыненьне да экстрэмісцкай дзейнасьці. Праваабарончая супольнасьць прызнала Золатава палітзьняволенай.
Пра перасьлед Tut.by
- 18 траўня офіс рэдакцыі быў заблякаваны за публікацыю «забароненай заканадаўствам інфармацыі», туды прыйшлі супрацоўнікі ДФР. Пазьней у ведамстве паведамілі, што на службовых асобаў завялі крымінальную справу за ўхіленьне ад выплаты падаткаў у асабліва буйным памеры. На думку сілавікоў, рэзыдэнт Парку высокіх тэхналёгій атрымаў выручку, не абумоўленую дзейнасьцю, дазволенай для рэзыдэнтаў.
- У справе затрымалі агулам 15 чалавек: кіраўнікі, журналісты і іншы пэрсанал мэдыйнага парталу Tut.by (Людміла Чэкіна, Марына Золатава, Вольга Лойка, Ірына Рыбалка, Алена Талкачова, Анжэла Асад, Марыя Новік, Ала Лапатка, Аляксандра Дайнека, Андрэй Аўдзееў, Дар'я Данілава, Кацярына Ткачэнка і Ірына Касьцючэнка), а таксама генэральны дырэктар Hoster.by Сяргей Павалішаў (вызвалілі 1 верасьня) і ўдава заснавальніка Tut.by Юлія Чарняўская. Праваабаронцы прызналі іх палітвязьнямі.
- Удава заснавальніка парталу Юрыя Зісера Юлія Чарняўская цяпер пад хатнім арыштам, два дні пасьля затрыманьня пра яе не было нічога вядома, яна перанесла гіпэртанічны крыз і была на нейкі час шпіталізаваная.
- Сам сайт Tut.by заблякаваны рашэньнем Мінінфармацыі.
- У сьнежні 2020 году Tut.by на патрабаваньне Міністэрства інфармацыі пазбавілі статусу СМІ. Падставай сталі раней вынесеныя папярэджаньні да матэрыялаў аб правядзеньні прэзыдэнцкіх выбараў, дзейнасьці Камітэту дзяржаўнага кантролю, беларускай мытні і г.д.
- Увечары 27 чэрвеня партал выдаліў з сацыяльных сетак усе допісы за апошнія паўтара года.
- 13 жніўня Суд Цэнтральнага раёну Менску прызнаў інфармацыйную прадукцыю і сацыяльныя сеткі Tut.by і новага праекту тутбаеўцаў Zerkalo.io экстрэмісцкімі.
- 7 кастрычніка Сьледчы камітэт паведаміў пра новую крымінальную справу супраць тутбаеўцаў — за распальваньне варожасьці, учыненае групай асобаў (ч. 3 арт. 130). Максымальная санкцыя па гэтым артыкуле — 12 гадоў зьняволеньня.
- Справу Tut.by пачалі разглядаць 9 студзеня 2023 ў Менскім гарадзкім судзе. Працэс праходзіў ў закрытым рэжыме, яго ўзначальвала судзьдзя — Валянціна Зянькевіч.
- На лаве падсудных знаходзіліся галоўная рэдактарка выданьня Марына Золатава, былая генэральная дырэктарка Людміла Чэкіна. Яшчэ тры фігуранткі справы, якім раней зьмянілі меру стрыманьня, – Вольга Лойка, Алена Талкачова і Кацярына Ткачэнка – на судзе не прысутнічалі, яны жывуць за мяжой.
- 17 сакавіка Марыне Золатавай і Людміле Чэкінай прысудзілі па 12 гадоў калёніі кожнай.
- 15 красавіка генэральны дырэктар Hoster.by Сяргей Павалішаў напісаў, што ўлады памілавалі дзевецярых фігурантаў справы пасьля пададзенага ў сьнежні прашэньня аб памілаваньні. Партал Zerkalo.io паведаміў, што мае інфармацыю аб тым, што агулам ад крымінальнай адказнасьці вызвалілі 9 чалавек.
