Грамадзян Беларусі абавязалі паведамляць у міліцыю пра дазвол на жыхарства ў іншай краіне, іншае грамадзянства або «карту паляка». Міліцэйскія чыноўнікі палохаюць адказнасьцю за ўтойваньне гэтых дакумэнтаў. Беларусы Ўкраіны, калі і захочуць паведаміць пра дазвол на жыхарства, ня змогуць гэтага зрабіць — сайты дзяржаўных органаў Рэспублікі Беларусь заблякаваныя, а амбасада і кансуляты не працуюць.
«Жаданьня карыстацца VPN я ня маю»
У тэматычных чатах беларусаў ва Ўкраіне карыстальнікі абмяркоўваюць, як можна паведаміць уладам Беларусі пра свой дазвол пра жыхарства. Амбасада Беларусі ў Кіеве не працуе з сакавіка 2022 году. Сайты дзяржаўных органаў — МУС, МЗС і іншыя — з тэрыторыі Ўкраіны не адкрываюцца.
«Нехта спрабаваў ужо пісаць у МЗС Беларусі пра наяўнасьць сталага дазволу на жыхарства ва Ўкраіне? Напісана, што да 11 кастрычніка трэба паведаміць. Але не адкрыўся ніводзін сайт. Падзяліцеся інфармацыяй, як рабілі, калі ў некага атрымалася», — піша адна з карыстальнікаў чату.
«У законе запісана, што паведамленьне трэба падаваць у электронным выглядзе на Адзіны партал электронных паслуг (доступ да сайту заблякаваны за мяжой) ці пры асабістым звароце. Ідыятызм найвышэйшага гатунку. Хочаш паведаміць пра сталы дазвол на жыхарства — едзь і паведамляй», — камэнтуе другі.
«Я ў шоку, як хутка нас загналі ў кут», — дзеліцца эмоцыямі яшчэ адзін беларус, які жыве ва Ўкраіне.
«Яны (сайты беларускіх дзяржаўных органаў. — РС) проста заблякаваныя ад пачатку поўнамаштабнай вайны. Можна было б скарыстацца пры жаданьні VPN, але такога жаданьня я ня маю. Таму нікому нічога ня буду паведамляць», — патлумачыла Свабодзе Марына (імёны суразмоўцаў зьмененыя дзеля бясьпекі. — РС).
Міхаіл жыве ва Ўкраіне з 2020 году. У Беларусі на яго заведзены крымінальныя справы, ён у вышуку. Ва Ўкраіне беларус мае часовы дазвол на жыхарства. Кажа, што нікому ня будзе паведамляць пра яго.
«На якой падставе? Я не лічу беларускую ўладу законнай, лічу яе ўвогуле злачыннай. Якая мне будзе прыдуманая кара за гэта? Ды хоць расстрэл, я нічому не зьдзіўляюся. Думаю, пакараньне будзе залежаць ад таго, які настрой будзе ў дыктатара ў дзень прыняцьця чарговага абсурднага закону», — кажа Міхаіл.
Ён не разумее доўгатэрміновых наступстваў прыняцьця такога дапаўненьня ў закон.
«Маёмасьць забіраць будуць? Дык яе і сёньня могуць забраць, і без аніякага закону. Калі людзей садзяць на вялікія тэрміны за падабайку, то няўжо цяжка проста канфіскаваць любую кватэру», — лічыць уцякач.
Суразмоўца таксама мяркуе, што законы пра забарону атрымаць пашпарт ці дакумэнт за мяжой, абавязак паведаміць пра дазвол на жыхарства — «гульня на ўнутраную аўдыторыю, на тых беларусаў, якія жывуць у Беларусі, глядзяць тэлевізар, пляскаюць у ладкі і кажуць: «Во Лукашэнка маладзец, пакараў змагароў!».
Міхаіл дадаў, што для яго лепш быць «бамжом ва Ўкраіне», чым вяртацца ў Беларусь. Тым больш ён гэтага зрабіць ня можа.
Як беларускія ўлады прапануюць данесьці пра свой дазвол на жыхарства
Згодна з новым дапаўненьнем закону «Аб грамадзянстве», інфармацыю пра дазвол на жыхарства ў іншай краіне можна разьмясьціць на адзіным партале электронных паслуг platform.gov.by. Але для гэтага трэба атрымаць электронны лічбавы подпіс і стварыць пэрсанальны кабінэт на сайце.
Чыноўнікі прапануюць напісаць пра дазвол на жыхарства на партал «обращение.бел», зьвярнуцца пісьмова ў міліцыю ці дыпляматычныя службы. Да звароту трэба прыкласьці копію атрыманага замежнага дакумэнту.
